Epektibong Paggamit kan Bagong Brochure
1 Sa satong nakaagi pa sanang pandistritong kombension, naogma kitang akoon an bagong brochure na Kun Magadan an Sarong Namomotan. Maninigong makaakit iyan sa mga tawo sa gabos na klase nin buhay, mantang kadakoldakol na kan nagmondo sa pagkagadan nin sarong namomotan. An magayon na mga ilustrasyon kaiyan maninigong magpapasil na ipasakamot iyan. Sa pahina 29 an dramatikong drowing ki Lazaro na binubuhay hale sa mga gadan nagpapaheling kan ‘makosog na kamawotan ni Jesus na paraon an mga danyos nin kagadanan.’ An sunod na bilog na pahinang ilustrasyon naglaladawan nin magayagayang eksena nin pagbuhay liwat sa bagong kinaban. Abaa kamakapaoogma kaini sa puso kan mga nagmomondo!
2 Dinisenyo an brochure na ini tanganing gamiton sa pag-orolay. Maheheling an mga hapot sa kahon sa poro kan kada seksion imbes na sa ibaba kan kada pahina. Magagamit nindo ining “Mga Hapot na Dapat Horophoropon” sa ano man na paaging hinohona nindong pinakamakakatabang sa saindong estudyante.
3 Kun nagsosongko, tibaad boot nindong ipaheling an mga laog sa pahina 2 asin hapoton an kagharong kun ano an nakakapukaw sa saiyang interes. Togotan siang ipahayag an saiyang mga saboot, dangan ipaheling kun paano an brochure nagtatao nin karangahan. An lambang seksion naggagamit nin dakol na teksto sa Biblia na nagpapaheling kan basihan para sa satong paglaom.
4 An subtema sa pahina 5, “Igwa nin Tunay na Paglaom,” nagtatampok kan nakakarangang paglaom sa Biblia para sa mga gadan. Maninigo ining makapukaw sa apetito sa “Sarong Seguradong Paglaom Para sa mga Gadan,” na makukua sa pahina 26-31. An kahon sa pahina 27 itinatao an “Mga Teksto na Nakararanga.” An nagmomondong kagharong maheheling tolos na tunay nanggad na si Jehova “an Dios nin gabos na karangahan.”—2 Cor. 1: 3-7.
5 Sa paaging mapagrisa sa pagmate nin iba, ipinaheheling kan brochure kun paano mapanggaganahan an kamondoan sa pagkagadan nin sarong namomotan asin kun paano makakatabang an iba sa siring na makamomondong mga panahon. Igwa nin kahon sa pahina 25 na may titulong “Pagtabang sa mga Aki sa Pag-atubang sa Kagadanan.” Maninigong makatabang ini sa mga magurang na kaipuhan na makapanggana sa problemang ini.
6 Magkaigwa permi nin ekstrang kopya asin gamiton iyan sa impormal na pagpapatotoo. Tibaad boot nindong songkoon an lokal na mga punerarya sa saindong teritoryo tanganing aramon kun boot nindang magkaigwa nin mga kopya para sa pagranga sa nagmomondong mga pamilya.
7 Ibinibilang niatong pribilehiyo na gamiton an bagong brochure na ini sa “pagranga sa gabos na nagmomondo.”—Isa. 61:2.