Mahimong mga Magtutudlo sa Pulong sa Diyos—Ginamit ang mga Brosyur
1 Ang matag dedikadong alagad ni Jehova kinahanglang mahimong magtutudlo sa Pulong sa Diyos. Si Jesus nagsugo kanato sa “paghimog mga tinun-an sa katawhan sa tanang kanasoran, ... nga magatudlo kanila.” (Mat. 28:18-20) Busa, ang pagpakig-ambit sa pagwali sa maayong balita nanginahanglang mahimo kitang mga magtutudlo!—2 Tim. 2:2.
2 Sa Agosto atong magamit ang atong mga katakos sa pagpanudlo sa dihang magatanyag ug mga brosyur. Kita makapili ug pipila ka makapainteres nga Kasulatanhong mga hunahuna diha niini ug mangandam ug pipila ka komento nga makatabang kanato sa pagsugod ug usa ka panaghisgot.
3 Kon nagatanyag sa brosyur nga “Tinuod Bang May Pagtagad ang Diyos Kanato?” ikaw makaingon:
◼ “Among nakaplagan nga daghan sa imong mga silingan nabalaka bahin sa kusog nga pagsulbong sa krimen, terorismo, ug kapintasan. Sa imong hunahuna, nganong nahimo man kining usa ka problema? [Tugoting motubag.] Takos tagdon nga ang Bibliya nagtagna nga kini mahitabo. [Basahang 2 Timoteo 3:1-3.] Matikdi nga kini mahitabo sa ‘kataposang mga adlaw.’ Kini nagapasabot nga adunay usa ka butang nga matapos. Sa imong hunahuna unsa man kana?” Tugoting motubag. Paklia ngadto sa panid 22, ipunting ang ilustrasyon, ug hisgoti ang usa o duha ka kasulatan nga gikutlo sa maong panid. Himoang mga kahikayan sa pagbalik.
4 Hayan buot nimong gamiton kining paagiha kon nagatanyag sa brosyur nga “Unsa ang Katuyoan sa Kinabuhi—Sa Unsang Paagi Makaplagan Nimo Kini?”:
◼ “Daghang tawo ang nalisdan sa pagkaplag ug tinuod nga katuyoan sa pagkinabuhi. Samtang ang pipila nagatagamtam ug pipila ka kalipay, ang mga kinabuhi sa kadaghanan napuno sa kahiubos ug pag-antos. Gihunahuna ba nimong mao kini ang paagi nga buot sa Diyos nga kita mabuhi? [Tugoting motubag.] Ang Bibliya nagapakita nga ang Diyos buot nga mabuhi kita sa usa ka kalibotan nga sama niini.” Ipakita ang ilustrasyon sa panid 21, ug unya paklia ngadto sa mga panid 25 ug 26, mga parapo 4-6. Ipatungha kining pangutanaha alang sa panaghisgot sa dihang ikaw mobalik: “Sa unsang paagi kita makaseguro nga tumanon sa Diyos ang iyang mga saad?”
5 Mahimong itanyag nimo ang brosyur nga “Tagamtama ang Kinabuhi sa Yuta sa Walay Kataposan!” pinaagig pagpakita sa bug-os nga hulagway sa atubang ug likod nga mga hapin ug mangutana:
◼ “Buot ba nimong magpuyo sa usa ka kalibotan nga sama niini? [Tugoting motubag.] Ang Bibliya nagatug-an kanato nga gihigugma sa Diyos ang katawhan ug buot nga magpuyo sila sa walay kataposan diha sa kalipay sa yuta.” Paklia ngadto sa hulagway sa numero 49, ug basaha ang usa sa gisitar nga mga teksto. Unya, diha sa hulagway sa numero 50, ipakita kon unsay kinahanglan natong buhaton aron makapuyo sa Paraiso. Itanyag nga mobalik alang sa dugang panaghisgot.
6 Si Jehova malipay kon atong ‘ipadayag ang atong pag-uswag pinaagig pagtagad sa atong pagpanudlo.’ (1 Tim. 4: 15, 16) Ang atong mga brosyur mahimong usa ka tinuod nga tabang kanato sa atong mga panikaysikay sa pag-abag kanilang nangandoy sa pagpaminaw sa “maayong balita sa usa ka butang nga mas maayo.”—Isa. 52:7.