Gikan sa Among mga Magbabasa
Columbus Mao pay pagkatapos nako sa pagbasa sa seryal sa mga artikulong “‘Ang Bag-ong Kalibotan’—500 na ka Tuig.” (Marso 8, 1992) Admitihon ko nga maglisod gayod ako sa pagsabot sa kasaysayan, ug nakita ko malisod ang pasiunang materyal. Apan nagustohan ko gayod ang aplikasyon nga gihimo diha sa artikulo “Ang Tinuod Bag-ong Kalibotan Nagapaabot nga Diskobrehon.” Kini nakatabang kanako sa pag-apresyar sa mga panalangin nga itagana sa Diyos sa dili madugay.
N. Z., Italya
Ako 13-anyos. Maoy among gitun-an sa eskuylahan ang bahin sa mga marinero, ug kami gisugo sa pagsulat ug mubong artikulo bahin sa ulohan. Sanglit diyutayng impormasyon lang ang among nakuha gikan sa among magtutudlo sa kasaysayan, gigamit ko ang mga detalye gikan sa mga artikulo sa Pagmata! bahin kang Christopher Columbus. Nakuha ko ang taas nga grado ug nakapahimutang usab ug daghang kopya sa magasin diha sa klase.
M. D., Alemanya
Ang Tagoangkan Ako wala pa sukad makasulat alang sa usa ka magasin sa tibuok kong kinabuhi. Apan ako natandog gayod sa katahom sa artikulo “Ang Tagoangkan—Atong Kahibulongang Unang Puy-anan” (Abril 8, 1992) nga sa ingon ako natukmod sa pagsulat. Milalom ang pagtahod ko sa gahom sa Diyos. Ang matag pulong gisulat nga mahigugmaon kaayo.
B. J., Tinipong Bansa
Dili pa dugay ako may problema sa akong matris. Apan sa dihang misulay ang doktor sa pagpatin-aw kon unsa ang akong problema, ako wala makasabot. Kay gibasa ug gibasa pag-usab ang inyong artikulo, ako karon nakasabot na kon unsay nagakahitabo kanako. Mas masayon na kanako ang pagpakigsulti sa akong doktor.
S. G., Brazil
Buot kong komplimentohan kamo sa matahom nga paagi sa pagkasulat sa artikulo, apil sa makaiikag nga mga ilustrasyon nga nag-uban niini—usa ka kombinasyon nga nagpahimo sa Pagmata! nga makalingaw nga basahon. Kon sa laing siyentipikanhong publikasyon pa ako nagbasa sa samang impormasyon, wala unta akoy masabtan ug laayan gayod niini.
S. P., Italya
Ang inyong hinashasan nga pangbukas nga mga pulong dihadiha nakakuha sa akong pagtagad, ug ako naikag gayod sa artikulo. Samtang gibasa ko kini, naamgohan ko nga ang mga batan-on nga nakigbahin sa di-maayong paggawi sa sekso nagahimo ug dakong kasaypanan. Tinuod nga kabuangan ang pag-abuso sa lawas nga gibuhat ni Jehova, diha sa iyang dakong kaalam, alang kanato.
M. S., Hapon
Dingo nga mga Iro Nagplano ako nga mobalhin ngadto sa Australia, busa ang bisan unsang impormasyon nga naghisgot bahin nianang yutaa makaiikag kanako. Busa ako nakadayeg sa inyong artikulo “Himamata ang Gilantugiang Australianhong Dingo.” (Oktubre 8, 1991) Sa wala pa makabasa niining artikuloha, mapihigon ako batok sa dingo, nagtuo nga kana maoy usa ka anad nga “iro” lamang nga nahimong ihalas. Ang inyong artikulo nakahatag kanako ug mas lalom nga pagtahod sa dingo, ug naglaom ako nga makakita ra nianang talagsaong hayop sa umaabot.
A. S., Tinipong Bansa
Mga Pep Rally Giapresyar ko gayod ang artikulong “Mga Batan-on Nangutana . . . Angay ba nga Kami Motambong ug Pep Rally?” (Pebrero 8, 1992) Wala na ako magtungha, apan ako makalantaw ug balik ug makahinumdom nga ako aktibong nalangkit sa mga rally sa eskuylahan. Among gidugmok ang usa ka hulad sa tangil sa kakontrang eskuylahan! Ang mga Pulong sa Bibliya nga mapadapat sa akong kaso: “Ang daotang panag-uban makadaot sa maayong pamatasan.”—1 Corinto 15:33.
L. S., Tinipong Bansa
Ako mitambong ug mga pep rally apan dili gayod aktibo sa pagpakigbahin niini. Bisan pa, may mga pagduhaduha ako bahin sa pagtambong, apan wala ako molihok nga uyon sa akong pagduhaduha. Sanglit dili-pinugos ang pagtambong, ako determinado nga dili na gayod motambong pa niini.
B. K., Tinipong Bansa