Paglambigit sa Atong Pasiuna Uban sa Basahon
1 Sa dihang mangandam sa imong presentasyon niining bulana, lagmit tagdon mo pag-una ang dagkong mga suliran nga giatubang sa katawhan sa imong dapit ug unya pilia ang mga pahayag gikan sa usa ka brosyur nga nagapunting sa Kasulatanhong sulbad.
2 Diha sa pipila ka silinganan, ang katawhan lagmit nabalaka sa pagkawalay trabaho ug hataas nga bili sa panginabuhi. Kon ikahibalag mo kanang kahimtanga, mahimong tino mong mahisgotan ang suliran diha sa imong pasiuna.
Makaingon ka:
◼ “Nahisgotan namo sa among mga silingan ang bahin sa kon unsay mahimo aron maseguro nga adunay panarbaho ug puy-anan alang sa tanan. Nagatuo ka ba nga makataronganon ang pagdahom nga malampos kini sa tawhanong mga gobyerno? [Tugoting motubag ang tagbalay.] Adunay usa nga nasayod kon unsaon pagsulbad niining mga sulirana; matikdi ang iyang masaligong saad sa Isaias 65:21-23. [Basaha.] Ang atong Maglalalang mipasulat niining saara sa pagdasig kanato, ug kitang tanan nagakinahanglan niana niining malisod nga mga panahon, dili ba?”—rs, p. 11.
3 Niining puntoha sa imong presentasyon, ikasumpay mo ang materyal gikan sa usa sa mga brosyur. Kon ginatanyag mo ang “Tan-awa!” nga brosyur, nganong dili ipakita kon sa unsang paagi ang panghunahuna sa pamalay ug panarbaho alang sa tanan gihulagway diha sa atubang ug luyong mga hapin sa brosyur. Imong mabuksan kini aron makita sa tagbalay ang tibuok hulagway sa usa ka panahon.
4 Sa mga teritoryo nga ang mga tagbalay may nagkadaiyang mga kabalaka, ang mas mapaayon-ayonon nga pasiuna mapuslanon. Mahimong masulayan mo ang ikaduhang pasiuna nga nalista diha sa librong Nangatarongan ubos sa “Gingharian.”
Makaingon ka:
◼ “Si Jesus mitudlo kanato sa pag-ampo nga moabot ang Gingharian sa Diyos ug nga matuman ang Iyang kabubut-on dinhi sa yuta maingon man sa langit. Gihunahuna ba nimo nga kon ang kabubut-on sa Diyos matuman dinhi, ang yuta mahimo gayong usa ka paraiso?” Human makatubag ang tagbalay, ipaila ug basaha ang Pinadayag 21:3-5.
Unya, kon ginatanyag mo ang brosyur nga Kagamhanan, basaha ang piniling mga bahin sa nagapasiunang parapo sa panid 3. Matikdi ang giingon: “Pinaagi sa Gingharian, taposon sa Diyos sa dili madugay ang mga gubat, gutom, sakit, ug krimen.” Suknaang tagbalay kon hain niining mga sulirana ang iyang gibating labing seryoso.
5 Ang kabatan-onan usab epektibong makapresentar sa mensahe sa Gingharian, bisan ngadto sa mas tigulang nga mga tawo.
Sa pagpaila sa Isaias 65:21-23 ang batan-ong mga magmamantala makaingon:
◼ “Nahibalo ko nga ingon nga mas gulanggulang na ikaw labaw nga nasinati sa kinabuhi kay kanako, apan kining tekstoha makalipay natong tanan.”
6 Paneguroang makahimog mainampingong talaan sa bisan unsang napahimutang, lakip na ang tinong mga brosyur o magasin nga napahiluna. Gikinahanglan mo kining impormasyona sa dihang mobalik ka aron pag-ugmad sa interes.