Pagpatalubo nin Interes sa mga Pagdalaw Liwat
1 An ministeryo iinagid sa pag-oma, asin an paggibo nin mga pagdalaw liwat ikinomparar sa pagkultibar asin pagbaribi. (Mat. 13:23; Luc. 10:2; 2 Cor. 9:10) Bilang “mga katabang nin Dios,” igwa kita nin obligasyon na tabangan an arin man na bago pa sanang tumubong banhi na tumalubo pasiring sa pagkamaygurang asin magin mabunga. (1 Cor. 3:6, 9) Paano niato pinakamarahay na magigibo ini?
2 Magin alisto sa paggibo nin mga pagdalaw liwat. Repasohon an saindong house-to-house record, asin desisyonan kun ano an ipakikipag-olay, basado sa saindong pinag-olayan kan enot na pagsongko. Marahay na perming gamiton an Biblia, na minimidbid an puwersa kaiyan na aboton an puso.—Heb. 4:12.
3 Kun iwinalat nindo an brochure na “An Dios daw Talagang May Pagmakolog sa Sato?,” puwede kamong pumoon paagi sa pagsabi nin arog kaini:
◼ “Dakol na tawo an nagtutubod na lalaglagon nin Dios an daga, mantang an iba natatakot na an tawo mismo an magibo kaiyan. Ano daw sa paghona nindo? [Pasimbagon.] Nagsasabi sato an Biblia na imbes na laglagon an daga, lilinigan iyan nin Dios sa maraot, na gigibohon iyan na lugar na may katoninongan asin katiwasayan.” Buksan sa pahina 22, asin basahon an Talinhaga 2:21, 22, na kinotar dian. Ipaliwanag an areglo nin pag-adal sa Biblia sa harong.
4 Kun ikinapasakamot nindo an brochure na “Uya!,” puwede nindong sabihon:
◼ “Kan nakaagi kong pagdalaw, binasa niato an dapit sa panuga nin Dios na gigibohon na bago an gabos na bagay. Kita asin an satong mga namomotan puwedeng magkamit kan bendisyon na ini paagi sa orog pang pag-adal manongod sa kabotan nin Dios asin kun paano iyan iaaplikar sa satong buhay.” Basahon an Juan 17:3, dangan buksan sa parapo 52 asin 53 na nasa pahina 27.
5 Kun binabalikan an ikinapasakamot na brochure na “Purpose of Life” sa saro na may hilig sa relihiyon, puwedeng maheling nindong angay na magsabing:
◼ “Posibleng marhay na inorootro nindo nin dakol nang beses an pamibi kan Kagurangnan. Ano an minasabong sa isip nindo kun hinahagad nindo na dumatong an Kahadean nin Dios?” Kasunod sa simbag kan kagharong, basahon an parapo 8 asin 9 sa pahina 26, dangan basahon an Daniel 2:44. Ipaliwanag na an pagdatong kan Kahadean nin Dios mangangahulogan nin katapusan kan karatan asin kasakitan.
6 Girumdomon na an pagdalaw liwat puwedeng gibohon sa siisay man na andam na magdangog, baga man ikinapasakamot an literatura o dai. Pagmaigotan na mag-iskedyul nin panahon kada semana para sa paggibo nin mga pagdalaw liwat. Bendisyonan logod ni Jehova an saindong mahigos na paghihingoa na magbunga para sa saiyang kaomawan.—Juan 15:8.