Yumi Go Long Distrik Asembli 1990, “Wan Klin Lanwis”

¹ Long 1990, Distrik Asembli blong yumi i gat stampa tok ya se: “Wan Klin Lanwis.” Yumi evriwan i welkam long asembli ya. Sosaete i gat plan blong mekem wan asembli long Vanuatu. Bambae hem i stap long medel Oktomba.

² Long Sefanaea 3⁠:​9, Jeova i talemaot profet tok ya se: “Ale bambae mi givim long olgeta laen blong man wan klin lanwis— hemia wan bigfala jenis tru​—⁠blong bambae oli singaot long nem blong Jeova blong oli mekem wok blong hem tugeta.” Tisyia, asembli i talemaot mining blong “klin lanwis” ya we God i givim long yumi. Hem i save givhan long yumi blong lanem mo yusum lanwis ya. Program blong asembli bambae i soemaot long yumi se save we yumi gat long saed blong lanwis ya i save pusum yumi blong joen wanples olsem wan famle blong brata sista nomo.

³ YUMI KAM ELI: Ogenaesesen blong Jeova i singaot yumi blong kam kakae long tebel blong God. Sipos yumi kam long stret taem, yumi soemaot respek long ol samting we God i stap mekem blong yumi. Evri dei, yumi mas kam eli mo yumi save faenem wan ples blong sidaon bifo we program i stat.​—⁠1 Korin 14:40.

⁴ Ol brata we oli go long ol asembli long Polan oli sapraes tumas long ol fasin blong ol brata blong ol long ples ya. ?From wanem? From we oli fasgud long God, oli laeklaekem olgeta mo oli joengud tugeta. Ol brata ya oli glad olsem from we oli save se ol asembli blong ol bambae oli karem plante blesing long olgeta. Evri moning, oli kam eli long ol ples blong asembli, oli sidaon, mo oli rere long singsing we i openem program blong dei. Oli lesin gud long faswan prea. Taem program i finis, oli stap long ples blong olgeta nomo blong singsing mo lesin long laswan prea mo biaen oli no gobak long haos kwiktaem nomo, be oli storeyan wetem ol brata sista blong ol.

⁵ Evri haf blong asembli i gohed gud nomo from we olgeta samting oli stap long prapa ples blong olgeta nomo. I klia nomo se ol brata sista blong yumi oli kam long asembli blong lesin mo lanem samting. Nating se ren i foldaon long ol stad blong Posnan mo Korsov, be evriwan i gohed nomo blong lesin long ol tok. Ol yangfala mo ol smol-pikinini we oli stap, olgeta tu oli stap kwaet nomo, oli no mekem noes, be oli lesin gud long ol tok we i stap kamaot. Evri famle oli hivap wanples long taem ya. Oli soemaot wan gudfala rod from we oli gat bigfala respek long tebel blong Jeova. ?Be eksampol ya i save givhan long yumi olsem wanem?

⁶ Baebol i talem se yumi save folem gudfala eksampol blong ol narawan. (2 Tesalonaeka 3:7) Maet laef blong yumi i defren long ol narafala, be wan samting i sem mak nomo long evriwan, yumi go long asembli blong lanem sam samting we oli save givhan long yumi. Taem yumi kam let long ples blong asembli, plante taem yumi kros lelebet from. Blong winim trabol ya, sam famle oli putum wan stret taem blong slip long naet. Wan program olsem i mekem se ol famle ya oli slip gud long naet mo long nekis dei oli tekem rod blong asembli bifo we program i stat. Hemia i min se oli stap long ples blong asembli taem program i stat mo oli no spolem olgeta we i sidaon finis. Sipos yumi teknotis long ol advaes ya, yumi pruvum se yumi respektem Jeova mo yumi laekem ol brata sista blong yumi.

⁷ Yumi mas mekem tingting blong yumi i rere blong stap long evri haf blong asembli. Maet long taem blong asembli, yumi mas mekem sam sakrafaes mo yumi mas jenisim fasin blong yusum taem blong yumi. Samfala oli toktok wetem ol bos blong ol, blong tekem spel long taem blong asembli. Plante oli mekem evri samting i rere blong go long asembli. Samtaem oli lusum sam mane from we oli no wok, be nating oli stanap strong long disisin blong ol. Traem tingbaot ol bigfala sakrafaes we ol brata blong yumi long Polan oli mas mekem blong go long ol asembli blong ol. Jeova bambae i blesem olgeta we oli tokbaot bisnes ya wetem hem long prea mo hem i save halpem olgeta we oli wokhad blong stap long asembli.—Hibrus 10:24, 25.

