Sitih Inlahen Ang Yāvē Nö Kētö Sanapṙô Hī Yěi Vë-ekūötēv?

1-2. Sitih mufē öi mihôiṅ yěi vë-ekūötēv?

HĒṘU öm ṙung ngölōn, hang ṙô chu ang vöh Yāvē yěch vë-ekūötēv hö-ö ṙöng? Yěm ngatī mufē, köplōn tö meh öm rö-ö höng më-eṅ tö ngatī mufē. Pön pōyen yip prötör sistör tö ngatī mufē, möthë yēḵ cha nö ṙònghöichṙen nö el kanihngen. Ngatī ayī-ö lohten öi kihngen ṙatö-ellōnre tö Yāvē nö sitih inlahen nö kētö sanapṙô hī öi vë-ekūötēv.

² Töi mikahtökūö re töre öi kūö yòh mihôiṅ ṙatö-ellōnre tö Yāvē nö hangṙô yip tarik yěn vë-ekūötēv. (1 Yôh. 5:15) In ngih ātiköl min öi mikahtökūöre tö sanapṙô në intöönö: Kūö yòh öi ṙung hēṙu ngölōn tö Yāvē nö öt hangṙô hī yěi vë-ekūötēv? Asuh nup löktö tī Yāvē töngamuh nö kētö sanap minë ṙô hī öi vë-ekūötēv?

LOHTEN YĀVĒ NÖ ÖT SĀ NUP LŌN HĪ NÖ KĒTÖ SANAPṘÔ HĪ

3. Kūö yòh ang Yāvē nö lōnu tö hī öi vë-ekūö ò?

³ Löktö im Paipöl in akahalōn tö Yāvē nö hanangenlōn takô tö hī, pōiṙāi inrē öi imat ò. (Hak. 2:7; 1 Yôh. 4:10) Lökten anga-aṅ nö ṙūöhlö alaha hī öi havëkö inyööken re öi in ò. (1 Pīt. 5:6, 7) Lōnu anga-aṅ tö hī öi havai ngam innôlö re in ò ngaich mihôiṅ min öi lā-al nup kanihngen re. Lökten anga-aṅ nö hīnöre nö hayööken hī.

4. Kūö yòh öi mihôiṅ ngöṙô tö Yāvē nö hangṙô yip tarik re yěn vë-ekūötēv? (Ngëichkö ngam nyat.)

⁴ Pōyen ahang in tö inlahen Yāvē öi imat ngam Paipöl, tö ò nö hang ṙô yik tarik re nö vë-ekūötēv, yik tö köp nö hang nup chööngö ò. Ōt hòng kanöplōn meh öm in u? Lohten öm fē-ělre tö inlahen Rācha Tāvit. Pōyen yip tö kunyaha elmat tö ò, uroh inrē nö hòṅ fëlngen ò. Lökten anga-aṅ nö örheūheu nö havëkö inyööken re nö in Yāvē. Ngöṙô anga-aṅ nö havëkö kūö Yāvē: “Hang vine-eṅkūö re tö chu, Ō Mā Tēv; kētö elnang re i në vine-el kui tö chu: im kanô-en Meh, lanöökö Meh inrē sapṙô chu.” (Sal. 143:1) Hang ṙô Tāvit ang Yāvē nö vë-ekūö ò ngaich laklen ò. (1 Sa. 19:10, 18-20; 2 Sa. 5:17-25) Lökten ang Tāvit nö ngöṙô: ‘Röhta An Yāvē nö in cha yip mahavëken Ò.’ Mihôiṅ inrē ayī-ö sā ṙinatö-ellōn Tāvit.—Sal. 145:18.

5. Teūngen yik misī tarik ngam Tēv Yāvē tö sanap nuk ṙô re yěn vë-ekūötēv nö sā nuk kuilōn cha? Hachō elmat hī. (Ngëichkö ngam nyat.)

⁵ Lohten ang Yāvē nö öt ngatī inlahen nö kētö sanapṙô hī, nup tö sā lōn hī. Ngatī inlahen ök misī tanīnöṙô ang Pôl. Kaheuk ök kanihngenre anga-aṅ nö sā tö ‘lòkngöre nö i alaha ò’ sā kūö nup tö chökhukūö. Lūöi heuh ṙô anga-aṅ nö havëkö kūö Yāvē nö hōten ò nö kēngen e. Hang ṙô ò hòng ang Yāvē? Heūṅ, öt sā lōn Pôl pöri anga-aṅ nö kētö sanapṙô ò. Öt kēngö ngam kanihngen ò inrē ang Yāvē, kētö kumlēḵ ò pöri nö lā-al e, hòṅ ò nö örheūheu nö köp nö löklōn ò.—2 Kòr. 12:7-10.

