Lukaotgud Long Intres We Yumi Faenem
1 Taem yumi seremaot ol magasin mo ol narafala tiokratik buk, yumi stap mekem mesej we Jisas Kraes i bin talemaot i goaot. Yumi mas traehad blong mekem visit bakegen long evriwan we oli soem intres.
2 Sipos yu tokbaot wan bigfala poen long wan haf long Wekap! we man blong haos i intres long hem, gohed blong tokbaot sam poen long haf ya taem yu gobak. Mekem storeyan blong yu i stanap long wan ki vas mo maet long wan no tu paragraf. Sipos man ya i intres moa, soem long hem se Wekap! i save halpem ful famle. Ol wanwan namba oli tokbaot ol defren poen, olsem ol samting raonabaot long yumi, olsem wanem yumi wanwan i save kamgud moa long sam samting, olsem wanem blong winim ol trabol blong tede, mo sam kwestin long saed blong ol yangfala.
3 ?Olsem wanem sipos man blong haos i no intres long wan long ol poen we oli stap long nyufala Wekap! ya we i jes kamaot? I nogud blong stopem storeyan long ples ya. Maet yu save yusumgud jans ya blong tijim man blong haos long saed blong wok blong ol Wetnes blong Jeova taem yu yusum ol tok we oli stap long pej 206 (F. 400) long Reasoning buk.
4 Sipos long las visit yu bin livim wan namba blong “Wajtaoa” taem yu yusum 2 Timote 3:1-5 mo tokbaot ol bigfala poen long pej 2 blong magasin, taem yu gobak maet yu save talem wan samting olsem:
◼ “Long las storeyan blong yumitu, yumi tokbaot mining blong ol samting we oli stap hapen raon long yumi long wol tede. I luk olsem se plante man oli no moa intres long God mo long fasin blong laef we Baebol i tokbaot. Samting ya i gat bigfala paoa long tingting we man i gat long narafala, olsem 2 Timote 3:1-5 i tokbaot. ?Yu ting se i gat gud risen blong tingbaot wan gudfala laef long fyuja?” Afta we man i givim ansa, yu save pulum tingting blong hem i go long 2 Pita 3:13. Afta openem Reasoning buk long pej 227-33 (F. 336-342), mo tokbaot ol bigfala poen long saed long wanem Kingdom bambae i mekem long ol man.
5 Long visit bakegen, maet yu luksave se man blong haos i no wantem tokbaot skul blong hem, hem i harem se hemia bisnes blong wanwan man. Yu save talem wan samting olsem:
◼ “Wetem plante skul long wan wol we i stap kam smol oltaem from ol transpot we oli kwik mo komyunikesen, ol defren bilif oli gat paoa long laef blong ol man long fulwol, nating se yumi laekem no nogat. Be, kasem save long tingting blong narafala i save lidim man long gudfala fasin blong toktok bitwin ol man we oli gat defren bilif. Hem i save daonem tingting blong no laekem man we i kamaot from ol defren bilif. ?Wanem tingting blong yu?” Afta we man blong haos i ansa, pulum tingting blong man blong haos long nem blong ol japta long buk Mankind’s Search for God.
6 Yumi mas traehad blong gobak long olgeta we oli soem intres long trutok mo halpem olgeta blong wokbaot long rod we i go long itenel laef.—Jon 4:23, 24.