Mga Instrumento sa Dili Mahanduraw nga Pagsakit

ANG mga pulong ba nga “tangkol,” “pagsakit,” ug “pagpatay” magpakurog kanimo? Alang sa daghang libolibong biktima sa Inkwisisyon ug sa mga paghusay sa gituohang mga abat sa Uropa (tali sa ika-13 ug sa ika-19ng siglo), kini sila maoy masakit nga kamatuoran. Ang mga instrumento nga gihulagway dinhi, nga iya sa museyo sa Rüdesheim sa Rhine, sa Alemanya, maoy gikan nianang panahona. Kini naghatag kanatog ideya bahin sa pag-antos sa mga biktima.

Ang makaluluoy nga biktima nag-antos sa dili mahanduraw nga kasakit sa dihang gipalingkod nga hubo aron sukitsukiton diha sa lingkoranan sa Inkwisisyon, nga napuno sa hait nga mga tunok. Ang mga bukton, bitiis, o mga lutahan sa biktima gibali o gidaot pinaagi sa mga tornilyo sa tuhod. Ang mga kuyamas sa iring gigamit aron mahiwahiwa ang iyang unod; walay bahin sa lawas ang gilaktawan. Ang kuwelyong may tunok nagpagangrena sa liog, mga abaga, ug apapangig sa biktima, nga daling motultol sa pagkahilo sa dugo ug kamatayon.

Ang mga tigpasiugda sa inkwisisyon nga gisugo sa Iglesya Romana Katolika migamit niini ug sa susamang mga instrumento sa pagsilot sa mga magsusupak​—nga ang kadaghanan maoy ordinaryong mga tawo nga gisaway ug kansang “pagkumpisal” niining tungora gipugos gikan kanila pinaagi sa pagsakit. Sa pagkatinuod, panahon sa papanhong Inkwisisyon nga naglangkit sa Waldenses, ang mga instrumento sa pagsakit gibendetahan pa.

Ang Kakristiyanohan may bug-at nga palas-anon sa pagkasad-an tungod sa Inkwisisyon. Ang historyano nga si Walter Nigg nagbatbat: “Ang Kakristiyanohan dili makasinatig dugang nga mga panalangin hangtod nga kini sa kataposan moangkon​—sa dayag ug tim-os nga kombiksiyon​—sa mga sala nga nahimo sa Inkwisisyon, nga sinsero ug bug-os nga nagsaway sa tanang matang sa kapintasan maylabot sa relihiyon.”

[Mga hulagway sa panid 31]

Lingkoranan sa Inkwisisyon

Mga tornilyo sa tuhod

Kuwelyong may tunok

Mga kuyamas sa iring

[Credit Line]

Tanang letrato: Mittelalterliches Foltermuseum Rüdesheim/Rhein