Gikan sa Among mga Magbabasa

Kabalaka sa Impormasyon Akong gibasa ang seryeng “Kabalaka sa Impormasyon​—Sa Unsang Paagi Naapektahan Ka Niini?” (Enero 8, 1998) Nag-ingon kamo nga ang naghingaping impormasyon sa usa ka bahin mahimong tungod sa pagdaghan sa mga mantalaan ug mga magasin. Akong gibati nga ang inyong magasin mahimong nakapadugang niini nga paghingapin. Dili ba usa kini ka pananglitan sa mapihigong pagsaway?

J. K., Tinipong Bansa

Ang among serye nagyagyag sa paghingapin sa “walay pulos” nga impormasyon. Ang “Pagmata!” tino nga wala makaamot niini, tungod kay ang gipahayag nga katuyoan niini mao ang ‘pagtugkad sa kahiladman ug pagpunting sa tinuod nga kahulogan sa mga hitabo karon.’ Ang ingon nianang impormasyon dili gayod matawag nga walay pulos.​—ED.

Si Maria ug ang Nabanhawng Kristo Nagsulat ako aron magreklamo bahin sa usa ka artikulo sa “Pagpaniid sa Kalibotan,” nga, “Si Maria ang Unang Nakakita sa Nabanhawng Kristo?” (Enero 8, 1998) Inyong gipasundayag ang inyong kawalay-alamag sa Kasulatan, nga nagpadayag usab sa kakulang ug interes sa kamatuoran. Dunay daghang butang nga nahitabo ug gisulti nga wala maapil sa Bibliya. Basaha ang Juan 21:25.

J. G., Tinipong Bansa

Ang among artikulo nagtaho lamang sa gipahayag sa opisyal nga mantalaan sa Vatican nga “L‘Osservatore Romano.” Si Papa Juan Paulo II gikutlo diha niana nga nag-angkong si Maria “lagmit mao ang unang tawo nga gipakitaan sa nabanhawng Jesus.” Bisag among gitahod ang katungod sa among mga magbabasa nga motuo sumala sa ilang gusto, wala gayoy Biblikanhong pamatuod alang sa maong pahayag.​—ED.

Mga Trobador Ang artikulong “Ang mga Trobador​—Labaw pa kay sa mga Mag-aawit sa mga Awit sa Gugma” (Pebrero 8, 1998) maoy usa ka hanas nga pagtuki sa papel nga gidula niining mga mag-aawit-magbabalak diha sa edad medyang katilingban. Ingong usa ka magtutudlo sa literatura, akong natun-an ang mga trobador sa Portugal, ug ang inyong artikulo nakatabang kanakong masabtan kining artistikanhong kalihokan sa kinatibuk-ang kahulogan niini. Ang mga artikulong may ingon niining kalidad nagahatag ug kredibilidad sa inyong magasin.

R. N. A., Brazil

Angkonon kong nanginahanglag paningkamot aron makasugod sa pagbasa niining artikuloha, apan sa dihang nakasugod na ako, nakuha gilayon niini ang akong interes. Ilabina, nalipay akong mahibaloan kon kinsa ang lagmit nga nagsugod sa kostumbre nga “babaye-una.” Ang Hapon walay “babaye-una” nga kostumbre, apan ang akong bana, nga gimatuto ingong usa sa mga Saksi ni Jehova gikan sa pagkabata, wala mapakyas sa pagsunod sa maong batasan sukad kami nagsabot nga magminyo. (Ikalima na karon namo nga tuig sa kaminyoon.) Malipayon ako kaayo.

Y. N., Hapon

Mga Crossword Puzzle Buot ko kamong pasalamatan sa bug-os kong kasingkasing tungod sa mga crossword puzzle. Makadasig kini kanimo nga kuhaon ang imong Bibliya ug pangitaon ang mga tubag sa usa ka sayon ug makinaadmanong paagi.

N. C., Italya

Reunyon sa Inahan ug Anak Natandog ako pag-ayo sa artikulong “Usa ka Talagsaong Panag-uliay.” (Pebrero 22, 1998) Alang kanako, ang pagkahibalo sa akong kagikan nakahimog dakong kalainan sa emosyonal nga paagi. Ang akong inahan ug amahan wala gayod magminyoay. Kanunay akong naghunahuna bahin sa akong amahan, apan nakabaton lamang akog mugbong mga tubag sa akong mga pangutana. Di pa dugay akong gipangutana ang akong inahan kon unsay kompletong ngalan sa akong amahan. Ginamit ang direktoryo sa telepono, akong nakontak ang iyang igsoong babaye, ug sa akong kahibulong, akong nasayran nga usa siya sa mga Saksi ni Jehova! Iyang gisaysay nga ang akong amahan namatay niadtong 1980, nga wala gayod maminyo. Bisan pa niana, ang akong inahan ug akong iyaan maoy tinuod nga kahupayan sa akong panahon sa panginahanglan. Ang inyong mga artikulo nahimo usab nga bahin sa proseso sa akong pagkaayo.

L. D., Tinipong Bansa