Kapahayagan—Mga Misteryong Nahayag
1 An libro nin Kapahayagan haloy nang sarong misteryo. Alagad an impormasyon sa Kapahayagan bakong katuyohan na papagdanayon na hilom sagkod lamang. Ini sarong kabtang kan Tataramon nin Dios na kaipuhan niatong masabotan. (2 Tim. 3:16, 17) Makaoogma, kun paanong ginamit ni Jehova si Juan na ikomunikar an mga bisyon na ini sa kapwa mga Kristiano, siring man ngonyan ginagamit nia “an maimbod na oripon” na ihayag an kahulogan kan nakapupukaw na hulang ini.—Mat. 24:45-47; Kap. 1:1-3.
2 An Alok sa Marso: An librong Revelation—Its Grand Climax at Hand! nakapaliwanag nin marhay sa banwaan nin Dios. Alagad taano ini ta interesante sa mga tawo sa saindong teritoryo? Huli ta ini may koneksion sa mga pangyayari sa mga huring aldaw na ini. Bako daw na an mga madonong interesado sa ngapit na ihinayag nin Dios? Laen pa sa pagpaheling kan mga paghokom nin Dios, iinaatubang man kaini an mga panuga nin makangangalas na mga bendisyon sa ngapit.—Kap. 21:1-5.
3 An librong Revelation daw hararomon tanganing masabotan kan publiko? Malinaw na an iba daing gayo nadepisilan dian. An sarong lalaki nagsabi: “An impormasyon na ini mapuwersa nanggad. Alagad ini interesante. Nagugustohan ko ini.” An sarong ministro nagsabi: “Mayo pa lamang akong naaraman o nabasa na mas nakaoogma asin totoong gayo kisa librong ini!” An saro pang nakabasa kan libro na mayo pang sarong semana nagkomento: “Ngonyan an sakong mga mata bukas nang marhay sa katotoohan. Boot kong bagohon an bilog kong buhay.” Malinaw, dakol an nakanonompong nin kaogmahan mantang binabasa an libro sa Biblia na Kapahayagan na may pagsabot sa kaenot-enote asin nagpopoon na otobon an mga tataramon kaini.
4 Irekomendar an Librong Revelation sa Iba: Sa Marso, entusiastikong ialok an librong Revelation sa iba. Sabihon sa mga gustong bumasa kaini na puwedeng markahan ninda an mga kabtang kan libro na dai ninda nasasabotan, asin sa pagbalik nindo, ipakikipag-olay nindo an mga puntong ini sainda. Nagtatao ini nin dugang na basihan sa pagdalaw liwat.
5 Dugang pa sa paglilingkod sa harong-harong, dakol an nagin mapanggana sa pag-alok kan librong Revelation sa impormal na paagi sa mga paryente, kamidbid, asin kairiba sa negosyo. Ipaliwanag kun paano kamo personal na nakinabang sa buhay na mga ilustrasyon, nakatatabang na mga tsart, asin iba pang pantabang sa pagtotokdo sa libro. Puwede ining makadagka sa iba na siyasaton an libro nin Kapahayagan.
6 Pribilehiyo nanggad na magkaigwa nin kaaraman sa mga pangyayari sa ngapit arog kan ihinayag sa libro nin Kapahayagan! Bilang pinaniwalaan kan siring na kaaraman, galaga niatong ipaaram an kahulogan kan Tataramon nin Dios sa mga maghihinanyog. Mantang ginigibo niato ini, naglalaom kita na dakol pa an maiba sato sa paggibo kan kabotan kan satong Kaglalang.—Kap. 4:11.