Epektibong mga Introduksiyon
1 Sa dihang nagapakig-ambit sa ministeryo, kita ginaatubang sa pangutana, “Unsa may akong unang isulti?” Ang batid nga mga magmamantala mosugyot sa pipila mapuslanong mga puntos. Unsa man ang pipila niini?
2 Una, importante nga mahimong tim-os nga interesado sa mga tawo nga atong gikasulti. Kini ginapakita diha sa mga pulong ug mga aksiyon. Hinungdanon nga tagdon ang tinamdan sa tagbalay. Paminawi ang iyang sanong sa imong mga pangutana. Ipakita kon sa unsang paagi siya sa personal makabenepisyo.
TAGDA ANG ILANG TINAMDAN
3 Sa nagsangyaw si Jesus ngadto sa Samaritanang babaye, ang pipila sa iyang mga pulong daw katingalahan ngadto sa maong babaye. Si Jesus naminaw pag-ayo, ug sa mitubag, iyang gitagad ang gisulti sa maong babaye. Gusto niyang makatabang kaniya. (Juan 4:13, 14, 19-26) Kita ba nagapanlimbasog sa pagsunod sa panig-ingnan ni Jesus niining bahina?
4 Kon ang mga tawo mosanong sa imong pasiuna sa pag-ingon, “May kaugalingon akong relihiyon,” unsa man kaha ang imong buhaton? Imo bang natagad ang impormasyon sa mga panid 18-19 sa basahong Nangatarongan? Sa mga dapit nga daghang tawo nagagamit niining pagsupaka, makaplagan mong makatabang nga unhan mo sila sa ilang komento ug ipatungha ang ulohan una. Pananglitan, ikaw makaingon, “Aduna ba ikaw ing kaugalingong relihiyon? [Paminawi ang ilang tubag.] Naghunahuna ko nga aduna ka kay kadaghanan sa mga tawo niining dapita aduna may relihiyon. Apan, ang rason sa akong pagduaw niining buntaga mao . . . ” Dayon padayon sa ulohan nga buot mong hisgotan.
5 Kon daghang tagbalay moingon, “Puliki ako,” imong mapili ang usa o mas pang mga puntos sa mga panid 19-20 sa basahong Nangatarongan ug ipahiangay kana sa imong teritoryo. Ang lainlaing mga puntos magamit man aron unhan daan ang mga pagsupak nga kanunayng madunggan.
PAGGAMIT SA MGA PASIUNA GIKAN SA LIBRONG NANGATARONGAN
6 Imong mamatikdan nga ang mga pasiuna sa mga panid 9-15 sa basahong Nangatarongan nagtagad sa mga ulohan nga sagad nagpabalaka sa mga tawo, sama sa karong mga hitabo, personal nga kaluwasan, pangempleyo, puy-anan, pamilyahanong kinabuhi, ug ang kaugmaon. Apan, matikdi usab nga kini nagadapit sa tagbalay nga mosulti sa iyang kaugalingon. Kini mobulig kaniya sa pagkasabot nga ang ulohan maoy hinungdanon ug sa personal nagaapektar kaniya.
7 Kat-oning gamiton ang mga pasiuna diha sa basahong Nangatarongan. Pagkuhag kaayohan gikan sa kasinatian sa ubang mga magmamantala. Pag-ampo sa panalangin ni Jehova sa imong mga panlimbasog. Sa pagbuhat niini, hayan ang dugang pang mga tawo sa inyong teritoryo ang mosanong nga mauyonon sa maayong balita.