⁸ YUMI MAS LESIN GUD: Long Sam 50:7, Jeova i talem se: “Yufala i lesin, bambae mi mi tok.” From samting ya nao, long taem blong asembli, yumi no mas intres long ol samting we i hapen raon long yumi, be yumi mas lesin gud long ol tok we i kamaot. Yes, sipos yumi rili wantem yusum ‘Klin lanwis ya,’ yumi mas folem ol gudfala tok we Jeova i talem long yumi long Aesea 55:2: “Yufala i mas lesin gud long mi.”

⁹ Olgeta tok we bambae oli kamaot long taem blong asembli oli blong givhan long yumi long saed blong speret. Ol tok ya oli save pusum yumi blong gohed long minista wok blong yumi mo oli save enkarajem yumi blong ona gud long ol brata blong yumi. Bambae yumi kasem sam advaes we oli stret gud long ol nid blong yumi naoia mo yumi save kasem sam help blong wokbaot wetem ogenaesesen blong Jeova tede. Sipos yumi no lesin gud, bambae yumi drif nomo. Yes, yumi mas putum tingting blong yumi i fasgud long ol tok we i kamaot mo yumi save tingbaot olsem wanem yumi save mekem ol samting we yumi lanem oli wok long laef blong yumi.— Jemes 1:25.

¹⁰ ?Sipos yumi wantem lesin gud mo rimemba ol poen we i kamaot long asembli, yumi mas mekem wanem? Bighaf blong olgeta we oli kam oltaem long ol asembli oli gat fasin blong tekem not long pepa. Taem yumi go long asembli, i tru we yumi karem oltaem Baebol mo buk blong singsing blong yumi be yumi no mas foget blong karem sam pepa blong raet long hem. Samfala oli ting se i no nid blong tekem not long pepa. Sipos yufala i gat tingting olsem, yufala i save traem rod ya long nekis asembli blong yumi, “Wan Klin Lanwis,” maet bambae yufala i luksave se hemia wan gudfala wei blong putum tingting blong yufala long ol tok we i kamaot, wan wei blong blokem tingting blong yufala i no flae olbaot.

¹¹ I no nid we yumi tekem plante plante not blong evri smolsmol samting we ol brata oli talem. Maet sam tok nomo oli naf blong mekem yumi rimemba wan poen we yumi harem. Ol elda oli ting se i moa gud sipos yumi raetem ol not blong yumi long klia fasin. Oli ting olsem from we olgeta tu oli mas tekem not blong tokbaot bakegen ol poen we i kamaot long taem asembli. Biaen, oli save yusum ol samting we oli raetem long pepa blong tij mo lukaot gud long ol sipsip.

¹² OL PREA MO OL SINGSING: Yumi givim ona long Jeova taem yumi singsing. Ol singsing we yumi mekem i go long Jeova oli wan haf blong wosip blong yumi. Jeova i glad taem hem i luk we ol man blong hem oli talemaot prea we i kamaot long hat blong olgeta. (Proveb 15:8) Ol distrik asembli oli givim jans long yumi blong joen tugeta wetem ol brata sista blong yumi mo oli pusum yumi blong leftemap nem blong Jeova tru long ol singsing mo ol prea we yumi talemaot. Be samfala oli no respektem sam haf blong wosip blong yumi. ?Oli mekem wanem i nogud? Sam oli no gat gud risen nating blong kamlet. No maet, taem program i finis, oli aot long medel blong singsing mo bifo long laswan prea blong dei. ?From wanem oli mekem olsem? Plante taem, i strong blong gat sam gud risen blong mekem olsem. ?Be long tingting blong yufala, yufala i ting se olgeta we oli no singsing, mo olgeta we oli lego ples blong olgeta blong go long trak blong olgeta, mo olgeta we i muvaot blong go moa kwik long ples blong kakae, yufala i ting se olgeta ya oli respektem tebel blong Jeova?—Matyu 6:33.

¹³ Yumi no mas tingting tumas long yumi, gogo yumi flas from. Mo yumi no mas lego ol fasin blong wol ya oli winim yumi. Yumi no mas gat fasin blong tingbaot yumi nomo no fasin blong wantem evri samting from we ol samting ya oli save blokem yumi blong gru long saed blong speret. Yumi mas traehad blong ona gud long ol tabu samting olsem ol brata blong yumi long Polan. Yumi mas wokbaot tugeta mo soemaot respek long ol samting long ol tabu samting ya blong wosip blong yumi: Ol prea mo ol singsing we yumi mekem i go long Jeova.— Sam 69:30.

