Bomfyeni Bwino Inshita Ilyo Muli mu Mulimo wa Mwi Bala

¹ Fingi ifyo tulingile ukupwishishisha mu mulimo wa mwi bala, kabili inshita iisheleko naipipa. (Yoh. 4:35; 1 Kor. 7:29) Nga twapekanya bwino no kutantikila libela ifya kubomba, ninshi tukabomba bwino mulimo.

² Ipekanyeni: Ilyo tamulaya ku kukumana kwa mulimo wa mwi bala, mufwile ukusenda ifitabo ifyo muleya mukubomfya mu mulimo, no kupekanya bwino ifyebo ifya kuyalanda. Pa numa ye pepo lya kwisalila ukukumana kwa mulimo wa mwi bala, mwiposa nshita ukuya mu mulimo. Ukukanapoosa inshita ya kushimikila, kukalenga imwe nabo mulebomba nabo ukushimikila sana mu nshita iyo mukwete.

³ Nga ni mwe muletungulula umulimo wa mwi bala, tendekeni ukulanshanya cilya fye nshita yafika. Lanshanyeni amaminiti 10 nelyo 15, mwikokola. Ilyo tamulaeba ibumba ukusalangana, mufwile ukushininkisha ukuti bonse nabakwata aba kubomba nabo kabili nabeshiba no kwa kuyabombela.

⁴ Ilyo Muli mu Mulimo wa Mwi Bala: Ukukumana kwa mulimo wa mwi bala nga kwapwa, ilyo line fye tendekeni ukuya ku cifulo ca kubombelamo. Ilingi line kwaliba ifingi ifilenga ukuti bakasabankanya babili babombele pamo mu mulimo wa mwi bala. Ukubombela pamo kuti kwalenga balekoseleshanya no kusambilishanya. Nangu cibe fyo, mu fifulo ifingi umo tubombela kasabankanya kuti abomba sana nga ca kuti aleshimikila eka ilyo bambi nabo baleshimikila lwa mupepi. Ukubomba fweka mu mulimo wa mwi bala nga ca kuti takuli ubwafya, kuti kwalenga twashimikila abantu abengi kabili ninshi tuleikansha ica kuti nangu ku ntanshi babinda umulimo wesu uwa kushimikila ukwabuula ukwenekela, tukeshiba ifya kubomba. (Moneni Ulupungu lwa kwa Kalinda ulwa November 15, 1985, ibula 13, paragrafu 11.) Tukatantika ukubomba fweka nga ca kuti tulefwaya ukushimikila ku bantu abengi kabili twashininkisha ukuti tamuli ubusanso mu kucite fyo.—km 5/99 ibu. 7.—Umukululo wa Mepusho.

⁵ Ilyo muleya ku fipempu fya kubwelelamo, kuti mwatala mwamona bonse abali mu cifulo cimo, e lyo pa numa mwayamona abali kumbi pa kuti tamonawile nshita. Inshita shimo kuti cawama bamo ukubatumina lamya pa kuti mushininkishe nga balabapo pa ng’anda. (Amapi. 21:5) Nga ca kuti muletontonkanya ukuti mwalakokola ku cipempu cenu ica kubwelelamo, kuti mwaeba abo mulebomba nabo ukulabombela lwa mupepi nelyo kuti baya ku cipempu ca kubwelelamo cimbi.

⁶ Tuleikala mu nshita ya kulobolola ukukalamba nga nshi ukwa ku mupashi. (Mat. 9:37, 38) Mu kwangufyanya fye umulimo wa kushimikila walapwa. Kanshi tufwile ukubikako amano ku kubomfya bwino inshita yesu ilyo tuli mu mulimo wa mwi bala.