Mga Pasiuna nga Mapapaminaw ang mga Tagbalay
1 Unsa ang labing importanteng bahin sa imong pamalaybalay nga presentasyon? Kadaghanan kanato mouyon nga mao ang imong introduksiyon. Kon ikaw di-malamposon sa pagpukaw sa interes sa tagbalay sulod sa unang 30 ka segundos o mas pa, lagmit putlon niya ang panaghisgot.
2 Unsang mga bahin ang imo gayong tagdon sa pag-andam sa epektibong pasiuna? Analisaha ang mga kustombre sa mga tawo nga lagmit mong mahibalag. Mao bay batasan nga magbayloay unag mga uloestorya, o dahomon ka ba nga modiretso dayon sa punto? Ang mga tawo ba diha sa inyong kasilinganan mahunahunaon sa mga suliran nga ginasagubang sa katawhan?
Hayan mapapaminaw mo sila sa pag-ingon sama niini:
◼ “Maayong buntag. Ang akong ngalan maoy ______. Mabalaka ako sa dihang akong mabasa bahin sa mga tawong ginagutom ug ginapatay diha sa mga gubat. Nabalaka ka ba?” Ang ubang mga sukna nga makabulig sa pagsugod ug panaghisgot maoy: “Sa hunahuna mo aduna kahay makawagtang sa mga suliran sa yuta karong mga adlawa?” “Unsa kaha kon ang usa ka magmamando adunay mga katakos sama nianang gihisgotan sa Isaias 9:6, 7? [Basaha ug komentohi ang teksto.]”
3 Diha sa ubang mga teritoryo, ang mga tawo hayan nagapakitag mas dakong kabalaka sa ilang puy-anan ug pamilya kay sa kalinaw sa kalibotan.
Basin mapukaw ang interes sa pag-ingon:
◼ “Unsang matang sa kinabuhi ang buot mong makita sa imong pamilya sa napulo ka tuig? Ang panglantaw sa Bibliya sa ugma-damlag maoy makapadasig kaayo kay kana nagatagna sa pag-abot sa usa ka magmamando nga momando pinaagig hingpit nga mga sukdanan. Matikdi kon unsa ang giingon bahin kaniya sa Isaias 9:6, 7.”
4 Anaa ka ba magpuyo sa dapit diin ang krimen ug kahilwasan mao ang ulohan sa matag karon ug unya?
Ikaw makaingon man:
◼ “Halò. Kami nagapakigsulti sa mga tawo maylabot sa personal nga kahilwasan. Adunay daghang krimen sa atong palibot, ug kana nagaapektar sa atong kinabuhi.” Dayon ang usa ka pangutana sama sa “Unsa man ang sulbad?” o “Unsa kaha kon ang usa ka magmamando adunay mga katakos sama niini?” hayan makabulig sa pagsugod sa panaghisgot. Dayon imong magamit ug mabasa ang Isaias 9:6, 7.
5 Ang tanan kanato, apil ang mga batan-on, makagamit man niining yano usa-ka-tekstong mga presentasyon. Atong mapaneguro nga sila malipay sa paggamit niining mga presentasyona sa Pebrero, sa motanyag man sa mga magasin o sa dihang ipresentar ang regular nga tanyag.
6 Kon sa epektibo magamit mo ang unang 30 ka segundos sa imong duaw, pinaagi man sa imong panggawi ug pasiuna mo, lagmit makab-ot mo ang importanteng tumong sa pagpapaminaw sa mga tagbalay.