Joenem Ol Fastok Blong Yumi Wetem Ol Buk
1 Taem yu stap mekemrere ol toktok we bambae yumi talem long wok blong prij long manis ya, fastaem traem luksave wanem trabol ol man long teritori blong yufala oli stap kasem mo afta lukaotem sam poen long ol nyufala magasin mo buklet we oli tokbaot ol trabol ya, mo ol vas blong Baebol we oli givim ansa long ol trabol ya.
2 Long sam ples, plante man oli tingting tumas from oli no gat wok mo laef i sas tumas. Sipos yu luksave trabol ya, yu save tokbaot hem long fastok blong yu.
Yu save talem se:
◼ “Mifala i stap toktok long olgeta man raonabaot long mifala blong luk wanem samting i save mekem se i gat naf wok mo haos blong evriwan. Yu ting se i stret blong bilivim se gavman blong man bambae i save mekem samting ya? [Letem man blong haos i ansa.] I gat wan man we i save olsem wanem blong winim olgeta trabol ya. Makemgud gudfala promes ya long Aesea 65: 21-23. [Ridim.] Man we i Wokem yumi i mekem se oli raetemdaon promes ya blong leftemap tingting blong yumi, mo yumi evriwan yumi nidim samting ya long taem ya we i had tumas, a?”—rs, pej 11.
3 Nao yu save tokbaot sam poen we oli kamaot long ol nyufala magasin no long wan buklet. Sipos yu stap long wok blong seremaot magasin, yu save jusum sam poen we i stap long haf ya “!Hop We i Winim Tingting We i Foldaon!” we i kamaot long Julae 1 Wajtaoa. Sipos yu stap seremaot buklet ya “Look!” yu save soem olsem wanem ol man oli save gat haos mo wok blong olgeta olsem we pija long fas pej mo las pej blong buklet ya i soemaot. Yu save openem blong man blong haos i luk fulwan pija we i stap long hem.
4 Long teritori we ol man oli gat defren kaen wari long laef, yu save jenisim fastok blong yu blong givhan long olgeta. Ating yu wantem traem namba tu fastok we i stap long Reasoning buk aninit long tok ya “Kingdom.”
Yu save talem se:
◼ “Jisas i tijim yumi blong prea blong Kingdom blong God i kam mo blong wil blong Hem i kamaot long wol olsem we i kamaot finis long heven. ?Yu ting se sipos wil blong God i kamaot long ples ya, wol bambae i kam paradaes?” Afta we man blong haos i givim ansa, ridim Revelesen 21:3-5.
Nao sipos yu stap seremaot buklet ya Gavman, yu save ridim fas haf we i stap long pej 3. Makem tok ya: “I no longtaem God bambae i yusum Kingdom ya blong finisim ol faet, ol fasin we man i sot long kakae, ol sik, ol fasin blong kilim no rabem man.” Askem man blong haos weswan long ol trabol ya we hem i ting se i bigwan moa.
Sipos yu stap seremaot Julae 15 “Wajtaoa,” yu save talem se:
◼ “Plante man oli wantem bilivim se ol promes ya bambae oli kamtru, be oli no sua sipos Baebol i tru no nogat. Mi sua se haf ya, ‘?Baebol Hem i Stap Agensem Hem Wan?,’ bambae i mekem bilif blong yu i kam strong moa.”
5 Ol yangfala tu oli save talemaot Kingdom, long ol man we oli bigman finis.
Taem oli yusum Aesea 65:21-23, ol yangfala pablisa oli save talem se:
◼ “Mi save se from we yu yu bigman finis yu gat moa ekspiryens long laef bitim mi, be vas ya blong Baebol i save mekem yumi evriwan i haremgud.”
6 Mekem sua se yu makem olgeta buk we yu seremaot, mo makem nem blong ol buklet mo magasin we yu seremaot. Bambae yu nidim olgeta samting ya taem yu gobak bakegen blong mekem intres blong man ya i gru moa.