Talemaot Nem Mo Ol Wok Blong Jeova
1 “!Yumi talem tangkiu long Hae God! !Yumi talemaot hae nem blong hem! Yumi go long olgeta man blong ol narafala kantri, yumi talemaot ol samting ya we hem i bin mekem. . . . Yumi evriwan ya we yumi stap mekem wosip long hem, yumi mas glad.” (Sam 105:1, 3) Man we i raetem Sam ya i faenem glad taem hem i talemaot nem blong Jeova mo ol “samting ya we hem i bin mekem.” ?Wanem ol samting ya we God i bin mekem? I sua se hemia olgeta samting we oli laenap wetem nambawan rul blong Kingdom blong God mo “gud nius ya we hem i sevem [ol man].”—Sam 96:2, 3; 145:11, 12.
2 Naoia we yumi stap kam klosap long Memoriol blong 2001, yumi gat plante risen blong glad long ol samting ya we God i bin mekem blong yumi. ?From wanem? I klia nomo se Lodsapa i wan taem blong yia we i spesel long tingting blong olgeta trufala Kristin. I no gat wan narafala lafet we i impoten tumas olsem hemia, mo i no gat wan narafala lafet we gat bigfala mining biaen long hem, mo fasin blong mekem lafet ya i defren long eni narafala lafet. Hemia wan taem blong yumi evriwan i rimemba wanem we Jeova mo Jisas tufala i bin mekem blong ol man oli save kasem sef. !Taswe, long ol manis we i klosap long Memoriol, yumi wantem gohed moa long wok blong prij, nao bambae ol man oli save long ‘gud nius ya we i sevem ol man’!
3 ?Bambae Yu Yu Mekem Wok Blong Haftaem Paenia? Long Eprel las yia, wan bigfala namba blong 41 brata sista oli mekem wok blong haftaem paenia. ?Olsem wanem long yia ya? ?Yumi save putum Maj mo Eprel olsem ol spesel manis blong mekem moa long wok blong prij? Long manis Maj i gat faef Sarede, mo long Eprel i gat faef Sande. Plante pablisa we oli wok fultaem, oli faenem se oli save mekem wok blong haftaem paenia sipos oli mekem plan blong yusum ol wiken blong prij moa. Blong kasem 50 aoa long wan manis, wan haftaem paenia i mas mekem raonabaot 12 aoa evri wik. Skelemgud ol defren program we oli stap long bokis long pej 4, mo luk sipos wan long ol program ya i stret long yu. Sipos no, maet yu save mekem prapa program blong yu blong joen long wok blong haftaem paenia long manis Maj mo Eprel.
4 Ol elda oli mas stat naoia blong pulum tingting blong evriwan blong wantem mekem moa long wok blong prij. !Long wan kongregesen las yia, olgeta elda mo man blong givhan oli joen long wok blong haftaem paenia, mekem se long olgeta 121 pablisa, i gat 64 we oli paenia long manis Eprel! Mo tu, long kongregesen ya, oli glad blong luk sikis niufala pablisa oli stat prij long manis Maj mo Eprel. Yes, hemia wan gudfala taem long ol pikinini mo ol niuwan blong askem ol elda sipos oli save stat blong joen long wok blong prij.
5 Traehad i Karem Blesing: Ol kongregesen we oli putum sam mak mo we oli traehad blong kasem ol mak ya, bambae oli kasem plante blesing. Maet sam kongregesen oli traem kavremap ol teritori we oli no wok long hem plante taem. No maet oli traem yusum ol defren rod blong prij, olsem telefon—wan rod we naoia i givhan bigwan blong kasem olgeta we oli no stap long haos mo ol man we yumi no save go kasem haos blong olgeta‹
6 ?Sipos helt blong yu i nogud no yu olfala, i stret blong tingting se bambae yu no save mekem plante long wok blong prij? Hemia i no tingting blong wan olfala sista blong 86 yia we i gat kansa. Nating se ol leg blong hem oli solap, hem i mekem wok blong haftaem paenia long Eprel las yia. Hem i yusum telefon blong prij long ol man, mo long rod ya hem i save joen moa long wok blong prij blong presem Jeova. Samting ya i pulum hem mo ol brata sista long kongregesen blong wantem mekem moa.
7 Reregud From Memoriol: Long yia ya, Memoriol i stap long Eprel 8. From we hem i long wan Sande, plante moa man bambae oli save kam. Maet yumi save kasem wan namba we i bigwan moa bitim ol taem bifo, sipos yumi wanwan i (1) traehad blong stap long miting ya mo (2) singaot ol narafala blong joen wetem yumi long Memoriol ya. ?Hu olgeta we yumi mas invaetem?