¹⁴ OL KRISTIN FASIN BLONG YUMI: Olgeta fasin blong yumi long taem blong asembli oli leftemap nem blong yumi olsem Wetnes blong Jeova. Yes, yumi rili tinghae long wosip we yumi givim long Jeova mo yumi no tingbaot ol asembli olsem sam gudtaem we yumi spenem wetem ol fren blong yumi. Taem yumi kam wanples blong sam spesel kakae long saed blong speret, yumi mas tinghae long Kristin fasin blong yumi mo yumi mas soemaot gudfala tingting from we yumi minista blong God.—1 Korin 10:31-33.

¹⁵ Be sore tumas from we samfala we oli go long asembli oli no lukaot gud long tingting, long klos, long ol toktok mo long ol fasin blong olgeta. ?Be yumi save mekem wanem sipos yumi luksave se wan long kongregesen no wan long asembli i mekem olsem? Olgeta we oli naf long saed blong speret oli save givim sam advaes long hem wetem gudfala fasin blong stretem rod blong hem. (Galesia 6:1; Efesas 4:11, 12) Yumi toktok long klin lanwis taswe yumi mas traehad blong blokem olgeta we oli traem spolem gudnem blong yumi mo ol nambawan rul blong Jeova.

¹⁶ Wan man we i kam long wan asembli i raetem ol tok ya, nao hem i sakem pepa ya long bokis blong ol presen mane: “Mi mi laekem tumas asembli ya mo mi mi tekem disisin blong stadi Baebol wetem wan wetnes. Hemia faswan taem we mi kam long wan miting blong yufala. Mi mekem plan blong kam long Sarede nomo from we long Sande mi mi go long jyos blong mi. Be mi mi sapraes tumas, taswe tede mi mi kambak wetem ful famle blong mi. Be mi harem nogud tu from we sam bigman oli stap toktok tumas taem ol brata oli mekem tok long platfom.”

¹⁷ OL PAPA MAMA: Ol smol-pikinini mo ol yangfala oli welkam nomo long taem blong ol distrik asembli blong yumi: “Wan Klin Lanwis.” Olgeta tu oli mas save olsem wanem blong yusum klin lanwis ya. Yumi glad tumas taem yumi luk we sam yangfala oli tinghae long ol tok we i kamaot long taem blong asembli mo oli lesin gud long ol tok ya. (Sam 148:12, 13) Sipos ol papa mama oli soemaot gud rod mo oli lukaot gud long ol pikinini blong olgeta, bambae ol pikinini oli gat gud fasin long taem blong asembli. Plante pikinini oli gat fasin blong tekem not long taem blong asembli. Ol papa mo mama, sipos yufala i no lanem yet long ol pikinini blong yufala blong tekem not long taem blong asembli, ?From wanem yufala i no mekem olsem naoia? Yufala i save leftemap tingting blong ol smol-pikinini blong yufala blong oli raetemdaon sam vas blong Baebol we ol brata we i mekem tok i talemaot, mo oli save raetem sam stampa tok we oli harem. Sam papa mama oli mekem plan blong tokbaot bakegen long ol poen we i kamaot long evri dei blong asembli. Oli mekem olsem taem oli gobak long ples blong olgeta, no taem oli satp long haos.

¹⁸ I tru we fulap papa mama oli save se ol pikinini blong olgeta oli muvmuv olbaot. Maet oli ting se oli no save wan samting mo oli no bigwan naf. From samting ya nao, oli mas lanem gud long ol pikinini olsem wanem blong lesin gud mo olsem wanem long ol fasin blong olgeta long taem blong miting. Ol papa mama oli mas wajem gud olgeta. Samfala oli no mekem olsem. Samtaem, long taem blong ol prea, ol papa mama oli soemaot respek blong olgeta long prea, be ol pikinini blong olgeta oli pleiplei mo oli pulum ae blong ol narafala man we i stap. Ol papa mama oli mas save gud wanem samting ol pikinini blong olgeta oli stap mekem long taem blong ol prea tu. Oli mas save wanem samting ol pikinini blong olgeta oli stap mekem taem olgeta oli lego ples blong olgeta long taem blong wan tok. Oli mas wajem ol pikinini long taem blong miting no afta.​—⁠Proveb 29⁠:⁠15.

