Usa ka Malamposong Kampanya nga Gigamit ang Kingdom News
“NGANONG Puno Kaayog Suliran ang Kinabuhi?—Posible ba ang Walay-Suliran nga Paraiso?” Mao kini ang ulohan sa Kingdom News No. 34, usa ka upat-ka-panid nga tract nga gipanagtag sa tibuok kalibotan sa 139 ka pinulongan panahon sa Abril ug Mayo sa miaging tuig. “Usa sa mga haylayt sa tuig” maoy pagbatbat sa mga Saksi sa Jamaica sa maong kampanya sa pag-alagad. “Usa ka dakong tuboran sa kalipay sa kaigsoonan,” maoy tawag niini sa mga Saksi sa Belgium. Sa Republika sa Czech, kadto ang unang panahon nga ang mga Saksi ni Jehova nakabaton sa kahigayonan nga makig-ambit sa pagpanagtag sa Kingdom News. Ang sanga mitaho: “Ang kampanya nagdala ug espiritu sa kasibot ug kadasig.” Ang susamang mga komento nadungog gikan sa daghang ubang kanasoran.
Ang Kingdom News No. 34 adunay espesyal nga mensahe alang niadtong nagapanghupaw ug nagaagulo tungod sa dulumtanang mga butang nga gihimo sa ngalan sa relihiyon. (Ezekiel 9:4) Kini adunay paghupay alang niadtong kansang mga kinabuhi nasamok tungod sa “makuyaw nga mga panahong lisod sagubangon” nga dili nila makontrolar. (2 Timoteo 3:1) Nga nagapunting sa Bibliya, ang tract nagpakita nga ang mga suliran sa kinabuhi masulbad sa dili madugay. Dili kaduhaduhaan ang usa ka paraiso nga walay kasamok. (Lucas 23:43) Daghang nakabasa sa Kingdom News ang nadani sa mensahe niini. Usa ka tawo sa Togo miingon sa usa ka Saksi: “Ang imong gisulti dili malalis.”
Dili ikalimod, ang pagpanagtag niining maong Kingdom News nakadanig talagsaong pagtagad. Sa Denmark usa ka tagbalay mitubag sa usa ka Saksing nagtanyag sa tract: “Mao pay akong pagbalik gikan sa Tinipong Bansa. Sa wala pa ako mobiya, may nagtanyag kanako sa inyong tract. Karon mao pay akong pag-abot dinhi, ug dihadiha ang samang tract gihatod diha sa Danes nga pinulongan!”
Madasigong Pagpaluyo Alang sa Kampanya
Ang mga Saksi ni Jehova sa tibuok kalibotan madasigong miduyog sa buluhatong pagpanagtag sa tract. Ang Austria, El Salvador, Haiti, Hungaria, Italya, New Caledonia, maoy pipila lamang sa daghang nasod nga nagtaho ug kinatas-ang ihap sa mga magmamantala sulod sa mga bulan sa dihang ang Kingdom News gipanagtag.
Sa Zambia usa ka magtatan-aw sa sirkito nagbansay sa iyang tres-anyos nga batang babaye, si Deborah, sa pagtanyag ug literatura gikan sa balay ngadto sa balay. Panahon sa kampanya sa Kingdom News No. 34, si Deborah nakapahimutang ug kapin sa 45 ka kopya sa maong tract. Ang iyang inahan nakasugod ug panagtuon sa Bibliya uban sa pipila nga midawat sa Kingdom News gikan ni Deborah.
Sa Habagatang Aprika usa ka tin-edyer mitanyag ug tract ngadto sa usa ka kauban sa tunghaan nga ginganlag Cashia. Si Cashia mibasa sa tract ug miingon: “Kahibulongan gayod kaayo kini—pagkinabuhi sa walay kataposan sa usa ka paraisong yuta! Nganong wala ako sultii mahitungod niini kaniadto?” Usa ka panagtuon sa Bibliya ang gisugdan. Sulod sa usa ka semana si Cashia nakadawat ug laing tract. Ang ikaduha naggikan sa iyang Romano Katolikong pen pal, nga nagpuyo sa Cipro. Ang pen pal misaysay kang Cashia kon nganong bakak ang mga pagtulon-an sa Romano Katolikong Iglesya ug giingnan siya nga nagplano siyang magtuon sa Bibliya uban sa mga Saksi ni Jehova. Siyempre, nagpalig-on kana pag-ayo sa determinasyon ni Cashia nga mopadayon sa iyang pagtuon.
