Ulupungu lwa kwa Kalinda na Loleni!—Bamagazini aba Nshita Shesu Ishe Pamfya!
1 Mu kufikilishiwa kwa busesemo bwa Baibolo, ifya kuponako fya kutenshe calo filecitika! Ilintu twalanguluka icilecitika ukutushinguluka mu calo kabili na mu kati ka kuteyanya kwa teokrasi, kuti twatesekesha ifyo cili ice pamfya ukuti tushimikile “imbila nsuma” iya Bufumu. (Marko 13:10) Ici ciletupeela umulandu wa kubomba ubutumikishi bwesu no kupimpa mu kati ka mweshi wa April.
2 Ubucindama bwa bukombe bwesu bulekomailwapo no mulimo waibela uo tukabomba uno mweshi. Mu kuba no kwenekela kwaswatuka tulepembelela ukukakulwa kwa trakiti wa Imbila ya Bufumu iyo tukananya mu kati ka April na May. Ku kukuula ukucincimuka kwesu kuli uyu mulimo pamo pene no kulundulula ubuseko mu cifulo cesu ica kubombelamo, Ulupungu lwa kwa Kalinda na Loleni! fikakwata ifipande fyalingana ne nshita ifyo fikomaila pa bucindami bwa mu busesemo ubwa fya kuponako fya mu calo ifilesakamika. Ni shani fintu twingapekanya imipeelele iyo ikacincimusha ubuseko muli bamagazini kabili nelyo fye ukulembesha?
3 Mu kumonekesha ukaba na maka ya kulundulula imipeelele ifumamo cimo pa kukonka ishi ntampulo sha kutendekelako: (1) Soobola icipande muli umo uwa bamagazini cintu uleyumfwe fyo kuti caipukisha ku bantu mu bwikashi bobe. (2) Sala ubulondoloshi nelyo ilembo lyaambulwa muli ici cipande ico ulemone fyo kuti cacincimusha ubuseko bwa kwa mwine ŋanda. (3) Pekanya imipeelele iipi iyo ilesanshamo ukuposha kwa bucibusa, icipusho nelyo ubulondoloshi ubo buleebekesha itontonkanyo lya kusekesha ilya mu Malembo, no kulaalika kwafumaluka ku kupoka bamagazini. Nge fyo wingamona, ici cili icayanguka nga nshi kabili icishapikana. Nakalimo kuti wakumana na kasabankanya umbi untu ulebomba nankwe mu butumikishi no kupekanya imipeelele.
4 Apantu “Loleni!” uwa May 8 emishe icipusho ca kuti, “Bushe Shino E Nshiku sha Kulekelesha?,” kuti wapituluka mu fyebo pe samba lya mutwe “Inshiku sha Kulekelesha” pe bula 13 mu citabo ca “Ukupelulula.” Kuti pambi watendeka pa kusoso kuti:
◼ “Tuletandala ku kulanshanya ubupilibulo bwa fya kuponako fyalulunkana ifilecitika mu calo ukutushinguluka. Moneni ifyo ici cipande cilesosa . . .”
5 “Ulupungu lwa kwa Kalinda” ulwa April 1 luleimya icipusho ca kuti: “Bushe Lishiku Ukulanda pa lwa Mipepele?” Lintu muletambika uyu magazini, kuti pambi mwasoso kuti:
◼ “Ilingi line cisoswa ukuti imipepele mutwe we lyashi umo uushilingile kulandwapo pa mulandu wa kuti walicilapo kubo wa kukansaninapo. Muletontonkanyapo shani pali ico?” Lyene losheni ku bulondoloshi mu cipande.
6 Kuti pambi ulebomfya “Ulupungu lwa kwa Kalinda” ulwa April 15 mu kuba no mutwe wa kuti “Bushe Icine ca Mipepele Kuti Casangwa?” Kuti pambi wapokelela ukwankulako kusuma kuli iyi mitendekele:
◼ “Pa mulandu wa kuti kwalibako imipepele iingi ilelo, abantu bamo balatwishika nampo nga icine ca butotelo kuti casangwa. Ici cipande cilesokolola inshila iyo imwe na ine twingasangilamo icasuko ca kwikusha kuli ici cipusho. . . .”
7 Ilyo tamulaya mu mulimo, mulandu nshi te kubala wabelesha imipeelele yobe na kasabankanya umbi pa kubeleshanya na yene? Mu kupalishako mukaba na maka ya kwakana imitubululo ya kwaafwa kuli umo no munankwe iyo ikengilishako ukubomba bwino no kukupeela ukuicetekela kukalamba.
8 Ilintu impela ya ino micitile ilepalamina, shi natubikeko umusenselo ku kwaafwa aba mitima ya bufumacumi ukufyuka muli Babiloni Mukalamba. (Ukus. 18:4) Ulupungu lwa kwa Kalinda na Loleni! babomba ulubali lwakatama muli uyu mulimo ushakatale aubwekeshiwapo. Tuletasha ukuti Yehova alitupayanishisha ifi fibombelo fishaiwamina ku kubomfya! Esha ukupokako ukulembesha kwa Ulupungu lwa kwa Kalinda uno mweshi.