¹⁹ Ol pikinini we oli pleiplei olbaot oli no soemaot respek nating long sam wetnes we oli moa olfala long olgeta, nating se olgeta ya oli traem stretem olgeta long kwaet fasin. Fasin blong pikinini blong pleiplei olbaot olsem i kamaot plante taem from we insaed long famle, papa mo mama i no stretem pikinini. I klia nomo se papa mo mama i mas stretem fasin olsem. Evri Kristin papa mo mama oli mas lukaot gud long ol pikinini blong olgeta oltaem, blong “stretem mo tijim olgeta long ol loa blong Jeova.”​—⁠Efesas 6:4.

²⁰ YUMI JOENGUD WETEM OL BRATA WE i LUKAOT LONG ASEMBLI: Wan bigfala wok i bin gohed blong mekem se i gat naf ples, buk, kakae mo sam narafala samting blong evri man we i kam long asembli. Yumi mas joengud wetem ol brata we oli lukaot blong welkamem yumi. Olsem nao i save naf jea blong evriwan. Yumi no mas foget se YUMI MAS BLOKEM SAM JEA BLONG YUMI NOMO, MO BLONG OLGETA WE OLI KAM WETEM YUMI INSAED LONG TRAK. Yumi no mas blokem sam jea blong sam narawan. Samfala oli blokem sam jea nating se oli no wet long wan man. Fasin olsem i no stret from yumi no soemaot lav, mo i mekem hadwok long ol brata we oli welkamem ol nyuwan. Taswe, olsem Baebol i talem, yumi mas soemaot fasin kaengud long ol brata blong yumi mo yumi mas joen gud wetem ol brata we oli welkamem yumi.​—⁠1 Korin 13:5; Filipae 2:4; 2 Pita 1:5-8.

²¹ Yumi save yusum sam kamera blong video no sam kaset long ol ples blong asembli. Be olgeta we oli yusum ol masin ya oli no mas blokem ol man, mo oli no mas pulum ae blong ol narawan. Yumi no mas yusum lektrik blong ples we asembli i stap long hem no long ples we oli mekem myusek blong asembli. Yumi no mas yusum ol kamera we oli gat flas (laet) long hem from we flas i mekem man i sek mo i tanem tingting blong man from ol tok we i stap kamaot long platfom. Sipos wan brata blong welkam i kam givim wan smol advaes long yumi, yumi mas folem advaes ya we hem i givim long yumi. Ol brata we i lukaot long welkam mo ol narafala brata we i lukaot long asembli oli gat wok blong mekem se evriwan i folem ol advaes ya. Taswe olgeta ya oli glad tumas sipos ol man we i yusum olkaen masin olsem oli folem ol advaes we oli givim long ol.

²² Ol man blong Jeova oli glad tumas blong kam hivap wanples evri yia. Oli wantem lesin long nambawan program long saed blong speret. Yumi glad tumas blong luk olgeta haf mo olgeta wok we olgeta brata oli mekem blong asembli i ron gud. Sosaete i wokhad mo i spenem plante taem mo mane blong mekem se evriwan oli sidaon gud. Hem i yusum ol nyufala teknik blong myusek we oli sas mo hem i putumap plante narafala haf we i mekem asembli i gohed gud mo evriwan i glad long hem.

²³ Olgeta mane ya we Sosaete i spenem oli kam from ol presen mane we evri yia yumi mekem i go long Sosaete. Yumi save putum sam mane long ol bokis blong presen mane we oli stap long stret ples blong olgeta long taem blong asembli. Sosaete i glad tumas blong kasem mane we yufala i sanem i go long hem mo wantaem moa hem i talem tankyu long yufala from we yufala i sapotem hem blong mekem ol wok blong Kingdom oli gohed gud. Yes, i klia nomo se bambae yumi joengud long evri rod.​—⁠Luk 6:38.

²⁴ YUMI GO LONG DISTRIK ASEMBLI, “WAN KLIN LANWIS”: Sipos yumi go long Distrik Asembli “Wan Klin Lanwis,” mo yumi lesin gud long ol tok we i kamaot, bambae yumi save from wanem Jeova i givim klin lanwis ya long yumi mo from wanem yumi mas lukaot gud long ol nogud fasin we oli save mekem yumi i seraot. Taswe, stat long naoia, yumi save mekem plan blong go long asembli, blong stap long faswan singsing mo evri miting, go kasem laswan prea we i kamaot long Sandei aftenun.