Gikan sa Among mga Magbabasa

Binabang Pasipala Gipanghinaot ko nga ang tanang batan-on sama kanako makapabili sa mga kaayohan sa pagpadapat sa mga sugyot nga gihimo diha sa inyong artikulo bahin sa binabang pasipala. (Hunyo 8, 1989) Pinaagi sa pagpadapat sa mga prinsipyong gilaraw dinha, karon ako may maayong relasyon uban sa akong mga ginikanan nga dili magtutuo.

S. C., Italya

Kuto Gipili ko ang “Kuto” ingong ulohan sa usa ka taho sa eskuylahan ug gibase kana sa inyong artikulo. (Agosto 22, 1989) Pila ka adlaw sa ulahi, ang kuto sa ulo nadiskobrehan diha sa usa sa mga estudyante sa among eskuylahan. Kadaghanan sa akong mga klasmet hugot nagtuo nga ang kuto sa ulo hikit-an lamang diha sa mga tawong hugawan. (Kana usab ang akong hunahuna hangtod nga nabasa nako ang maong artikulo.) Busa gibasa sa akong magtutudlo ang akong report ug nagwagtang sa ilang sayop nga pagsabot.

Y. N., Hapon

Astrolohiya Ako sukad dili gayod interesado sa astrolohiya ug mao nga walay gana sa pagbasa sa isyu sa Pagmata! bahin sa maong ulohan. (Nobyembre 22, 1989) Apan samtang gisugdan ko kana sa pagbasa, akong nasabtan unsa ka talagsaon ang paggahom niining satanasnong panghunahuna diha sa dakong bahin sa katawhan. Ako dulot nalipay sa tin-aw nga pangatarongan ug gibati ang tinuod nga pagpabili sa pagsabot nga gihatag niana kanako.

J. A., New Zealand

Aseite Ang artikulong “Aseite sa Pag-alagad Kanimo​—Tingali!” (Nobyembre 22, 1989) makaiikag kaayo ug matulon-anon. Naangayan ko ilabina ang inyong paagi sa pagsulat niana gikan sa punto de vista sa usa ka tinulo sa aseite. Sayon kadto nga sabton ug deretso sa punto!

J. W., Tinipong Bansa

Lantugi Bahin sa Dugo Gibasa ko ang artikulong “Naningkamot ang mga Doktor sa Pagkuha sa Akong Anak nga Babaye” ug nakahilak sa kalipay alang sa mga Deskin ug sa ilang anak nga babaye [nga nakalingkawas nga ipugos kaniya ang dugo]. (Oktubre 22, 1989) Ang akong anak babaye, si Dana, nakaagom ug grabeng mga pagkasunog ug naospital. Mitungha ang isyu sa dugo. Bisan pa sa akong labing dakong paningkamot sa pagtutol, gipugos ang dugo kang Dana. Busa ako tinuod nga makasabot kon unsay gibati sa mga Deskin panahon sa ilang pagsulay. Angay silang dayegon tungod sa ilang pagtuo kang Jehova nga Diyos.

D. C., Tinipong Bansa

Nakadiskobre sa “Pagmata!” Ako nagpaabot sa akong turno sa usa ka barberiya sa dihang ako nangitag magasin aron mabuligan ako sa pagpalabay sa oras. Nga wala ko lang hiamgohi kadto, nagugol ko ang ubay-ubayng minutos sa pagbasa sa usa ka magasing gitawag Pagmata! Ako tinuod natingala sa pagdiskobre nga ako nawili kaayo sa natagong katahom sa mensahe nga nasulod sa lainlaing mga artikulo niini.

H. P. C., Brazil

Espesyal nga mga Panginahanglan Salamat kaayo sa artikulo bahin sa mga baldado. (Agosto 22, 1989) Kami may anak babaye nga nagagamit ug wheelchair, ug kinahanglan ang dakong panahon aron sa pag-andam alang sa Kristohanong mga tigom ug sa pagsulod ug paggawas sa among sakyanan panahon sa among ganghaan-sa-ganghaang ministeryo. Kami makaabot nga tukma sa panahon sa mga tigom ug nagakalipay pag-ayo sa espirituwal nga pagkaon, apan walay mausa ang tinuod nasayod unsa ka dakong paningkamot ang kinahanglan aron maatua didto. Si Jehova nagahatag kanamo sa kusog; kon wala pa siya maghatag, dili kami makaabot sa tukmang panahon.

S. A., Tinipong Bansa