6. Kūö yòh ṙung öi hēṙu ngölōn tö Yāvē nö öt hang minë ṙô hī öi vë-ekūötēv?

⁶ Lohten in inrē ayī-ö öi ngatī inlahen öi öt teūngen tö sanapṙô re tö nup tö sā nup lōn hī, pön tahëngö talöökö tī ang Yāvē nö kētö sanapṙô hī. Mihôiṅ pöri öi ṙatö-ellōnre tö Yāvē nö akahakūö tö nup tö yöölen tī tö hī. Ngö kinūichngö an nö imat ngam Paipöl: “In ngam tökô nö mötlötī tö nup taṙòkhöre havëkö hī, afēkö hī inrē, sā ngam kanô-òṅ ngam töla-evṙen nö in hī.” (Efi. 3:20) Lökten anga-aṅ lohten nö öt in öp ṙētak lōn hī nö kētö sanap ṙô hī öi vë-ekūötēv.

7. Kūö yòh öi lohten hòṅ harīktö inlahen ṙô re yěi vë-ekūötēv? Hachō elmat hī.

⁷ Yěi keuheūtlöre mikahkūö min tö nup kuilōn Yāvē, ngaich lohten min öi harīktö inlahen ṙô re öi vë-ekūötēv. Kò-òren ngëichkö ngih töhěng inchō elmat hī inlahen prötör Mārtin Pòtchingkör. Ngòh tö chaphötvö nö el Yatnā Sivir nö hakihtuṙen tö yik Nāchī, unôichrit ò nö fömngören inpīhö. Ik ranehöt chinaphöt ò, urěh sin anga-aṅ nöng havëkö ṙinānyö re nö in Yāvē, hòṅ ò hēk nö meuk kūö öp pīhöre, havanten re inrē nö ahānga. Unôichrit minë tö nët afta pöri anga-aṅ nö öt maheūku töm lōn Yāvē nö hòṅ ṙānyen ò. Lökten ngaich ngam prötör nö ngöṙô nö vë-ekūötēv: “Plīs (please) Yāvē vë-eny nang chu man töp kuilōn meh takô öm in chu?” Lökten ngaich ang prötör Mārtin nö fēkö inlahen yik tahëng prötör tö sā inkihten ò. Pōyen yik in cha pumṙūtkö yik pīhöre hēk kūönre inrē. Akahakūö ngaich anga-aṅ tö ngam kuilōn Yāvē. Lökten nö ngöṙô nö vë-ekūötēv: “Ha-öiny tī meh chin Yāvē öm kē-ěkūö chu tö ngih tufömngöre la-en. Holṙen chu man yēḵ hòṅ chu öich hareuskö alaha vē hol maneukre öich hangönken cha.” Machūötöre samyeūheu rò-òten anga-aṅ nöng el ngam Yatnā Sivīr nöng hangönken më holre.

8. Asuh öp tö hòṅ kanöplōn hī yē hī öi vë-ekūötēv?

⁸ Hòṅ köplōn in tö ngam kuilōn Yāvē nö öt hō min nö öt teung ip tölēnngen ṙētak re. Ngam kuilōn ò nö kēngen në töng sitih kanihngen hī. Löktö im Pūlngöre tī min anga-aṅ. Yěn yih min ngam Pūlngö ò möl min nö hö-öv në töfaltöre pinlāngen, invah hēk tö ngam kinpaha inrē. Öt hěngtit min nup kanihngen hī hē e. (Tan. 2:44; Inm. 21:3, 4) Hanöng saha ngam Pūlngö Yāvē pöri nö öl, höng hökngen ngam Sī-ö sin anga-aṅ nö hayöng nö ing panam.b (Yôh. 12:31; Inm. 12:9) Yēḵ Yāvē öre töngamuh nö ha-entngö në kanihngen hī, ngaich lohten min öi ngölōn tö ngam Sī-ö nö tölöngö tī nö hayöng. Lökten öi hòṅ hökkö öp ṙētak hē Yāvē min nö hateungngö nup kinlēḵngôre. Öt töngö manah pöri angū-ö tö ò nöng ṙāngen hī öi höng kihngen. Töi mikahtökūöre tö inlahen tī ò nö hayööken hī.

