Talemaot Rod Blong Pis Mo Seftaem Blong God
1 Ol man oli mekem plante rod blong putum pis mo seftaem, be i no gat wan long ol rod ya we i stret long nid blong olgeta man long wol. Nating se fasin blong no laekem man from skul, kala, mo kantri blong olgeta, wetem fasin nogud blong politik mo fasin blong tingbaot hem wan, oli stap blokem pis mo seftaem be ol trufala Kristin oli save se stampa blong samting ya, hem i devel Setan mo fasin ya we man i no wantem stap aninit long Jeova.—Sam 127:1; Jer. 8:9; 1 Jon 5:19.
2 Long Janewari, bambae yumi traehad blong halpem ol man blong luk save se rod blong God blong putum pis mo seftaem i wan rod ya nomo mo Jeova i gat trufala ansa long ol trabol blong man.
3 Yusum Ol Nyufala Traket: Yumi save talemaot mesej ya we i save leftemap tingting blong man taem yumi yusum ol nyufala traket we yumi kasem long distrik asembli blong yumi “Ol Man Blong Karem Laet.” Wan smol pleplei i save soemaot olsem wanem blong yusum traket N° 19, ?Wol Ya Bambae i Lus?, blong statem storeyan we i lid i go long wan Baebol stadi. Ol profet tok blong Jisas long saed blong en blong wol i mas pulum tingting long ol man.
4 Plante milyan man tede tingting blong olgeta i foldaon, mo oli stap luk long wan taem blong haremgud we i gat tru pis, seftaem mo fasin kwaet. (Traket N° 20) Help Blong Olgeta We Tingting Blong Olgeta i Foldaon (Comfort for the Depressed) i save leftemap tingting blong plante man.
5 Traket N° 21, Mekem Laef Blong Famle i Glad, i givim advaes we ol man oli save folem blong mekem laef blong famle i kamgud moa, nating se naoia oli stap wet long naesfala fyuja long nyufala wol blong God.
6 Traket N° 22 i givim sam stret ansa long kwestin ya ?Hu i Stap Rulum Wol? Hem i eksplenem from wanem ol man oli bin yusum ol fasin we oli nogud olgeta blong spolem ol narafala man nating se plante man oli wantem laef long pis mo seftaem. I gat ol rabis speret long ol ples long heven, mo nambawan trik blong Setan, i blong pulum plante man blong bilif se hem mo ol rabis enjel blong hem oli no rili stap.
7 Statem Ol Baebol Stadi: Yu save statem wan Baebol stadi wetem wan traket, wan buklet, wan magasin, no wan buk. Sipos yu save se man blong haos i gat wan buk finis, soemaot long hem olsem wanem yu save yusum long wan Baebol stadi. Ol nyufala traket mo nyufala buklet ya ?God i Rili Kea Long Yumi? oli gudfala tul blong yusum blong statem ol storeyan. Yu save seremaot ol narafala buklet tu we Sosaeti i prentem.
8 Trufala seftaem i save kam nomo tru long Wan we Wokem yumi, Jeova God. Yumi wantem halpem plante man blong oli openem hat mo tingting blong olgeta long trutok blong Tok blong God mo kasem hop we i save givim long yumi. I gud blong yumi yusum ol tul we yumi gat blong prij mo talemaot ol rod blong God blong putum pis mo seftaem.—Aes. 2:3, 4.