Dayega ang Ngalan sa Diyos sa Bug-os
1 Pagkamalipayon ta sa daghang panalangin ni Jehova! Nahuptan ta ang bag-ong mga ihap sa kinatas-an sa mga magmamantala ug mga pagtuon sa Bibliya. Diha usab ing maayo kaayong gidaghanon sa nagtambong sa Memoryal nga 332,830. Ang tanan kanato nabenepisyohan gikan sa dagayang espirituwal nga pagkaon didto sa atong mga programa sa sirkitong asembliya ug espesyal nga adlawng asembliya.
2 Sa unsang paagi atong ikapakita ang atong pagpabili alang sa tanan niining mga panalangina? Pinaagig pagdayeg sa ngalan sa Diyos sa bug-os!—Sal. 145.21.
PADAYONG DAYEGA ANG NGALAN SA DIYOS
3 Atong madayeg sa bug-os ang ngalan ni Jehova pinaagig pagtanyag sa librong Mga Batan-on Nangutana ngadto sa katawhan. Ang Ulohan nga Mahisgotan maylabot sa “Ang Sulbad sa mga Gumonhap sa Batan-on” maoy tukma alang sa mga ginikanan ug mga batan-on. Sa dihang makigsulti sa mga ginikanan, hayan gusto mong ipatin-aw nga ikaw nagabuhat ug publikong serbisyo aron sa pagtabang sa mga tawo nga makasulbad sa adlaw-adlawng mga suliran. Ipunting ang usa ka panig-ingnan sa mapuslanong tambag nga makaplagan diha sa basahon.
4 Sa dihang makigsulti sa mga batan-on, magmahigalaon ug tagdon sila uban ang kaligdong. Human sa imong introduksiyon, basin gusto mong hisgotan ang pagpit-os sa isigkaingon ug suknaon siya, ‘Ikaw ba gayod naghunahuna kon sa unsang paagi mabuntog mo ang pagpit-os sa isigkaingon?’ Human sa iyang tubag, buksi ang libro sa kapitulo 9, hayan magbasag usa ka parapo sa panid 77. Sa paniklop ikaw makaingon, ‘Kining libroha nagapakita kon sa unsang paagi ang Bibliya makabulig sa mga batan-on sa pagsulbad sa malisod nga mga situwasyon, sama nianang natala diha sa kaundan.’
PANGANDAM PAG-AYO
5 Ang pangandam hinungdanon kon kita ugaling mahimong epektibo sa pagtudlo sa uban. Nganong di mangandam uban sa kaubanang mga membro sa banay o uban sa usa diha sa inyong grupo sa pagtuon? Pinaagig pagbansay sa imong presentasyon, ikaw mobating mas masaligon sa dihang mosulti ngadto sa mga tawo sa inyong teritoryo.
6 Ang atong mga presentasyon kinahanglang magbanaag sa atong interes sa katawhan. Sa dihang dawaton sa tagbalay ang libro, basin gusto mong ipasundayag ang paagi sa paggamit niana ingong tabang sa pagtuon sa Bibliya ug hikaya nga mobalikduaw. Human sa pipila ka panaghisgot, hayan posible nga ipaila ang laing publikasyon alang sa pagtuon. Samtang buhaton ta kini nga makugihon, atong matabangan ang uban sa pagkat-on sa pagdayeg sa ngalan ni Jehova sa bug-os.