Magtibuok-Kalag sa Ministeryo sa Kanataran
Bahin 2—Ugmara ang Kasibot
1 Maoy mas masayon sa pagkahimong masiboton sa buluhaton nga kita miangay niana. Tinuod usab nga ang usa ka tawo malipay sa butang nga siya andam niana. Tino nga matuod kana diha sa bug-os nga pagtuman sa atong ministeryo.—2 Tim. 4:5.
PANGANDAM HINUNGDANON
2 Ang atong kasibot sa laktod nalangkit ngadto sa atong pagkaandam gayod. Pananglitan, kon makahibalag kitag usa ka Muslim sa pagsangyaw, unsa may atong ikasulti? Ang andam-kaayo nga magmamantala makaingon: “Kana makapainteres. Wala ko makapakigsulti sa daghang Muslim. Apan may nabasa ko bahin sa inyong mga pagtulon-an nga ania niining libroha. [Paklia sa panid 23 sa librong Nangatarongan.] Kini nagaingon nga kamo nagatuo nga si Jesus usa ka propeta apan si Mohamed ang labing importanteng propeta. Di ba mao? [Tugoting motubag.] Nagatuo ba usab kamo nga si Moises tinuod nga manalagna? Ako bang ikapakita kanimo sa Balaang mga Sinulat kon unsa ang nakat-onan ni Moises bahin sa personal nga ngalan sa Diyos?” Imo dayong basahon ang Exodo 6:3, nga niana masugdan ang maayong panaghisgot.
3 Malisod alang sa daghan kanato sa paghinumdom sa mga numero sa panid. Pero uban sa diyutayng pangandam ug praktis, atong magamit ang seksiyong ginganlang “Mga Tigsumpo sa Panaghisgot” diha sa librong Nangatarongan.
4 Ang librong Nangatarongan usab adunay maayong seksiyon maylabot sa mga pasiuna. Nganong di gamiton kini? Mahimong atong gikinahanglan nga mopahiuyon sa atong presentasyon sumala sa situwasyon. Sa kataposan sa daghang ulohan diha sa librong Nangatarongan, adunay seksiyong “Kon Adunay Moingon,” nga nagahatag ug tubag ngadto sa tinong mga pangutana o mga pagsupak sa maong ulohan. Pero kini nga materyal bililhon lamang kon gamiton ta kini diha sa atong presentasyon.
KON UNSAON SA PAGPANGANDAM
5 Magmaalisto sa panahon sa mga pasundayag diha sa Tigom sa Pag-alagad, nga may gikuptan ka nga mga publikasyon nga ginapasundayag. Niining paagiha, ikaw mas pang makabenepisyo sa bug-os gikan sa pagpangandam sa uban.
6 Gahinig pipila ka panahon sa pagpangandam alang sa pag-alagad. Paneguroa nga aduna ka ing literatura nga imong gikinahanglan. Gahinig pipila ka minutos sa pagtan-aw sa Ulohan nga Mahisgotan. Sublia ang mga teksto ug tinoa ang mga puntong igsusulti diha sa basahon nga ginatanyag. Ang duyog nga pagbuhat niini ingong pamilya mahimong mapuslanon.
7 Himoa ang mga praktis sesyon. Mabuhat mo kini human sa pagtuon sa libro, didto sa sosyal nga mga tigomtigom, ug tali sa mga ganghaan. Ang paghimog mga presentasyon ug pagpakita kon unsaon sa pagbuntog sa mga pagsupak makabulig man sa pagpahait sa atong mga kahanas.
8 Ang makugihong pagpangandam mopalambo sa atong kasibot aron kita mahimong mahanasong mga mamumuo ug makatagamtam sa malipayong katagbawan.—Juan 2:17.