Gamitang Maalamon ang Hinungdanong mga Himan
1 Samtang nagasangyaw ka gikan sa ganghaan ngadto sa ganghaan, ang imong tumong mao gayod ang paglangkit sa kada tagbalay sa usa ka Kasulatanhong panaghisgot pinaagig paggamit sa Bibliya ug uban pang hinungdanong mga himan. (Itanding 2 Corinto 6:1; 2 Timoteo 2:15.) Unsa may gikabalak-an sa katawhan sa imong teritoryo niining mga adlawa? Nabalaka ba sila bahin sa ekonomikanhong kahimtang ug sa pag-us-os sa kalidad sa kinabuhing pamilyahanon? Ang pipila pasiunang mga pulong sa bisan hain niining mga ulohana makatultol ngadto sa usa ka maayong panaghisgot sa Bibliya.
2 Makaingon ka:
◼ “Niining mahagitong mga panahon, daghang tawo ang nalisdan sa ekonomiya. Gihunahuna mo bang ang tawhanong mga kagamhanan magasulbad sa atong suliran sa panalapi? [Pamatiang tubag.] Personal kong nakaplagan nga labing makapadasig kining puntoha . . . ”
3 Unya mabasa mo ang Salmo 72:12-14 ug usab pilia ang usa ka dugang teksto gikan sa mga panid 87-8 sa librong Nangatarongan (154-5 sa Ingles). O human nga mabasa ang usa ka kasulatan, ikapunting mo ngadto sa usa ka parapo diha sa tract nga Kinabuhi sa Malinawong Bag-ong Kalibotan. Daghang magmamantala—lakip ang mga batan-on—malamposong nakasugod ug mga pagtuon sa Bibliya diha sa tracts pinaagig pagbasa sa usa ka parapo ug dayon nangutana sa tagbalay alang sa iyang opinyon sa kon unsay gibasa.
4 Diha sa pipila ka komunidad mahimong palabihon mong gamiton kining paagiha:
◼ “Daghang tawo buot nga molantaw sa pagbalik sa tradisyonal nga kinabuhing pamilyahanon. Gihunahuna ba nimong ang matag indibiduwal kinahanglang modesider kon unsang mga prinsipyoha ang angayng sundon, o kinahanglan bang adunay usa ka suntoan alang sa tanan? [Tugoting motubag.] Daghan ang mouyon nga kon sundon ang tambag sa Bibliya, aduna gayoy madayag nga kauswagan diha sa kalidad sa kinabuhing pamilyahanon.”
5 Niining puntoha buot mong gamiton ang mga puntos ubos sa sub-ulohang “Haing Dalan sa Kalamposan?” diha sa bag-ong tract nga Magkalipay sa Kinabuhing Pamilyahanon sa pagsugod ug usa ka pagtuon sa Bibliya, o mapakli mo ang kapitulo 29 sa librong Mabuhing Walay Kataposan ug ipakitang mga puntos sa mga panid 243-6.
6 Kon mahimo mo ang pagsugod ug pagtuon sa unang duaw, himoang tinong mga kahikayan sa pagpadayon sa panaghisgot sa ulahing panahon. Ikapahiluna mo ang pasukaranan alang sa imong sunod nga duaw pinaagig pagsulti sa tagbalay nga sa imong pagbalik buot mong ipaambit ang tubag sa kasagarang gisuknang pangutana: “Nganong Gitugotan sa Diyos ang Pagkadaotan?” Ang artikulo sa ubos magasugyot kon sa unsang paagi ang ulohan matagik diha sa pagbalikduaw.