Usa ka diyes-anyos nga batang lalaki sa Switzerland nakig-ambit uban sa iyang inahan sa pagpanagtag sa tract. Gihatagan niya ug usa ka kopya ang usa ka batan-ong babaye ug gidasig siya nga basahon kana pag-ayo. Ang batan-ong babaye nangutana sa batang lalaki kon mituo ba gayod siya sa giilustrar sa hulagway sa hapin niini—walay-kataposang kinabuhi sa yuta. Ang tubag sa batang lalaki? “Aw, oo, segurado gayod ako.” Ang babaye mipadayag dayon nga siya nangita sa tinuod nga relihiyon tungod kay daghan kaayong mga panagsumpaki sa iyang kaugalingong relihiyon. Sa pagbalik-duaw, usa ka panagtuon sa Bibliya ang nasugdan.
Dihadihang mga Sanong
Usahay ang Kingdom News nagpahinabog dihadihang pagsanong niadtong nakabasa niana. Human mabasa ang tract, ang usa ka 11-anyos nga batang babaye sa Belgium misugid ngadto sa usa sa mga Saksi ni Jehova nga siya tigpangawat ug tinda. Buot nga hilomon sa inahan sa bata ang maong butang, apan ang konsensiya sa batang babaye natukmod sa iyang nabasa, ug siya miinsister nga moadto sa manedyer sa tindahan. Sa kataposan gitugotan sa inahan ang iyang anak babaye nga mobalik ngadto sa tindahan uban sa Saksi. Ang manedyer natingala sa iyang gisugid. Sa dihang iyang nasayran nga ang Kingdom News maoy nagtukmod kaniya nga molihok niining paagiha, mikuha siya mismo ug usa ka kopya aron sa pagsusi kon unsay unod niana nga gamhanan kaayo. Ang batang babaye karon adunay mauswagong pagtuon sa Bibliya.
Usa ka Saksi sa Cameroon nagbilin ug kopya sa Kingdom News sa usa ka lalaki ug miasoy: “Pagbalik namo, among nakaplagan nga iya na kanang nabadlisan ug may ubay-ubay siyang mga pangutana. Human makadawat ug makapatagbawng mga tubag, siya mipahayag: ‘Tinuod gayod nga ang relihiyon nakaamot sa kagul-anan sa mga tawo. Ang inyong tract nakatabang kanako sa pagsabot sa daghang butang, apan gusto pa nakong masayod ug dugang.’” Siya karon adunay regular nga pagtuon sa Bibliya.
Usa ka Saksi nga namalaybalay sa Uruguay nakapahimutang ug tract sa usa ka lalaki. Ang Saksi mipadayon sa iyang buluhatong pagsangyaw gikan sa balay ngadto sa balay ug gilibot pagsangyaw ang bloke hangtod nga nakaabot siya sa pultahan sa likod sa balay sa maong tawo. Natingala siya sa pagkakaplag sa tawo nga nagpaabot kaniya, nga nagkupot sa tract. Nabasa na niya kini ug buot pa ug dugang nga impormasyon. Usa ka pagtuon ang gisugdan dihadiha.
Ang Publiko Mitabang sa Pagpanagtag
Sa Hapon usa ka batan-ong Saksi miduol sa usa ka tawo nga nag-edad ug mga 50 anyos ug nagtanyag sa tract kaniya. Ang tawo nangutana: “Unsay inyong buhaton nianang maong pulyeto kon makahibalag kamo ug mga tawong buta?” Ang Saksi miadmiter nga wala siya masayod. Giingnan siya sa tawo nga maghulat sa makadiyot ug mibalik pagsulod sa iyang balay. Mibalik siya dala ang kopya sa Kingdom News ug miingon: “Nadawat na nako ang maong pulyeto. Akong gihunahuna nga naundan kini sa makapainteres ug hinungdanong impormasyon, busa ako kining gisulat sa Braille. Palihog gamita kini alang sa mga tawong buta.” Ang tawo migugol ug daghang oras sa pagsulat sa Kingdom News sa Braille aron ang mga buta dili mapakyas sa pagdawat sa kaayohan sa unod niana.
Sa Slovakia usa ka tawo ang nakagusto pag-ayo sa tract nga nagpahimo siyag 20 ka kopya, ug iyang gipanagtag mismo kining itom ug puti nga mga kopya. Usa ka magmamantala sa Switzerland nagbilin sa Kingdom News sa usa ka pamilya ug mipadayon sa pagduaw sa ibabawng mga andana sa tinukod diin nagpuyo ang pamilya. Pagkanaog niya, gitagbo siya sa usa ka batang lalaki gikan sa maong pamilya, nga nangayo ug 19 pa ka dugang kopya sa tract. Sa eskuylahan sa batang lalaki, ang mga estudyante giasayn sa pagsulat bahin sa mga suliran ug sa pagpangita sa mga sulbad. Buot niya ug usa ka kopya sa Kingdom News alang sa matag kauban niya sa klase.