SITIH INLAHEN ANG YĀVĒ TÖNGAMUH NÖ KĒTÖ SANAPṘÔ HĪ YĔI VË-EKŪÖTĒV

9. Yēḵ hī öi kē nup fësla re ngaich kūö yòh öi hòṅ havëkö inyööken re öi in Yāvē.

⁹ Kē-ěkūö hī Yāvē tö ngam mikah. Kilēḵngôre anga-aṅ tö ò min kē-ěkūö hī tö ngam mikah hòṅ hī öi löngö katöllö. Hòṅ mötlö inlahen ayī-ö öi havëkö kūö Yāvē tö ngam mikah yē hī öi kē nup tökiröng fësla. Tö sā hī yěi hòṅ pīhövö hēk yěi hö-ö. (Yāk. 1:5) Töi hachō elmatre tö inlahen Mariā ngòh tö öl nö pīhövö.c Holtö ṙanamlōnre anga-aṅ nö painīör. Meukkūö ök töhěng tak ngaich anga-aṅ prötör, ngöṙô anga-aṅ: “Ik sā ai ngaich akahakūö tö höö, hangenlōn ngaich āyö tö höö. Akahakūö pöri chū-ö tö re öich hòṅ kē fësla re yěich hòṅ pīhövö, lökten öich vë-ekūötēv öich havëkö hinòlṙenre öich in Yāvē. Akahakūö inrē chū-ö tö Yāvē nö ötkô nöng anga-aṅ kamë ngam fësla chu, pön kanahngen chu angū-ö.” Ngölōn ngaich anga-aṅ, tö Yāvē nö hang ṙô ò nö kētö mikah ò. Nö sitih inlahen? Ik sā ò nö chöh minë inlēnö nö mat minë pöplikēsön hī, ngaich teūngen anga-aṅ tö nuk tövai inlēnö nö imat nuk ātiköl, teūngen inrē anga-aṅ tö sanapṙô nuk intöönö yamih nö elkuilōn ò. Vë-eny nang ök yöngre inrē anga-aṅ kikānö ök töhěngtak nö Vamënyen Yāvē. Lökten nuk kahë ò fësla nö löng pön öt hayönglen re anga-aṅ nö i ellōn re nö kē-ě u, havëkö mikahre pöri anga-aṅ nö in Yāvē. Unôichngöre ngaich nuk fësla kahë ò nö löng.

10. Sā ṙô ngam Filipī 4:13 sitih inlahen ang Yāvē nö hayööken yip tarik re? Hachō elmat hī. (Ngëichkö ngam nyat.)

¹⁰ Kētö kumlēḵ hī anga-aṅ öi höng möi. Sā inlahen tī Yāvē misī nö kētö kumlēḵ Pôl, ngatī inlahen tī anga-aṅ töngamuh nö kētö kumlēḵ hī, hòṅ hī möi öi la-al nup kanihngen re. (Vë-evkūö Filipī 4:13.) Töi ngëichkö ngih töhěng inchō elmat inlahen prötör Penchamin. Ngëichkö inlahen tī Yāvē nö kētö kumlēḵ ò nö la-al nuk kanihngen re nö holtö manööyöre. Samyeūheuv rò-òten ngam prötör tö ngam mikūönö ò nöng iyöng el inrūkui më famalngöre (refugee) nö i Afrikā. Ngöṙô anga-aṅ: “Örheūheu chū-ö öich vë-ekūö Yāvē nö kētö kumlēḵ chu hòṅ chu öich löngö kahë tö minë la-en ngaich haṙamlōn ò inrē. Hangṙô chu ngaich ang Yāvē öich vë-ekūötēv. Ngaich kē-ěkūö chu tö ngam lanāmö elkuilōn, kētö kumlēḵ chu inrē höng iṙūöhen öich ahangkö ngam tölöök inhānga. Löktö im vinë-ekūö minë pöplikēsön öich teūngen tö kumlēḵ re ngön inrē ngam innôlö chu öich in Yāvē.” Ngöṙô inrē ngam prötör: “Hē chu inrē öich vë-ekūö nup ekspirīöns yip prötör sistör ngaich sā kamëtö kumlēḵ chu ang Yāvē öich köptī tö ngam manööyö, ngönlöre hēk ngam kuilōn chu öich chiplö im linöökö lōn Yāvē.”

11-12. Sitih inlahen ang Yāvē nö löktö in më prötör sistör tī nö kētö sanapṙô hī öi vë-ekūötēv? (Ngëichkö ngam nyat.)

