Puede daw Nindong Ipagamit an Saindong Harong?
1 Kan enot na siglo, ipinagamit nin dakol na Kristiano an saindang harong para sa mga pagtiripon kan kongregasyon. (1 Cor. 16:19; Col. 4:15; Filem. 1, 2) Sa nagkapirang kongregasyon ngonyan, mayo na nin igong lugar para sa mga grupo nin Pag-adal sa Libro kan Kongregasyon asin mga pagtiripon bago lumuwas sa paglilingkod sa langtad. Ini puedeng magresulta sa nagkapirang grupo nin pag-adal sa libro na igwa nin 30 o labi pang nag-aatender, na sobra nanggad sa rekomendadong kabilangan na mga 15.
2 Sarong Marahay na Pribilehio: Inisip-isip na daw nindo na ipagamit an saindong harong para sa Pag-adal sa Libro kan Kongregasyon? An sarong kuarto na supisyente an kadakulaan na malinig, maliwanag, asin marahay an bentilasyon tamang-tama sa katuyohan na ini. Mantang an pag-adal sa libro sarong pagtiripon kan kongregasyon asin kabtang kan areglo ni Jehova na tokdoan an saiyang banwaan, sarong marahay na pribilehio an pagkaigwa nin pag-adal sa libro sa saindong harong. Dakol an nagbabareta na nakinabang sinda sa espirituwal sa pagpagamit kan saindang harong sa paaging ini.
3 Kun sa paghona nindo angay an saindong harong, sige ipaaram ini sa kamagurangan. Tibaad naghahanap sinda nin dagdag pang mga lugar. Kun bakong posible na magkaigwa nin pag-adal sa libro sa saindong harong, puede daw na gibohon dian an mga pagtiripon bago lumuwas sa paglilingkod sa langtad? Dawa kun mayong pangangaipo sa presenteng panahon, aapresyaron kan kamagurangan an pakaaram na andam na gamiton an saindong harong. Puede nindong ikaogma an pribilehio sa ngapit.
4 Pagpaheling nin Mararahay na Ugale: Kun nagtitiripon sa sarong pribadong harong, an gabos na nag-aatender nagkakaipo na magin magalang sa rogaring kan kag-imbitar. Maninigong seguradohon nin mga magurang na an saindang mga aki magdanay sa lugar na designado para sa pag-adal, na dai nagduduman sa pribadong mga lugar kan harong. Maninigo man na magpaheling nin konsiderasyon sa kataraed, na maingat na linilikayan na makamolestia sa sainda na dai man kaipuhan.—2 Cor. 6:3, 4; 1 Ped. 2:12.
5 Ineenkaminar kita kan Hebreo 13:16 na dai paglingawan “an paggibo nin marahay asin an paghiras nin mga bagay sa iba, huli ta sa siring na mga atang naoogmang gayo an Dios.” An pagpagamit kan saindong harong para sa pagtiripon kan kongregasyon sarong marahay na paagi na ikahiras an marahay na mga bagay sa iba asin ‘ikatao an onra ki Jehova paagi sa saindong mahahalagang bagay.’—Tal. 3:9.