Pagtanyag sa Maayong Balita—Pinaagig Espesyal-Interes nga mga Artikulo sa Atong mga Magasin
1 Karong mga adlawa, ang Watch Tower Society nagahimo sa maayong balita nga mabatonan ngadto sa interesadong mga tawo bisan diin. Ang The Watchtower gipatik sa 103 ka linguwahe uban sa aberids nga pagpatik ug 13,045,000 ug ang Awake! sa pagkakaron anaa sa 54 ka pinulongan uban sa aberids nga pagpatik nga 11,350,000. Maoy atong pribilehiyo sa paggamit niining mga magasina sa pagtanyag sa maayong balita ngadto sa “tanang matang sa mga tawo.”—1 Tim. 2:4.
IPASIUGDA ANG ESPESYAL-INTERES NGA MGA ARTIKULO
2 Sa madawat mo ang bag-ong gula sa mga magasin, nalipay ka ba sa hurot nga pagbasa niana aron tinoon kon sa unsang paagi si Jehova nagahatag kanatog kaayohan pinaagig materyal nga giandam? (Isa. 48:17) Human niana, nganong dili modesider kon haing artikulo nga gusto mong ipresentar diha sa kanataran? Tingali may mamatikdan ka nga sa linain makapainteres sa pipila ka tawong diha sa inyong teritoryo. Ang usa ka huwes sa Ohio misulat ug sulat pasalamat ngadto sa Saksing magtiayon kinsa midala kaniyag gula sa Awake! nga naghisgot sa suliran sa pag-inom ug pagmanehog sakyanan.
3 Dugang pa sa pagtanyag sa mga magasin sa kabalayan, imong ginapakita ba ang mga artikulo nga imong makaplagan makapainteres ngadto sa mga tawong kaubanan mo sa trabaho? Ginaduaw mo ba ang mga dapit negosyohanan aron itanyag ang mga magasin sa mga panahong dili puliki ang mga tag-iya? Imo bang gipaambit ang kamatuoran ngadto sa uban nga anaa sa kadalanan samtang ikaw may higayon? Daghang mga igsoong lalaki ug babaye nagabuhat niini nga epektibo, nga nagaduol sa mga tawo nga dili mahibalag sa laing paagi. Niining paagiha sila nagahimog modernong aplikasyon sa Proverbio 1:20.
MAAYONG SUMBANANG PAGASUNDON
4 Sa dihang si Jesus misulti ngadto sa Samaritanang babaye nga miadto sa atabay sa pagkalos, siya miingon: “Kon ikaw nakaila pa . . . kon kinsa ang nagaingon kanimo, ‘Paimna ako,’ ikaw unta nangayo kaniya, ug siya magahatag unta kanimo sa buhing tubig.” (Juan 4:7-10) Maingon nga ang maong babaye wala makaila kang Jesus o sa kamatuoran nga iyang nahuptan, mao man ang mga tawo karong mga adlawa mahimong wala makaila kon kinsa kita o ang kahinungdanon sa mensahe nga atong ginadala kanila. Si Jesus misulti sa mga tawo sa matag angayng okasyon ug bisan asa—usa ka maayong panig-ingnan alang kanato sa pagsundog.
5 Hinaot nga atong buhaton kutob sa atong mahimo nga ipaambit kining maayo kaayong espirituwal nga pagkaon nga anaa sa atong mga magasin ngadto sa uban! Kadtong modawat niana uban sa pagpabili mahimong sa kataposan matultolan ngadto “sa mga tuboran sa mga tubig sa kinabuhi.”—Pin. 7:17.