¹¹ Löktö in më prötör sistör tī ang Yāvē nö hayööken hī. Peunyhökūö ngam yöngre ang Yēsū nö vë-ekūötēv ik hatööm urēhěkūö kinpaha ò. Havëkökūö Yāvē anga-aṅ tö inlahen re nö un sūöichka nö hachōchngö ngam minë-eny Yāvē. Hö-ö pöri ang Yāvē nö asökngöröön minë sinūöichkö inlahen ò, pön höng tīntö ök hol ò ma-ahānga nö mahangëken ò. (Lūk. 22:42, 43) Ngatī töngamuh ang Yāvē nö löktö in më prötör sistör tī nö hayööken hī. Lohten cha-a nö chöhken hī hēk fūnken hī nö hareuskö alaha hī. Lökten ayī-ö ṙòkhöre öi hòṅ kē-ěny ṙētakre öi hareuskö alaha yip holre öi löktö in minë “tölöök ṙô.”—Inch. 12:25.

¹² Töi ngëichkö ngih inlahen ngòh sistör hī ang Mirīöm. Fömngöre vah ök pīhö ò nö kapah. Hěngheuh anga-aṅ nöng hěngtiṙah nö i patī re nöng haṙivlōn. Öt ṙākôre anga-aṅ nöng peuny tö kūö ngam miṙivlōnre lōnu anga-aṅ nö hòṅ vë-eny ngam miṙivlōnre nö i tahëng. Ngöṙô pöri anga-aṅ: “Öt rēhěn öich kô öich vë-ekūö holre öich el fūn. Lökten öich höng vë-ekūö Yāvē, peunyhö kūö ò inrē, ilöö fūnö ngaich chū-ö tö ök töhěng tak minṙöinylen, nö tö sā hol chu.” Teūngen ngaich anga-aṅ tö inreuskö alaha re nö löktö in ök prötör, tök pīhö ò inrē. Ṙātö-ellōnre anga-aṅ tö Yāvē nö kēhöt ellōn ngam prötör nö fūnken ò.

13. Vënyö öp töhěng inchō elmat sitih inlahen ang Yāvē nö hayööken hī nö löktö in yip töt lamöklōn ò nö kētö sanapṙô hī öi vë-ekūötēv?

¹³ Hayööken hī ang Yāvē nö löktö in yip tarik töt lamöklōn ò. (Inch. 21:1) Sā inlahen nuk urěh ṙētak misī ang Yāvē nö kēhöt ellōn Rācha Artāsörsös nö hökngö röön Nahimiā nö chuh Yerusalem, nö havanlö vinīlö ngam el panam. (Nah. 2:3-6) Yēḵ hī inrē töngamuh öi kihngen, ngaich kēhöt ellōn yip tarik anga-aṅ yip töt lamöklōn ò hòṅ cha nö hayööken hī öi im linöklōn ò.

14. Asūp haköplö hī in ngam ekspirīön Sū Hing? (Ngëichkö ngam nyat.)

¹⁴ Akahaiṙen ang sistör Sū Hing tö inlahen tī Yāvē nö hayööken ò nö löktö in ngam tòktör. Me-elkuire invah ök kūön ò kikōnyö. Hěngheuh anga-aṅ ngaich nö palā-aiṙen. Lökten ngaich ngam sistör hēk tö ök pīhö ò nö ṙāngen ngam kinmānöre tö kūö inlahen cha nö hòṅ meukṙen ngam kūönre. Angū-ö ngaich lāinyngen cha nö kihngen tö pësa re. Ngölōn ngaich ngam sistör tö re nö ötkô min nö lā-al u, lökten anga-aṅ nö keuheūtnyö ṙô ellōnre nö vë-ekūötēv nö havëkö inyööken re nö in Yāvē. Unôichrit e ngaich ngam tòktör lamë-en ngam kūön ò, nö hòṅ hayööken ò. Lökten ngaich ngam sistör töm mikūönö ò inrē nö teūngen tö minë mineuklökui nö löktö in ngam sörkör, hēk teūngen inrē cha-a tö chūök re nö iyöng nö in minë tö kūön ṙai. Ngöṙô ngam sistör Sū Hing: “Meuk ngam tī Yāvē chū-ö nö hayööken chu, kô-en anga-aṅ nö ‘hamang minë ṙô hī öi vë-ekūötēv.’”—Sal. 65:2.

