Ansa Long Wan Kwestin

◼ ?Bambae yumi mekem olsem wanem sipos wan man blong haos i talem se ol Wetnes blong Jeova oli mas no moa visitim haos blong hem?

Sipos yumi luk wan saen long doa we i talem strong se i tabu blong wan skul no sipos i talem stret se Ol Wetnes blong Jeova oli no save go insaed, i gud blong respektem wanem man blong haos i wantem mo no noknok long doa blong hem.

Samtaem yumi luk wan saen we i talem tabu long wan man blong salem samting no wan man blong askem presen mane. From we yumi stap mekem wan wok blong skul blong givhan long ol man, rul ya i no blong yumi. I gud blong gohed mo noknok long doa. Sipos man blong haos i no wantem, long kwaet fasin yumi save eksplenem from wanem yumi ting se ol saen olsem oli no blong yumi. Sipos man blong haos i talem klia se tabu ya i blong ol Wetnes blong Jeova tu, bambae yumi respektem wanem hem i wantem.

Samtaem taem yumi go long haos blong wan man, yumi luksave se man blong haos ya i harem nogud mo hem i talem strong long yumi se yumi no save go long haos blong hem bakegen. Yumi mas folem toktok ya. Yumi mas raetem wan not wetem det long hem mo putum long envlop blong teritori blong mekem se ol pablisa we oli wok long teritori ya long fyuja bambae oli no go long haos ya.

Be, yumi mas holem long tingting blong yumi se ol haos olsem oli no tabu blong olwe. Maet man we i stap long hem naoia bambae i aot. Ating yumi save toktok wetem wan nara famle we i glad blong lesin. I save gat jans tu se hat blong man blong haos we yumi bin toktok wetem hem bambae i jenis mo hem i save agri blong luk yumi long haos blong hem. Ale, afta taem i pas, wetem kwaet fasin yumi save askem olsem wanem naoia long filing blong ol man we oli stap long haos ya.

Oli mas jekem fael blong ol teritori evri yia, mekem wan lis blong ol haos we oli bin advaesem yumi blong no go long olgeta. Aninit long oda blong elda we i lukaot long wok blong prij, askem sam pablisa we oli gat waes fasin mo ekspiryens blong visitim ol haos ya bakegen. Oli save eksplenem se oli kam blong luk sipos sem man i stap long ples ya yet. Ol pablisa oli mas savegud ol tingting we oli stap long Reasoning buk, pej 15-24, we stampa blong hem se “How You Might Respond to Potential Conversation Stoppers” (?Olsem Wanem Yu Save Ansa Long Ol Tok We Man i Talem Blong Blokem Yumi?). Sipos man i glad, yumi save yusum sem rod blong mekem sam visit bakegen long fyuja. Sipos man blong haos i gohed blong no laekem, yumi no mas gobak long hem bakegen gogo kasem nekisfala yia. Lokol bodi blong ol elda oli save jusum sipos long wan taem olsem i gud blong mekem wok long wan defren rod.