Kaya daw Nindong Mag-auxiliary Payunir?
1 Dinagka ni Jesus an saiyang mga parasunod na magmahigos sa ministeryo, asin sinierto nia sa sainda na an pagsunod sa dalan na ini magtatao nin kaogmahan sa sainda. (Mat. 10:8b; Gibo 20:35) Kan nakaaging Abril 15,730 an naglingkod bilang auxiliary payunir. Kaya daw nindong makikabtang sa mga bendisyon na ini ngonyan na taon paagi sa pagpalista bilang auxiliary payunir sa Abril asin Mayo?—Sal. 34:8.
2 Pagsiyasat sa Saindong Kamugtakan: Mantang hinohorophorop nindo an mga eksperyensiang sinitar sa ibaba, hapota an saindong sadiri: ‘Kaya ko daw na arogon an arin man sa mga halimbawang ini? Paano ko daw magigibo an kinakaipuhan na mga pagliliwat na mabukas kan dalan tanganing ako makapag-auxiliary payunir?’
3 An sarong tugang na babae nakapag-auxiliary payunir maski sia may limang aki asin sekular na trabaho. Paano sia binalosan? An saiyang agom asin mga aki nagtao saiya nin marahayon na pagsuportar, asin bilang resulta kan marahay na halimbawa kan tugang, an agom napahirong magin dai pa bautisadong parahayag kan sumunod na bulan.
4 Sa sarong kongregasyon an gabos na magurang asin ministeryal na lingkod nag-auxiliary payunir sarong bulan. An kadaklan sa sainda may sekular na trabaho, alagad ta ginamit ninda an gabos na Sabado asin Domingo sa espirituwal na mga aktibidad. Nakinabang an bilog na kongregasyon sa marahay na pangengenot na ini. Sa 77 parahayag, 73 an nakikabtang sa pagpapayunir kan bulan na idto.
5 An sarong 15 anyos na daragitang nag-eeskuwela ginamit an duwang semana niang bakasyon sa tigsoli sa pag-auxiliary payunir asin nagsasabi: “Talagang naheling ko an pag-oswag kan sakong pakikipag-olay. Mas dakol an nagibo kong pakikipag-olay sa mga tawo.”
6 An mga retirado na sa sekular na trabaho parateng may marahayon na mga oportunidad na gibohon an intereses kan Kahadean. Pagkagadan kan saiyang agom, an sarong 84 anyos na tugang na babae nagsurat: “An gabos kong aki darakula na asin may mga agom na saka pamilya. Dai ninda ako pinabayaan, pero dai kayang haleon kan saindang mga pagsongko an pakamate ko nin kapungawan asin kamondoan. Dangan isinuherir kan saro sa kamagurangan sa samong kongregasyon na probaran kong mag-auxiliary payunir. Nag-alangan ako pero sa huri nagdesisyon na probaran iyan. Kanigoan na kagayagayahan! Nagpadagos akong mag-auxiliary payunir bulan-bulan poon kaidto.”
7 Magplano Na Ngonyan: Taano ta dai gumibo nin positibong mga plano ngonyan na mag-auxiliary payunir sa Abril asin Mayo? Tanganing magin mapanggana, kaipuhan an maingat na pagplano. Ini maririsa sa eksperyensia nin mga nakapag-auxiliary payunir maski sinda may mga paninimbagan sa pamilya o bilog na panahon na sekular na trabaho. Kaolayon an iba na nagin mapanggana sa pagpapayunir tanganing makinabang kamo sa saindang kabatidan. Siring man, dumolok ki Jehova sa pamibi, na hinahagad an saiyang tabang.—Isa. 40:29-31; Sant. 1:5.
8 Daing duwa-duwa, dakol an kagayagayahan kan mga inaareglo an saindang mga gibo tanganing makapaglingkod bilang auxiliary payunir. Puwede daw nindong kamtan an pribilehiyong ini? Kun gigibohon nindo an paghihingoa na pahiwason an saindong ministeryo, segurado na ibububo saindo ni Jehova an nagsosopay na bendisyon.—Mal. 3:10.