Bagong Programa sa Pansirkitong Asamblea
“Pinapagdadanay na Harani sa Isip an Aldaw ni Jehova” an tema kan programa sa duwang aldaw na pansirkitong asamblea na mapoon sa Pebrero, 1998. (2 Ped. 3:12) Iyan dinisenyo tanganing pukawon sa sato an pagkaapurado. Sa dai mahahaloy maeeksperyensiahan kan mga nag-eerok sa daga an mga paghokom ni Jehova. Siisay an makaliligtas sa “dakulang aldaw nin Dios na Makakamhan sa gabos”? Idto sanang mga nagdadanay na puka sa espirituwal asin nag-eestablisar nin pamumuhay na may “banal na mga gawe asin gibo nin diosnon na debosyon.”—Kap. 16:14; 2 Ped. 3:11.
An bautismo kaipuhan nin saro tanganing makaligtas sa aldaw ni Jehova. (1 Ped. 3:21) An mga parahayag na nagmamawot na magpabautismo sa asamblea maninigong paisihon an nangengenot na paraataman, na magibo nin kinakaipuhan na mga areglo.
An may apat na kabtang na simposium na, “An Maninigong Magin Klase kan Satong Pagkatawo,” ipaheheling nin malinaw kun anong mga gibo an kalabot sa pagpapadanay na harani sa isip kan presensia kan aldaw ni Jehova. An pampublikong pahayag na, “Humiro na May Kadonongan Mantang Naghaharani an Aldaw ni Jehova,” ipaliliwanag kun ano an boot sabihon kan ‘paghanap ki Jehova, sa katanosan, asin sa kahoyoan,’ tanganing makaligtas.—Sof. 2:3.
An pansirkitong asamblea matatapos sa duwang nakamomotibar na pahayag kan mga nagbibiaheng paraataman, na may titulong: “Nakasentro daw sa Katotoohan an Saindong Buhay?” asin “Pagplano sa Ngapit na Nasa Isip an Aldaw ni Jehova.” An mga pahayag na ini pahihiroon kita na siyasaton an satong buhay asin gibohon an ano man na mga pagliliwat na kaipuhan. An hula sa Biblia asin mga pangyayari sa kinaban malinaw na nagpaparisa na harani na an aldaw ni Jehova. An programa sa asambleang ini pahihiroon kita na ‘magmata asin magpuka.’ (1 Ped. 5:8) Gumibo nin depinidong mga plano na atenderan an duwang aldaw.