8 Jekemap olgeta pepa blong visit we yu gat mo traem faenem sam long olgeta we oli bin soem intres long trutok, nating se yu no bin visitim olgeta plante taem. Tu no tri wik bifo long Memoriol, traehad blong visitim olgeta ya mo invaetem olgeta oli kam long Memoriol. Sipos yu naf, mekem plan blong tekem olgeta we oli wantem, oli kam wetem yu long miting ya.
9 Long sam kongregesen, ol brata sista oli no yusum evri pepa blong singaot man i kam long Memoriol. Ol sekretari blong ol kongregesen oli mas meksua se ol pepa ya oli kam sam wik bifo long miting ya blong bambae ol brata sista oli gat taem blong givimaot. Maet yu wan yu wantem raetem klia no taepem, stret taem mo ples blong Memoriol ya, biaen long pepa ya. No maet yu wantem joenem pepa ya wetem narafala pepa we i soem ples we Haos Kingdom i stap long hem, sipos Memoriol bambae i stap long ples ya. I gud yumi rimemba se, plante taem, i moagud yumi wanwan i givim pepa blong Memoriol i go stret long han blong man we yumi wantem invaetem.
10 Tingbaot Olgeta We Oli No Moa Prij: Yumi glad tumas taem wan Baebol studen i givim laef blong hem i go long Jeova mo i tekem baptaes. Be, evri yia, i gat sam long medel blong yumi we oli no moa joen wetem yumi, mo oli no moa talemaot nem mo ol wok blong Jeova long narafala. I stret blong wari long saed blong olgeta ya. I tru se, plante long olgeta we oli no moa joen wetem yumi oli no sakemaot trutok. Be, maet oli no moa prij from we tingting blong olgeta i foldaon, oli gat sam problem, no sam narafala wari blong laef. (Mat. 13:20-22) Olgeta we oli slak long saed blong spirit oli nidim help kwiktaem blong kambak long kongregesen bifo we wol blong Setan i solemdaon olgeta. (1 Pita 5:8) Long ol manis ya bifo long Memoriol, yumi save mekem spesel traehad blong givhan long olgeta ya we oli slak, blong oli kambak bakegen mo joen long wok blong talemaot gud nius.
11 Sekretari blong kongregesen i mas talem long ol brata we oli lukaot long ol buk stadi sipos i gat wan brata no sista long grup blong olgeta we i no moa prij. Sevis Komiti Blong Kongregesen bambae i mekem plan blong ol elda oli visitim olgeta ya. Sipos oli nidim blong stadi Baebol bakegen, elda we i lukaot long wok blong prij bambae i storian wetem ol narafala memba blong sevis komiti mo biaen hem bambae i jusum wan brata no wan sista we i naf blong mekem stadi wetem olgeta. Nating se stadi bambae i no gohed longtaem, be brata no sista we i lukaot long stadi ya bambae i mas putum ripot blong aoa, visit, mo stadi.
12 Long Eprel las yia, wan sista we i stap prij long ol haos wanwan i mitim wan yangfala man long rod mo i givim sam magasin long hem. Man ya i talem se woman blong hem i wan Witnes blong Jeova be hem i no moa joen wetem ol Witnes longtaem. Man ya i askem ples we Haos Kingdom i stap long hem mo i askem sista ya blong visitim hem mo woman blong hem. From samting ya, man ya wetem woman blong hem tufala i kam long nekis miting mo tufala i agri blong stadi Baebol.
13 !Rere Blong Mekem Moa Wok! Man blong raetem Sam, we i talem se yumi mas talemaot nem blong Jeova mo ol wok blong hem, i gohed se: “Yumi sing, yumi presem hem. Yumi talemaot ol bigbigfala samting ya we hem i bin mekem. . . . Yumi mas glad, from we tabu nem blong hem i stap long yumi.” (Sam 105:2, 3) I gud yumi soemaot se tingting blong yumi i strong blong talemaot tabu nem blong Jeova mo olgeta “bigbigfala” wok blong hem. !Yumi save mekem olsem sipos yumi traehad blong joen moa long wok blong prij, blong mekem se ol manis ya raonabaot long Memoriol oli nambawan moa i bitim ol narafala manis!
[Tok blong pija long pej 4]
Sam Rod Blong Traem Kasem 12 Aoa Evri Wik Long Wok Blong Haftaem Paenia
(Lukluk niuspepa)