ṘATÖ-ELLŌNE TÖ YĀVĒ NÖ ÖTHŌ NÖ ÖT KĒTÖ SANAPṘÔ HĪ YĔI VË-EKŪÖTĒV HĒK HŌ-EN U INRĒ

15. Sitih inlahen ök ihih tö hěng tak sistör nö akahaiṙen tö Yāvē nö kētö sanapṙô ò nö vë-ekūötēv?

¹⁵ Kô-en töngamuh ang Yāvē nö öt hameuktö pinngangkūö nö kētö sanapṙô hī yěi vë-ekūö ò, hangṙô hī pöri anga-aṅ. Akahakūö inrē anga-aṅ tö öp kuilōn hī yē hī öi hòṅ chiplö im linöklōn ò ngaich ngatī tī anga-aṅ nö kēten u. Lökten in öi hòṅ chumkūöṙen tö inlahen tī Yāvē nö sitih tī anga-aṅ nö kētö sanapṙô hī yěi vë-ekūö ò. Ngölōn ök ihih sistör tö Yōkō minë-eny tö Yāvē nö öt kētö sanapṙô ò yěn vë-ekūötēv. Lökten anga-aṅ nö kūichngö nuk ṙô re nö imat öp nōt nuk ṙô ò nö vë-ekūötēv. Unôichngöre ngaich anga-aṅ nö meuk mat öp nōt re, in e mikahkūö ngaich anga-aṅ tö nup tö pōyen ṙô ò nö vë-ekūötēv nö ngaich angū-ö nö kētu sanapṙô tö Yāvē nup töt kanöplōn ò inrē ṙô ò nö vë-ekūötēv. Ngatī in ayī-ö öi hòṅ kē-ěny ṙētak re öi fēkö inlahen tī Yāvē nö kētö nup sanapṙô hī yěi vë-ekūötēv.—Sal. 66:19, 20.

16. Sitih inlahen öi mihôiṅ öi hameuktö ṙinatö-ellōnre öi in Yāvē i alaha ngam vinë-ekūötēv? (Heprāi 11:6)

¹⁶ Öt höng im vinë-ekūötēv in ayī-ö öi hameuktöre öi ṙatö-ellōnre öi in Yāvē, tö ò nö kētö sanapṙô hī, hameuktö ngam ṙinatö-ellōnre pöri öi in ò öi hō-en nup ṙô ò. (Vë-evkūö Heprāi 11:6.) Töi ngëichkö ngih inchō elmat inlahen prötör Māik tö ngam pihī ò Krisī. Nëtre tak cha-a nö lōnu töre nö hòṅ la-evṙen nö el pētěl. Ngöṙô ang prötör Māik: “Ṙōl samyeūheu ai hòṅ fīl fôm ngam pētěl ngaich örheūheu inrē öi vë-ekūötēv öi vë-ekūö Yāvē, sön pöri ai öt havëtu ai chuh el pētěl.” Ṙatö-ellōnre cha-a tö Yāvē nö akahakūö töp tö mööḵngöre inlahen cha nö löklōn ò. Öp tölngö kanò-òṅ cha ngaich ngatī inlahen cha-a. Lökten cha-a nö chuh in nup tahëng panam chūök tö lōn tö ma-ahangkö ngam tölöök inhānga nö painīör hēk kētöre inrē cha-a nö in ngam minānö. Ngaich nap töngamuh nö la-entö ngam la-en sörkit. Ngöṙô ngam prötör: “Hö-ö ang Yāvē nöng örheūheu nö sā nup kuilōn hī nö kētö sanapṙô hī yěi vë-ekūötēv hangṙô hī pöri anga-aṅ, mötlö tī anga-aṅ nö kē-ěkūö hī tö nup mufē hī.”

17-18. Sā ṙô ngam Salmai 86:6, 7 asūp ihih ṙinatö-ellōn hī?

¹⁷ Vë-evkūö Salmai 86:6, 7. Ṙatö-ellōnre ök Tāvit tö Yāvē nö hangṙô ò yěn vë-ekūötēv hēk kētö sanapṙô ò inrē. Mihôiṅ in ayī-ö öi sā ṙinatö-ellōn Tāvit. Yip tarik taheui tö kakkö in ngih ātiköl, ṙatö-ellōnre cha-a tö Yāvē nö kētö sanapṙô cha yěn vë-ekūötēv. Mihôiṅ an nö kētö mikah hī hēk kumlēḵ hī inrē öi lā-al nup kanihngen re. Lohten min nö löktö in yip holmaneuk hī tī nö hayööken hī hēk löktö in yip töt lamöklōn ò inrē.

¹⁸ Örhöng örheūheu ang Yāvē nö kētö sanapṙô hī öi vë-ekūötēv nö sā nup lōn hī. Öthō pöri anga-aṅ nö öt hang ṙô hī. Pön akahakūö anga-aṅ tö nup ṙētak tī re nö kē-ěkūö hī tö nup kuilōn hī. Lökten man örheūheu vë-ekūötēv hēk ṙātö ellōnre inrē tö Yāvē nö chumkūöken meh, ngaich “löpnyökūö eltī re nö hatöö-önglōn në tö aṅ” ip tufömngöre min panam.—Sal. 145:16.