Usa ka Espesyal nga Kingdom News Alang sa Tagsatagsa
1 Sugod sa Abril 24, atong gisugdan ang pagpanagtag sa espesyal nga Kingdom News nga nakapukaw sa interes sa nabalakang katawhan sa bisan diin! Ang mensahe niini dili lamang nunot-panahon apan dinalian usab. Ang mga magmamantala sa matag kongregasyon nagpahayag sa tinguhang ihatod kining mensahea ngadto sa mga kamot sa linibong katawhan. Ikaw ba nagatinguha alang sa bug-os nga pakig-ambit?
2 Ang igong suplay sa Kingdom News gipadala sa matag kongregasyon. Pila na man ang imong naarangan sa pagpanagtag? Kon wala ka makahimo sa pagbuhat sumala sa imong gilaoman, makabuhat ka bag dugang una pa matapos ang pagpanagtag sa Mayo 14? May mahimo ba sa pagpalista ingong usa ka oksilyare payunir?
3 Ang mga ansiyano magasusi pag-usab kon nakobrehan ba ang tanang teritoryo sa pagka-Mayo 14. Kon wala, ang mga ansiyano angayng mokontak sa silingang mga kongregasyon aron pagpangayog tabang. Ang atong bug-os kasingkasing nga mga panikaysikay, uban sa maayong kooperasyon tali sa mga kongregasyon, angayng magpalampos sa buluhaton.
4 Lagmit natagamtam nimo ang dugang kalipay niining buluhatona tungod kay daghan kaayong nagapakig-ambit, lakip na ang bag-ong mga magmamantala ug mga batan-on. Gilaoman, nga kining espirituha sa kalipay magpadayon, nga magadasig sa tanan sa paghimog mga balikduaw niadtong mauyonong misanong. Kita giawhag sa paghupot ug tukmang mga rekord sa pamalaybalay, nga nagalista niadtong nagapakitag interes. Ang ulahing bahin sa Mayo maoy maayong panahon sa paghimog mga balikduaw uban ang tumong sa pagsugod ug bag-ong mga pagtuon.
5 Unsa may atong isulti sa dihang mobalik? Basin makaplagan nimong epektibo ang pag-ingon: “Tingali nahinumdoman nimo ang tract nga akong gibilin nimo di pa dugay; ako naglaom nga may kahigayonan ka sa pagbasa ug pagpamalandong niana. Ang mensahe niini nakapahinabo gayod ug daghang panaghisgot sa atong komunidad, sanglit kay nagahisgot man kini sa hinungdanong mga isyu nga giatubang sa tanang katawhan.” Ipunting sa pipila ka nagapalihok-hunahunang mga pahayag diha sa ikaduhang panid, ug unya mangutana: “Unsa man ang imong gihunahunang atong kinahanglang buhaton aron makaseguro nga andam kita kon unsay mahitabo sa umaabot?” Tugoting motubag. Kon gipakita ang interes, hisgoti ang ubang mga puntos sa mga panid 2-4 sa Kingdom News, ug itanyag ang usa ka pagtuon sa Bibliya.
6 Kon ikaw nagakobre sa teritoryo sa laing kongregasyon, seguroang ikahatag nianang kongregasyona ang tanang mga ngalan sa bisan kinsang interesado nga imong nakaplagan aron nga mahimo ang mga balikduaw sa mga magmamantala nianang kongregasyona.
7 Ang espesyal nga pagpanagtag niining maong Kingdom News nakapahinam ug nagpalihok natong tanan sa pagpakusog sa atong mga panikaysikay sa buluhatong pagwali sa Gingharian. Kita makasalig nga kini magmalamposon gayod, nga nagapauswag sa pagkahibalo sa katawhan bisan diin sa dakong ngalan ug katuyoan ni Jehova. (Isa. 12:4, 5) Sa dugang pa nga kita magabuhat, mas dako man ang atong kalipay.—Sal. 126:3.