Mga Aki—Kamo an Samong Kagayagayahan!
1 Mga aking lalaki asin babae, pamilyar daw kamo sa pagboot ni Jehova na iiba kamo sa mga aktibidad kan kongregasyon? (Deut. 31:12; Sal. 127:3) Magayagayang makataed kamo mantang kita iribang nagsasamba ki Jehova! Pinaoogma nindo an samong puso kun kamo nagtutukaw nin toninong sa mga pagtiripon asin atentong naghihinanyog. Nangorognang naoogma kami kun pinagmamaigotan nindong magkomento sa saindong sadiring mga tataramon. Naoogmang marhay an bilog na kongregasyon kun nag-aatubang kamo nin asignadong mga kabtang sa Teokratikong Paadalan sa Pagmiministro, kun galaga kamong nakikiiba sa samo sa paglilingkod sa langtad, asin kun nadadangog niamo na may kapusoan kamong nagpapatotoo sa saindong mga kaeskuela asin paratokdo.—Sal. 148:12, 13.
2 Boot niamong maaraman nindo na ipinag-oorgolyo niamo kamo kun naheheling niamo an saindong marahay na mga ugale, an saindong malinig asin aregladong itsura, an saindong malinig na gawe-gawe, asin an saindong paggalang sa mga nasa edad na. Espesyalmenteng dakula an samong kagayagayahan kun ipinaheheling nindo na ‘ginigirumdom nindo an saindong Kaharohalangkaweng Kaglalang’ paagi sa pagbugtak nin teokratikong mga pasohan para sa saindong sadiri.—Ecl. 12:1; Sal. 110:3.
3 Sabihon sa Samo an Saindong mga Pasohan: An sarong otso anyos na aking lalaki nagsabi sa sarong paraataman sa distrito: ‘Enot gusto kong magpabautismo, dangan boot kong makatabang sa kongregasyon paagi sa paglilingkod sa sound system asin pag-asikaso kan mga mikropono, pagigin attendant, pagtabang sa pag-asikaso kan mga literatura, pagbasa sa mga pag-adal sa libro asin sa mga Pag-adal sa Torrengbantayan. Dangan gusto kong magin ministeryal na lingkod, dangan magurang sa kongregasyon. Boot ko man na magin payunir asin mag-atender sa paadalan nin mga payunir. Dangan gusto kong lumaog sa Bethel, magin paraataman sa sirkito o paraataman sa distrito.’ Kanigoan karahay na pagpapahalaga an ipinaheling nia para sa pribilehio na maglingkod sa Dios!
4 Mantang nag-ooswag kamo sa pisikal asin espirituwal, naggagayagaya kaming maheling kamo na naaabot nindo an saindong mga pasohan. (Ikomparar an Lucas 2:52.) Kada taon, rinibo sa saindo an nagigin dai pa bautisadong mga parahayag dangan nakukualipikar para sa bautismo bilang nagdusay na mga lingkod ni Jehova. Nagtatalubo an samong kagayagayahan kun sa masunod maheling niamo kamong pinag-aaabot an pag-auxiliary payunir asin paglaog pa ngani sa bilog na panahon na paglilingkod. Totoo, mga aki, kamo an samong kagayagayahan asin makangangalas na gikanan nin pag-omaw sa satong langitnon na Ama. Mayaman logod kamong bendisyonan ni Jehova!—Tal. 23:24, 25.