An Punto-de-Vista kan Biblia

Terorismo—Taano daw ta Marikas na Nag-oorog?

“Dawa kun kaipuhan na paputukon nindo an kabanga kan kontinente asin pabuloson an sarong dagat na dugo tanganing malaglag an kabtang nin kahayupan, dai maribok an konsensia nindo manongod sa paggibo kaiyan.”—Karl Heinzen, rebolusyonaryong Aleman, 1809-80.

AN MGA libro asin iba pang bagay bigla na sanang nagrulupad kan an bomba pumutok sa sarong tindahan sa Dortmund, Alemania. Walong namamakal an nalugadan, na an iba grabe. Ini daw saro na naman na maringis na akto nin politikal na mga ekstremista? Bako. “Soba sana idto,” sabi nin sarong 20 anyos na dai nahaloy nadakop kan mga pulis. Minsan siring, an kadaihan nia nin politikal na motibasyon bakong dahelan na an ginibo dai magin akto nin terorismo.

Sa laog sana nin siyam na aldaw—poon Pebrero 28 sagkod Marso 8, 1985—an Northern Ireland, Lebanon, España, asin an Republika Pederal nin Alemania naheling an madugong kamot nin terorismo na gumadan sa 72 katawo, na may nalugadan pang 245. Asin poon kaidto, an nerbiyos, takot, asin pagkakubhan huli sa mga tampalasan nagpapadagos na daing kasagkodan.

Taano daw an mga tawo sa sarong sibilisadong kinaban ta naggagamit nin kadahasan tanganing maotob an saindang mga pasohan? Iyan daw puwede, talagang, mareresolberan pa? An Biblia nagtatao nin masasarigan na mga simbag.

Taano ta May Terorismo?

“Dai ka magpaheling na ika naaanggot sa mga paragibo nin maraot. . . . Pabayaan an kaanggotan asin rumayo sa kabangisan; dai ka magpaheling nin kaanggotan tangani sanang makagibo nin maraot.” “Totoong gayo na an pan-aapi puwedeng makaparungaw sa sarong madonong.”—Salmo 37:1, 8; Eclesiastes 7:7.

Kun an mga gobyerno paorootrong nasusudya na maresolberan an mga problema na arog baga kan kadaihan nin katoninongan, masakit na kamugtakan, o sosyal o ekonomikong inhustisya, kun saindang itinotogot o isinasadol pa ngani an pan-aapi asin pagpaorog, natural sana na an mga tawo puwedeng ‘maanggot.’ Sinda nangangatanosan: ‘Kaipuhan na may gibohon, asin kun bakong ngonyan, noarin? Kun bakong ako, siisay?’

Kun beses an pagkadesesperar puwedeng “makaparungaw sa sarong madonong.” Sa paghona na sia madonong, an matoninong na nagpoprotesta tibaad sa primero an intension gumibo sana nin daing kadahasan na mga akto nin pagmasumbikal sibil. Alagad ta marikason nanggad na ini puwedeng magin mga akto nin kadahasan! Halimbawa, helinga an sarong nagkakabaranga sa rasa asin ekonomiya na nasyon sa Aprika. An nagpoon bilang matoninong na mga pagmartsa sa pagprotesta nagin nakikipaglaban na oposisyon. “Ngonyan, pakalihis nin beinte singko anyos na pakikipaglaban asin sa ibong nin bago pa sanang mga panuga nin reporma,” sabi kan magasin na Time, “lakop pa man giraray an kadahasan sa nagkakabarangang nasyon.”

Huli ta an silot sa maraot na gibo dai tolos isinagibo, kaya an puso kan mga aki nin tawo nagin nang biyong matagas sa paggibo nin maraot.”—Eclesiastes 8:11.

Totoong depisil na dakopon an mga nagkasala asin darahon sinda sa hustisya. Sa nagkapirang lugar, an mga hokoman nagin sobra kaboot sa pagtratar sa akusadong mga parakasala. Idugang pa digdi an kadakoldakol na trabaho sa hokoman na minaolang sa mga autoridad na gibohon “an silot sa maraot na gibo . . . tolos,” asin yaon an mga elementong kaipuhan tanganing an puso nin mga parakasala magin “biyong matagas sa paggibo nin maraot.” Mantang an mga gobyerno mayo nin nakuang mapangganang paagi na mapaglabanan minsan an “normal” na krimen—nangorogna an internasyonal na terorismo—tibaad dakol an masugotan na probaran na gibohon iyan na dai napapadusahan.

Alagad Taano ta Marikas na Nag-oorog Ngonyan?

