Bagong Programa sa Espesyal na Aldaw nin Asamblea
1 Mantang an media asin sekular na mga edukador nagpapamuraway sa materyal na kayamanan, an Tataramon nin Dios nagsasadol sa sato na “Magin Mayaman sa Marahay na mga Gibo.” (1 Tim. 6:18) Iyan an tema kan programa sa espesyal na aldaw nin asamblea poon sa Pebrero 2003. Anong pagparigon sa boot an aakoon niato sa asambleang ini?
2 Totokaron kan paraataman sa sirkito kun ano an kahulogan kan “Magin Mayaman sa Punto de Vista nin Dios,” asin iinterbiohon nia an nagkapira na naghihingoang magkaigwa nin espirituwal na kayamanan. Sa enot niang pahayag sa aldaw na iyan, ipaheheling kan nagdadalaw na ispiker kun paano an banwaan nin Dios naggigibo nin “Marahay na mga Gibo sa Panahon na Ini nin Pag-ani.” An kada saro sa sato maeenkaminar na estudyaran kun paano kita puedeng makikabtang nin mas lubos pa ngani sa ipinagboot nin Dios na pag-ani na ginigibo ngonyan.
3 Kanigoan nanggad an pag-orgolyo niato kun naheheling niato an Kristianong mga hoben na nagmamaigot na makamtan an espirituwal na kayamanan! Ini nagpapamuraway ki Jehova asin nakakatabang sa mga hoben na magbugtak nin marahay na pundasyon para sa maabot na mga pribilehio nin paglilingkod. An kabtang na “Pagtaong Komendasyon sa mga Hoben Huli sa Marahay na mga Gibo nin Pag-omaw ki Jehova” itatampok an marahay na mga gibo na ginigibo kan hoben na mga Kristiano sa lokal.
4 Ano an mga resulta nin pagpapadagos sa marahay na mga gibo? Totokaron ini kan nagdadalaw na ispiker sa saiyang pangultimong pahayag na, “Magpadagos sa Marahay na mga Gibo Asin Mag-ani nin mga Bendisyon ni Jehova.” Totokaron nia an apat na kabtang na dian kita nag-aani nin mayaman na mga bendisyon: (1) bilang mga indibiduwal, (2) bilang mga pamilya, (3) bilang kongregasyon, asin (4) bilang pambilog na kinaban na organisasyon.
5 An mga nagdusay na ki Jehova magkakaigwa nin oportunidad na magpabautismo. Kun andam na kamong gibohon an tanggang iyan, ipaaram tolos sa nangengenot na paraataman.
6 Kun ipaisi na an petsa kan asamblea sa saindong lugar, gumibo tolos nin depinidong mga plano na umatender. Hingoahon na umabot nin amay tangani na makapakikabtang sa pambukas na awit asin pamibi. An pagigin presente asin atento sa bilog na programa kan espesyal na aldaw nin asamblea pakokosogon kita na magpadagos sa gibohon na nagpapangyari sa sato na magin tunay na mayaman sa punto de vista kan satong Dios, si Jehova.