Storeyan We i Wekemap Intres
1 Oltaem yumi mas soem kaen fasin mo intres long ol man we yumi faenem long wok blong prij. Fasin blong askem tingting blong olgeta long ol defren samting i soem se yumi respektem tingting blong olgeta. Samting we yumi tokbaot mo kwestin we yumi askem maet oli save wekemap tingting blong olgeta mo pulum olgeta blong wantem lanem moa long saed blong God mo plan blong hem long ol man.
2 Long Septemba bambae yumi pulum tingting blong man i go long trutok se God i wokem olgeta samting, taem yumi seremaot buk ya Life —How Did It Get Here? By Evolution or by Creation? Tekem taem blong luk bakegen buk ya yu wan, mo jusum sam poen we yu wantem soemaot. Taem yu tokbaot save we i stap long Creation buk, openem mo givim long man blong haos. Soem sam stampa poen mo sam pija we yu jusum finis long buk ya. Yu mas glad taem yu soemaot olsem wanem buk ya i naes tumas mo i save givhan long hem.
3 Afta we yu talem nem blong yu, yu save talem se:
◼ “Long taem blong yumi tede we wol i fulap long save long saed long sayens, ?i stret blong bilif se i gat wan God we i wokem yumi mo naesfala wol ya we yumi stap laef long hem? [Letem man i ansa.] Taem yumi luk olsem wanem graon ya i bigwan mo i gat plante samting blong sapraes oli stap long hem, yumi sapraes long oda mo plan blong hem. ?Samting ya i no soem pruf se i gat wan Man i stap we i Wokem olgeta samting? Makem wanem Baebol i talem long bisnes ya. [Ridim Hibrus 3:4.] I tru, evri haos i gat wan man we i mekem plan blong hem mo hem i wokem hem. [Tekemaot Creation buk mo openem i go long pija long pej 114.] !Skae mo wol oli bigwan tumas oli samting blong sapraes nomo! ?Yu ting se oli save kamaot olgeta nomo?” Openem buk i go long pej 122 mo ridim smol tok we i stap aninit long pija blong wan hanwaj. Pija mo vas we oli stap long pej 127 oli gud blong yusum tu. Yu save faenem sam poen blong givhan long yu long Reasoning buk pej 84-88 (F. 72-76).
4 No yu save talem se:
◼ “?Yu ting se wanem samting nao ol man oli nidim blong faenem tru pis mo gladtaem long wol? [Letem man i ansa.] Baebol i talem se yumi mas fraet long God mo luksave hem olsem Wan we i Wokem heven mo wol.” Ridim Revelesen 14:7, mo openem Creation buk long pej 140 mo 141, ridim haf 24 mo 25, we i eksplenem se oli wokem wol blong ol man oli laef long hem. Afta, yu save openem i go long japta 19 mo eksplenem se wol ya bambae i kam paradaes i no longtaem.
5 Sipos man blong haos i soem se hem i no rili sua sipos i gat Wan we i Wokem olgeta samting, yu save talem se:
◼ “Plante man oli gat semkaen tingting olsem yu, antap moa taem oli luk ol trabol we oli stap kamaot long wol. ?Sipos i gat wan God, from wanem hem i letem ol trabol oli stap? ?Yu ting se i gat wan stret ansa blong ol samting ya? I dipen long ansa we man i givim, maet yu save gohed blong yusum japta 16 blong Creation buk blong mekem storeyan i gohed. No sipos hem i lesin be hem i no intres tumas, yu save talem wan no tu poen nomo long haf ya “?From Wanem Ol Gudfala Man Oli Safa?” long Wajtaoa blong Septemba 15, 1992. Blong givhan long yu moa blong givim ansa long kwestin ya, yu save faenem sam poen long Reasoning buk pej 399-400 (F. 381). Maet samtaem i gud blong livim traket ya ?From Wanem Yu Save Bilif Long Baebol?
6 Mak blong yumi i no blong wekemap intres blong man nomo long tok blong Kingdom be blong statem ol Baebol stadi tu. !Yumi glad tumas blong gat wan naesfala buk olsem wetem ol pija long hem we i talemaot klia trutok long saed blong ol samting we God i givim mo i ona long Bigfala Man ya we i wokem yumi! I gud blong yumi yusumgud buk ya blong wekemap intres blong ol man we hat blong olgeta i stret we bambae yumi mitim olgeta long Septemba.