Walay Nasayloan
Kadtong nakig-ambit sa kampanya naningkamot pag-ayo sa pagseguro nga walay masayloan. Sa New Caledonia duha ka Saksi ang mibiyahe paingon sa teritoryo sa usa ka hilit nga tribo aron sa pagpanagtag sa Kingdom News. Sa pagpadulong didto, nakamatikod sila ug usa ka dalan nga morag wala gamita, apan bisan pa niana mihukom sila sa pagsusi kon may nagpuyo ba sa tumoy niana. Gibiyaan ang kotse, sila nagbaktas subay sa agianan, nga miubog sa mga sapa hangtod nga sa kataposan nakakaplag sila ug usa ka balay. Usa ka magtiayon nga wala pa sukad makadungog bahin sa mga Saksi ni Jehova maoy nagpuyo didto, ug midawat sila ug kopya sa Kingdom News. Sa ulahi ang mga magmamantala miduaw pag-usab ug sa ilang katingala nakakaplag nga ang magtiayon nag-ayo sa dalan ug sa daghang gagmayng mga taytayan aron ang mga Saksi makadrayb sa ilang kotse hangtod sa balay. Usa ka regular nga pagtuon sa Bibliya ang nasugdan.
Sa Polandia usa ka Saksi ang kinahanglang moagi sa dapit diin may konstruksiyon aron makatanyag ug kopya sa Kingdom News ngadto sa usa ka tagbalay. Ang mga trabahante nagtan-aw samtang siya mibalik pag-agi sa dapit nga may tinukod. Sa kataposan, usa sa mga trabahador mitawag kaniya, nga mihangyo kaniya nga dili sila kalimtan. Sa dihang miduol siya kanila, sila mihunong ug namati pag-ayo sa pagtanyag sa tract. Midawat sila ug mga kopya sa Kingdom News maingon man sa mga magasin ug sa ulahi, sa pagbalik-duaw, mga libro.
Gatosan ka milyong Kingdom News No. 34 ang gipanagtag sa daghang pinulongan. Ang mensahe niini aduna nay gamhanang epekto. Daghan ang nakahibalo nga posible ang walay-kasamok nga paraiso. Kami nagaampo nga ang matarong-ug-kasingkasing nga mga tawo padayon nga mosanong ug sa kataposan mahilakip sa “mga maaghop” nga “makapanunod sa yuta, ug . . . makakaplag ug tumang kalipay sa kadagaya sa pakigdait.”—Salmo 37:11.
[Kahon sa panid 31]
Magpadayon sa Pagpanagtag sa mga Magasin!
Sa Abril ug Mayo 1995 gihimo ang usa ka malamposon kaayong kampanya sa pagpanagtag sa Kingdom News No. 34. Sulod nianang duha ka bulan, dihay talagsaon usab nga pagpanagtag sa mga magasing Bantayanang Torre ug Pagmata! Usa ka igsoong lalaki sa Republika sa Czech, pananglitan, nagtaho nga sa Abril siya nagpahimutang ug 250 ka kopya sa Kingdom News ug 750 ka magasin. Sa Guadeloupe, ang Sabado, Abril 15, maoy napili nga espesyal nga adlaw sa magasin. Halos ang matag magmamantala sa nasod misangyaw nianang adlawa! Ang Slovakia may bag-ong kinatas-ang gidaghanon sa napanagtag nga magasin sa Abril. Ang susamang mga taho naggikan sa daghan pang mga nasod.
Busa nganong dili himoon ang Abril ug Mayo 1996 nga tagsaong mga bulan alang sa pagpanagtag ug magasin? Ang mga kongregasyon makaorganisar ug espesyal nga mga adlaw sa magasin. Ang mga indibiduwal makahimo sa buluhatong pag-oksilyare payunir. Niini ug sa ubang mga paagi, ang pagpanagtag ug magasin mahimong idasig, ug ang hinungdanong mensahe nga gimantala sa Kingdom News No. 34 magpadayon nga isabwag. Unya, sama sa nahitabo sa miaging tuig, tinong panalanginan ni Jehova ang madasigong espiritu nga atong gipakita.—2 Timoteo 4:22.