Gamiton an mga Brosyur sa Pagpukaw Kapwa sa Isip Asin Puso
1 An katotoohan sa Biblia maninigong iatubang sa paagi na mapukaw kapwa sa isip asin puso. Kan ipaliwanag nin detalyado ni Jesus an katotoohan sa mga naghihinanyog sa saiya, puminili sia nin mga topiko na nakainteres asin nakamotibar sa sainda. (Luc. 24:17, 27, 32, 45) An kapangganahan kan satong ministeryo dependeng marhay sa paghihingoa niato na aramon an espirituwal na mga pangangaipo kan mga naghihinanyog sa sato.
2 Puedeng magin epektibong mga kasangkapan an mga brosyur sa pag-abot kan isip asin puso kan mga nanonompongan niato sa ministeryo. Patienot na horophoropon kun siisay an puedeng maghimate sa mensahe sa kada brosyur na itinatampok ngonyan na Agosto:
—Sarong Libro Para sa Gabos na Tawo. Idtong mga dai nagtutubod sa Biblia o dai lubos na nakasasabot kan halaga kaiyan sa saindang buhay makikinabang sa pangangatanosan sa brosyur na ini.
—An Dios daw Talagang May Pagmakolog sa Sato? An mga nasasakitan sa pagbuhay o nakaeksperyensia na nin trahedya pahahalagahan an nakararangang mensaheng ini dapit sa sarong ngapit na mayo nang pagdusa.
—What Is the Purpose of Life—How Can You Find It? An mga hoben na odok na nag-iisip dapit sa saindang ngapit makikinabang sa basado sa Bibliang mga simbag na makukua sa brosyur na ini.
—The Government That Will Bring Paradise. An siisay man na konektado sa gobyerno puedeng maghimate sa mensaheng ini dapit sa kun paano reresolberan kan Kahadean nin Dios an depisil na mga problema nin katawohan.
—Kun Magadan an Sarong Namomotan. An dakol na namamahala sa punerarya inaapresyar an pagkaigwa nin mga kopya kan brosyur na ini para sa mga pamilyang nagadanan. An mga parahayag na nagpapatotoo sa mga sementeryo ginagamit an brosyur na ini tangani na rangahon an mga nagmomondo. An duwang tugang na babae dinolok an sarong pamilya na may pitong miembro na namimibi sa kataed nin sarong lolobngan. Bilang resulta kan paghiras kan nakararangang mensahe hale sa brosyur, naponan an pag-adal sa Biblia sa ina kan sumunod na aldaw!
—Should You Believe in the Trinity? An sarong relihiosong marhay na tawo puedeng maghimate sa katotoohan na makukua sa dokumentadong marhay na pagbuyagyag na ini sa pundamental na doktrina kan Kakristianohan.
3 Magin pamilyar kamo sa kada brosyur, asin determinaran kun paano iyan pinakamarahay na magagamit sa saindong teritoryo. Para sa isinuherir na mga pag-atubang, helingon an likod na pahina kan luwas na Hulyo 1998 kan An Satong Ministeryo sa Kahadean. Bendisyonan logod ni Jehova an saindong mga paghihingoa na maabot kapwa an isip asin puso nin mga tawo.—Mar. 6:34.