“Sa huring mga aldaw maabot an delikadong mga panahon na masakit pakibagayan. . . . An mga tawo magigin mamomoton sa sainda man sana, . . . dai tataong magbalos, bakong maimbod, dai nin pagkamoot, dai maoyonan, . . . mayong pagpopogol sa sadiri, maringis, mayong pagkamoot sa karahayan.”—2 Timoteo 3:1-3.

An kronolohiya sa Biblia asin an kaotoban kan mga hula sa Biblia nagpaparisa na an satong kapag-arakian nabubuhay sa “huring mga aldaw” na tinatandaan nin “delikadong mga panahon na masakit pakibagayan.” Dai daw nindo sasabihon na an mga lalaki asin babae na igwa kan mga kaugalean na nasa itaas potensial na mga kandidato para sa terorismo? Mantang an saindang kabilangan nagdadakol sa pagdangadang kan “huring mga aldaw” sa katapusan kaiyan, dai kita maninigong magngalas na an kadahasan padagos na nakalalakop sa gabos na kabtang kan sosyedad nin tawo.

“Asin an daga nagin maraot sa pagheling kan tunay na Dios asin an daga napano nin kadahasan.” “Huli ta kun paano kan mga aldaw ni Noe, siring man an presensia kan Aki nin tawo.”—Genesis 6:11, 13; Mateo 24:37.

Kan aldaw ni Noe, an espiritung mga aki nin Dios na ginibo an sadiri na mga demonyo nagkaigwa nin dakulang kabtang sa paggibo sa kinaban na pano nin kadahasan. (Genesis 6:1-5) An maraot na mga linalang na ini dai na puwedeng magmateryalisar nin mga hawak nin tawo tanganing direktang impluwensiahan an katawohan, arog kan ginibo ninda kaidto. Alagad ngonyan an saindang bakong direkta, dai naheheling na mga pagsalakay kapareho man sana kamapanggadan.

Ngonyan na nabubuhay kita sa mga aldaw kan “presensia kan [pinamuraway na] Aki nin tawo,” si Jesu-Cristo, makakalaom kita na an kinaban magin madugo man paagi sa arog kaiyan na kadahasan. Sa katunayan naheheling niato, arog kan ihinula ni Jesus, an “pag-orog nin katampalasanan.” (Mateo 24:12) Ini totoo huli ta “an inaapod Diablo asin Satanas . . . ihinolog sa daga, asin an saiyang mga anghel . . . kaibanan nia.” Ano an resulta? “Herak man kan daga asin kan dagat, huli ta huminilig na dian saindo an Diablo, na may dakulang kaanggotan, sa pakaaram na halipot na sana an saiyang panahon.” (Kapahayagan 12:7-12) Bako daw na ini an pangenot na dahelan kun taano ta an terorismo nag-oorog sa daing kaagid na rikas ngonyan?

Kolog sa Pangangaki

Si Jesus naghula nin laen-laen na mga pangyayari na mangyayari sa panahon nin pagliliwat pakatapos na an saiyang Kahadean mapatindog asin bago nia laglagon an maraot na palakaw na ini. (Mateo 24; Marcos 13; Lucas 21) Sia nagsabi, arog kan nasusurat sa Marcos 13:8, na magkakaigwa nin “mga kolog nin kasakitan.” Kun paanong an literal na mga kolog sa pangangaki nagdadakol asin nag-oorog mantang nagdadangadang an pagkamundag, an mga kolog man nin kasakitan na sinasabi ni Jesus bilang tanda kan “huring mga aldaw” magdadakol asin mag-oorog mantang nagdadangadang an panahon kan daing kakontrang paghade ni Cristo.

Kaya bakong makangangalas na an “mga kolog” nin terorismo nag-oorog. Ini tibaad magin dahelan na an daing pakaaram na mga tawo, bilang kaotoban kan hula ni Jesus, ‘malunosan huli sa takot asin paghalat sa mga bagay na maabot sa ineerokan na daga.’ Alagad bakong an mga nakakaaram kan kahulogan kan saiyang minasunod na mga tataramon: “Alagad kun an mga bagay na ini magpoon nang mangyari, tindog kamo nin tanos asin tingagan an saindong mga payo, huli ta an saindong kaligtasan [kaiba an kaligtasan sa terorismo] naghaharani na.”—Lucas 21:26, 28.

[Blurb sa pahina 20]

Kun an mga gobyerno dai nakakaresolber sa mga problema, an mga tawo puwedeng ‘maanggot’

[Blurb sa pahina 21]

Kan aldaw ni Noe, an mga demonyo nagkaigwa nin dakulang kabtang sa paggibo sa kinaban na pano nin kadahasan