Gikan sa Among mga Magbabasa

Sa Unsang Paagi Nagsugod ang Kinabuhi Dinhi sa Yuta?

Pasalamatan ko gayod kamo sa inyong maayo kaayong artikulo “How Did Life on Earth Begin?” (Enero 22, 1987 sa Ingles) Katingalahan kaayo ang katin-aw, kalaktod, ug kayano niadto. Human nakabasa sa artikulo, wala na akoy bisag gamay nga pagduhaduha—ang ebolusyon dili kamatuoran. Ang artikulo nakatubag sa dakong mga pangutana, sama sa: Sa unsang paagi mitungha kita dinhi? Duna bay kahulogan ang atong mga kinabuhi? Salamat kaayo sa pagpatik ug mga artikulo nga nakatabang kanamong mga batan-on sa paglikay nga madala niining kalibotana ug sa mga gituohan niini.

E. A., Pransiya

Kaalam nga Tagsaon sa Iyang Edad

Nadasig kaayo ako sa artikulong “Kaalam nga Tagsaon sa Iyang Edad.” (Oktubre 22, 1987) Bisag parehas kamig edad ni Lisa, sa nagbasa ako sa artikulo nahibulong ako kon makapahayag ba ako sa akong pagtuo sama kaniya kahanas. Akong gibati nga daw ang matag usa ka pulong nga iyang gisulti nagpakitag dakong pagsalig kang Jehova. Gusto kong sundon ang pagtuo niadtong batan-ona. Nagapaabot ako sa iyang pagkabanaw.

M. S., Japan

Gibati ko nga kinahanglang magsulat ako kaninyo. Ako 14-anyos, ug reklamador. Usa ka adlaw nabasa nako ang artikulo bahin kang Lisa. Diha sa tibuok artikulo, wala gayod akoy nakitang pulong nga nagreklamo. Alang sa tanang mga batan-ong sama kanakong bagolbolan, buot kong isulti nga si Jehova nagatagana kanunay sa tanan natong tinuod nga panginahanglan, ug angay nga magpasalamat kita kaniya. May problema ako sa panglawas, ug tingali mawad-an ako sa akong panan-aw, apan dili sa akong kinabuhi. ‘Brabo’ kang Lisa alang sa katingalahang pananglitan sa integridad nga iyang gibilin alang kanatong tanan!

C. F., Pransiya

Nagsulat ako kaninyo sa pagsulti kaninyo nga natandog kaayo ako sa nabasa nako ang sugilanon ni Lisa. Dili gayod ako makapugong sa mga luha. Nagtuo ako nga daghang mga tawo, sama kanako, mawad-ag kadasig sa dihang mag-atubang silag mga problema, apan sukad karon hinumdoman ko kanunay ang kaisog ug determinasyon nga gipakita ni Lisa sa atubangan sa dagkong mga problema.

V. L., Italya

Mahitungod sa mga Mananap

Kini maoy sulat sa pasalamat alang sa makaikag ug makawiwiling mga artikulo bahin sa mananap! Nakapukaw kini sa pagtagad sa akong 13-anyos nga anak nga lalaki sa pagbasa sa mga magasin sa dihang wala ang ilang Mama. Ang mahayag nga mga hulagway ug ang katingalahang mga kamatuoran nakatabang sa akong mga anak ug sa dili-magtutuong kapikas sa pagtan-aw sa pila ka dili-makitang mga hiyas ni Jehova. Palihog pagbutang ug labing menos usa ka artikulo bahin sa mananap sa kada gula aron sila magpadayon sa pagtan-aw sa sulod ug sa pagbasa!

P. M., Tinipong Bansa

Gipabilhan nakog dako ang impormasyon nga gipatik mahitungod sa kinabuhi sa mananap sa Aprika. (Septiyembre 22, 1987) Nahibaloan ko ang daghang mga detalye nga nagpakita kon sa unsang paagi si Jehova mao ang labing dako sa tanang mga tigdensinyo. Sa akong hunahuna maayo unta kaayo kon ang mga ginikanan, inay sa pagpakita lamang sa ilang mga anak sa mga hulagway sa mga mananap, magatabang kanila nga makahibalo sa mga kinaiyahan niining mga mananapa aron motubo diha sa gugma ug apresasyon sa atong Maglalalang.

S. C., Brazil