Bukas an Dakulang Tata Pasiring sa Gibohon
1 Bilang maigot na parahulit kan maogmang bareta, galagang hinanap ni Pablo an mga teritoryo kun saen mas dakula an pangangaipo, na an saro kaiyan iyo an siudad nin Efeso. Mapangganang marhay an paghuhulit nia duman kaya nagsurat sia sa mga kapwa Kristiano: “An sarong dakulang tata na pasiring sa gibohon binukasan sa sakuya.” (1 Cor. 16:9) Padagos na naglingkod si Pablo sa teritoryong idto asin tinabangan nia an dakol na taga-Efeso na magin mga nagtutubod.—Gibo 19:1-20, 26.
2 Ngonyan, an sarong dakulang tata pasiring sa gibohon binukasan sa sato. Inaagda kita na tabangan an mga kongregasyon na dai nahuhulitan nin sirot an gabos nindang teritoryo kada taon. Sa siring mahihipnoan kan satong mga paghihingoa an pangangaipo sa nagkapirang lugar.—Ikomparar an 2 Corinto 8:13-15.
3 Makapaglilingkod daw Kamo Kun Saen Mas Dakula an Pangangaipo? Mapagngayongayo daw nindong inisip-isip an posibilidad na maglingkod sa ibang lugar? Tibaad dai na ngani nindo kaipuhan pang bumalyo kun igwa nin kongregasyon na nangangaipo nin tabang sa saindo mismong siudad o banwaan. Taano ta dai makipag-olay sa paraataman sa sirkito manongod sa bagay na iyan asin helingon kun ano an isusuherir nia? O tibaad sa laog kan teritoryo kan saindo mismong kongregasyon, dakol an tawong bongog o nagtataram nin ibang lenguahe na mayo pa ni saro na nakaaasikaso. Tanganing mapanigoan an pangangaipong ini, puede daw kamong maghingoa na pag-adalan an saindang lenguahe? Apuera kaini, tibaad igwa na nin grupo na iba an lenguahe o haraning kongregasyon na haloy nang ‘nakikimaherak sa Kagurangnan para sa dakol pang paraani kan Kahadean.’ (Mat. 9:37, 38) Kun siring, kamo daw naghimate?
4 Sa dai pa sana nahahaloy na mga dekada, rinibong Kristianong pamilya an buminalyo sa ibang kadagaan tangani na mas lubos na makikabtang sa pag-ani. An sarong mag-agom na naggibo kaini nagsabi: “Boot niamong paglingkodan si Jehova kun saen pinakadakol an puede niamong ikatabang.” Kun ini an pagmawot nindo asin manompongan nindong posibleng bumalyo sa ibang lugar, ipakipag-olay nguna an saindong mga plano sa kamagurangan kan saindong kongregasyon.
5 Kun boot nindong maghapot sa Sosyedad dapit sa kun saen may pangangaipo, magtao nin surat sa Komite sa Paglilingkod kan Kongregasyon na sinasabi an saindong espesipikong pagmawot. Iiiba ninda dian an saindang mga komento asin ipadadara iyan sa Sosyedad. Sa ano man na situwasyon, mantang nagdadanay na bukas an dakulang tata pasiring sa gibohon, kita logod gabos padagos na magin sibot sa paglilingkod ki Jehova.—1 Cor. 15:58.