?Olsem Wanem Indeks i Save Givhan Long Famle?
1 Fas Timote 5:4 (NW) i tokbaot ol memba blong ol famle, i se: “Fastaem olgeta oli mas lanem blong soemaot fasin fasgud long God insaed long famle blong olgeta nomo.” Tru ya, blong wokem fasin fasgud long God insaed long famle, hemia wan samting we yumi mas lanem. Ol kristin oli mas lukaot gud long ol memba blong famle. Taswe yumi nidim help blong God. Ol Indeks Blong Ol Buk Blong Watch Tower Sosaete oli save givhan long yumi blong faenemaot olsem wanem blong stretem plante samting we oli kamaot long famle.
2 Taem wan man mo wan woman tufala i mared, wan nyufala famle i stat. (Jen. 2:24) ?Yu yu wantem mared? ?Yu yu stap tinghevi long samting ya? Long bigfala haf ya “Mared,” bambae yu faenem wan smol haf: “?Olsem wanem blong jusum hasban no waef?” Long haf ya, ol refrens oli givim sam gudfala advaes long disisin ya we samtaem i no isi blong mekem. Mo tu, Indeks i talemaot sam stampa poen long ol smol haf ya “wok blong hasban” mo “wok blong waef.” Tufala haf ya i gat fulap refrens we oli givhan long olgeta we oli wantem mared mo olgeta we oli mared finis. Mo tu, ol save insaed long ol smol haf ya “toktok tugeta,” “fasin joen gud long mared,” mo “pis,” oli save givhan long yumi blong mekem mared i moa hapi. Taem trabol i kamaot, smol haf ya “ol trabol long mared” i save lidim yu blong faenemaot olsem wanem blong stretem trabol ya.
3 Ol pikinini oli wan presen we Jeova i givim. (Sam 127:3) ?Olsem wanem ol papa mama oli save ‘stretem mo tijim ol pikinini blong olgeta long ol rod blong Jeova’? (Efes. 6:4) Jeova i yusum Tok blong hem mo slef we i stret mo waes blong givim advaes we i save lidim yumi. Samting ya i impoten tumas. Ol papa mama oli mas traem luksave ol filing mo nid blong ol pikinini blong olgeta. Ol haf blong Indeks long “Ol Pikinini” mo “Ol Yangfala,” oli save givim gudfala advaes mo save we i givhan long ol papa mama. ?Olsem wanem blong putum ol loa blong Jeova oli stap gud long hat blong ol yangfala blong olgeta? Haf ya “Trenem Pikinini” i save givhan long ol papa mama blong storeyan tugeta long evri haf blong wok blong trenem ol pikinini. Mo hem i givim advaes olsem wanem blong givhan long ol pikinini, blong olgeta wanwan oli save frengud wetem Jeova mo laekem trutok.—1 Pita 2:2.
4 Blong famle i joen gud, oli mas makemaot taem blong storeyan gud tugeta long Baebol. (Dut. 6:6-9; Aes. 54:13; Efes. 5:25, 26) Haf ya “Ol Famle” i givim sam gudfala advaes olsem wanem famle i save harem gud long ol storeyan blong olgeta. Long laswan Indeks, smol haf ya “Baebol stadi” i gat sam gudfala advaes long ol poen ya: “?Olsem wanem blong mekem i gud?” “?Olsem wanem blong harem gud long hem?” mo “?Olsem wanem blong pulum olgeta long famle oli intres long hem?” Mo tu, samtaem i gud we famle i storeyan long ol store blong laef blong sam Wetnes blong Jeova we oli kamaot long ol magasin. Long haf ya “Fultaem Minista Wok,” yu save faenem ol magasin we oli talemaot ol laef store. Sam long olgeta store ya oli olsem: “Neva Mi Mi Sore We Mi Jusum Rod Ya” mo “Mi Mi Kasem Ol Samting We Hat Blong Mi i Wantem.” Sam narafala store oli stap long haf ya “Ol Misinari.” Wan bigfala lis i stap long haf ya “Ol Laef Store Blong Ol Wetnes Blong Jeova.”
5 Ol Indeks Blong Ol Buk Blong Watch Tower Sosaete oli nambawan blong faenemaot ol advaes mo save long saed blong famle laef. Oli save givhan long yu blong harem gud tumas long ol wok blong yu insaed long famle.