Makikakabtang daw Kamo sa Impormal na Pagpapatotoo Ngonyan na Bulan?
1 Kabale sa satong regular na rutina sa buhay an espisipikong mga panahon para sa pakikipag-olay sa mga tawo dapit ki Jehova. Nagtatagama kita nin panahon para sa pagpapatotoo nin pormal sa harong-harong, paggibo nin mga pagdalaw liwat, asin pagkondukta nin mga pag-adal sa Biblia. Pero igwa nin dakol pang ibang bakong gayong pormal na mga okasyon na makatataram kita sa mga tawo manongod sa katotoohan. Inaapod niato an paghuhulit na ini na impormal na pagpapatotoo.
2 An ibang mga parahayag nakakua nin dakol na oportunidad tanganing makiiba sa siring na klase nin paglilingkod. Kita gabos puwedeng maghingoa na magin alisto sa siring na mga panahon mantang kita nagbibiyahe, pasiring sa eskuwelahan o trabaho, asin minasongko sa mga paryentes. Aaprobetsaran daw nindo an mga oportunidad na ini ngonyan na bulan?
3 Gumibo nin Patienot na mga Plano: An pag-andam asin maingat na pagplano matabang sato tanganing makapatotoo nin impormal sa epektibong paagi. Siertohon na magdara nin mga publikasyon. Bilang dagdag sa An Torrengbantayan asin Magmata!, igwa kita nin nagkapirang tract na nagtatampok nin nakapupukaw sa isip na mga titulo tanganing pukawon an interes. Igwa nin mga brochure na nakaiinteres sa mga tawo na laen-laen an pinaghalean asin mga relihiyon. Igwa man kita nin pambulsang mga libro na nagsasambit nin mga tema na interesante sa presente. Arin na mga publikasyon an napili nindong gamiton? Pag-isipan ini bilang pamilya. Dangan ensayohon kun ano an saindong sasabihon kun lumataw an angay na okasyon.
4 Mantang Nagbibiyahe: An ekselenteng panahon na makapatotoo nin impormal iyo an mantang nagbibiyahe pasiring sa trabaho o sa eskuwelahan. Magdara nin Biblia asin saro sa mga publikasyon na nasambit sa enotan. Parateng nakapupukaw nin pag-orolay an pagbasa sa siring na mga publikasyon sa mga pampublikong lunadan. Magdara nin diit na suplay nin mga tract tanganing itao sa interesadong mga tawo.
5 Sa Trabaho o sa Eskuwelahan: Makakukua man kita nin mga oportunidad na makapatotoo nin impormal sa trabaho o sa eskuwelahan durante kan panahon nin pagpahingalo. An pagkakaigwa sana nin libro o tract sa saindong lamesa parateng nakakukua nin atension asin nabubuksan an dalan para sa pag-orolay. Nangorogna ining totoo sa librong Creation huli sa kadakol na ilustrasyon asin marahay na pangangatanosan kaiyan. Siertong marahay na magdara kita nin saro ngonyan na bulan. Ini puwedeng gumiya sa pagtatao nindo nin marahay na patotoo.
6 Dai niato palihison an dakol na oportunidad niato na makatao nin impormal na patotoo kada aldaw. Mabunga an paaging ini nin paghuhulit, asin kaipuhan na makikabtang an mga lingkod ni Jehova dian. Arog ki Jesus, an sato logod na pagkamoot sa kapwa magpahiro sato na magtaram sa kada angay na okasyon!—Mat. 5:14-16.