Pangutana
◼ Nganong kinahanglan nga atong hatagag linaing pagtagad ang atong pamesti ug pamostura sa dihang nagaduaw sa mga pasilidad sa Sosyedad sa Brooklyn, Patterson, ug Wallkill, New York, ug mga sangang opisina sa tibuok kalibotan?
Gidahom nga huptan sa mga Kristohanon ang hustong pamatasan. Sa tanang panahon ang atong pamesti ug pamostura angayng magbanaag sa kaligdong ug dignidad nga angay sa mga alagad ni Jehova nga Diyos. Kini ilabinang tinuod sa dihang nagaduaw sa mga pasilidad sa Sosyedad sa New York ug sa mga sanga palibot sa kalibotan.
Sulod sa 1998, ang distrito ug internasyonal nga mga kombensiyon pagahimoon. Linibo sa atong mga igsoon gikan sa daghang kayutaan moduaw sa mga hedkuwarter sa Sosyedad sa New York maingon man sa mga sanga sa ubang kanasoran. Dili lamang sa dihang nagaduaw niini nga mga pasilidad apan bisan unsang ubang panahon usab, kita angay nga ‘magrekomendar sa atong kaugalingon ingong mga ministro sa Diyos sa matag paagi,’ lakip na ang atong hustong pamesti ug pamostura.—2 Cor. 6:3, 4.
Sa paghisgot sa kabililhon sa hustong pamesti ug pamostura, ang Organisado sa Pagtuman sa Atong Ministeryo nagakomento sa panginahanglan sa pisikal nga kahinlo, makasaranganong pamesti, ug maayong pamostura sa dihang kita makig-ambit sa ministeryo sa kanataran ug motambong sa Kristohanong mga tigom. Dayon, sa panid 131, parapo 2, kini nagaingon: “Mao usab ang himoon sa dihang moduaw sa puy-anan sa Bethel sa Brooklyn o sa bisan haing sangang opisina sa Sosyedad. Hinumdomi, ang ngalang Bethel nagakahulogang ‘Balay sa Diyos,’ mao nga ang atong senina, pamostura ug pamatasan kinahanglang susama nianang gidahom kanato sa dihang motambong kitag mga tigom alang sa pagsimba didto sa Kingdom Hall.” Kining samang taas nga sukdanan kinahanglang sundon sa mga magmamantala sa Gingharian gikan sa lokal nga dapit maingon man kadtong maggikan sa mas lagyong mga dapit kinsa moabot sa pagtan-aw ug pagpakig-uban sa mga membro sa pamilyang Bethel ug sa pagduaw sa mga pasilidad sa sanga.
Ang atong pamesti kinahanglang adunay positibong impluwensiya sa uban kon sa unsang paagi ilang lantawon ang matuod nga pagsimba kang Jehova. Bisan pa niana, namatikdan nga sa dihang nagaduaw sa mga pasilidad sa Sosyedad, ang pipila sa mga igsoong lalaki ug babaye mahilig nga hilabihan ka kaswal sa ilang pamesti. Ang maong besti dili angay sa dihang nagaduaw sa bisan hain sa mga puy-anang Bethel. Maylabot niini, sama sa tanang ubang bahin sa atong Kristohanong kinabuhi, buot natong huptan ang samang taas nga mga sukdanan nga nagapaila sa katawhan sa Diyos gikan sa kalibotan pinaagi sa atong pagbuhat sa tanang butang alang sa himaya sa Diyos. (Roma 12:2; 1 Cor. 10:31) Maayo usab ang pagsulti sa atong mga estudyante sa Bibliya ug sa uban kinsa tingali moduaw sa Bethel sa unang higayon ug pahinumdoman sila sa pagkabililhon sa paghatag ug pagtagad sa tukmang pamesti ug pamostura.
Busa sa dihang nagaduaw sa mga pasilidad sa Sosyedad, suknaa ang kaugalingon: ‘Makasaranganon ba ang akong pamesti ug pamostura?’ (Itandi ang Miqueas 6:8.) ‘Nagabanaag ba gayod kini sa Diyos nga akong ginasimba? Ang uban ba lainan o mapandol sa akong panagway? Nagpahiluna ba akog maayong panig-ingnan alang sa uban nga tingali moduaw sa unang higayon?’ Hinaot nga kita sa kanunay, pinaagi sa atong pamesti ug pamostura, ‘magdayandayan sa pagtulon-an sa atong Manluluwas, ang Diyos, sa tanang butang.’—Tito 2:10.