Pagtabang sa Uban Samtang Anaa sa Pag-alagad sa Kanataran
1 Sukad gayod sa sinugdanan sa Kristohanong kongregasyon, si Jesus personal nga mibansay sa iyang mga tinun-an sa buluhatong pagsangyaw ug “misugod sa pagpadala kanila sa tinagurha.” (Mar. 6:7; Luc. 8:1) Ang apostol nga si Pablo naghisgot sa iyang “mga isigkamumuo” didto sa Filipos kinsa ‘nanlimbasog gayod uban kaniya diha sa maayong balita.’ (Filip. 4:3) Bisan tuod dili man kanunayng kinahanglan nga may kauban diha sa ministeryo, ang kadaghanan kanato moapresyar nga ginakuyogan sa uban. (Eccl. 4:9) Nan, sa unsang paagi mahimo kitang makapalig-on ug mabuligon ngadto sa usag usa samtang kita nagasangyaw?
2 Ang usa sa mga katuyoan sa atong pagtigom sa dayon na nga pagsangyaw mao ang pagtabang sa bag-ohang mga magmamantala. (om p. 77, 97) Bisan ang bag-ong natudlong mga payunir basin gustong mokuyog sa mas batid nga mga magmamantala o uban sa ansiyano o ministeryal nga alagad, nga sa ingon nagataganag “pagbayloay sa pagpalig-on.”—Roma. 1:12.
3 Para sa kahilwasan (safety reasons), hayan mapuslanon para sa mga magmamantala nga magkuyog sa pagsangyaw diha sa pipila ka dapit. O may mga panahon nga hangyoon kitang mopakig-uban sa di pa eksperiyensiyadong magmamantala nga anaa sa tigom sa dayon na nga pagsangyaw. Kon kita gihangyo sa paghimo niana, maoy dalan sa gugma nga “motabang niadtong maluya,” bisan tuod sa naandan kita mosangyaw uban sa laing kauban.—Buh. 20:35.
SANGYAW NGA MAHIUSAHON
4 Sa dihang mokuyog sa uban, buot ta nga mosangyaw nga mahiusahon. (Itandi ang 1 Corinto 3:6, 9.) Ang duha makaambit diha sa pagpamatuod, tingali nagapulipuli sa mga panaghisgot. Ang maayong pamatasan nagakinahanglan nga kita maminaw gayod samtang ang atong kauban nagasulti.
5 Bisan tuod may mga panahon nga tingali angay nga moduyog kita sa panaghisgot samtang ang atong kauban nanguna sa panaghisgot, kini nagakinahanglan ug maayong panghukom. Dili ta buot nga mobalda sa pangatarongan nga epektibo uban sa tagbalay. Siyempre, kon ang di pa eksperiyensiyadong magmamantala nalisdan sa pagtubag sa pagsupak, sa walay duhaduha siya moapresyar man sa pipila ka tabang.—Eccl. 4:12.
6 Ato mang magamit ug maayo ang panahon tali sa mga ganghaan sa paghisgot sa mga paagi nga mapauswag ang atong presentasyon, hayan nagagamit sa introduksiyon sa basahong Nangatarongan. Ang duyog nga pagsangyaw makabulig usab kanato sa mas pang pagkailhanay sa usag usa, nga nagalig-on sa mga bugkos sa atong Kristohanong panag-igsoonay.
7 Samtang kita nagaubanay sa usag usa diha sa pag-alagad, atong matukod diha sa usag usa ang dulot nga pagpabili sa atong gimahal nga ministeryo. (2 Cor. 4:1, 7) Sa samang panahon atong matagamtam ang pagpalig-on, makakat-on gikan sa usag usa, ug mapalig-on ang panaghiusa sa panag-igsoonay.—Sal. 133:1.