Malamposong mga Balikduaw Nagakinahanglag Epektibong Pagpanudlo
1 Nganong angay man kitang magmakugihon sa pagbalikduaw sa mga interesado? Ang ngalan ni Jehova ginapaila pinaagi niining paghimog-tinun-an nga buluhaton, ug ang mga mahinadlokon-sa-Diyos ginatabangan ngadto sa dalan sa kinabuhi. (2 Cor. 2:17–3:3) Ang pagkasayod niini angayng magpalihok kanato sa pagpangandam ug maayo una pa mobalik.
2 Ang usa ka maayong magtutudlo magatabang sa estudyante sa pagtukod diha sa pundasyon nga napahimutang na. Maingon nga ang magtutudlo nagalig-on sa kahibalo nga nabatonan sa mga estudyante sa adlaw-adlaw, kita sagad magapaloap gayod sa atong unang duaw uban sa dugang mga komento sa samang ulohan.
3 Sa dihang ikaw mobalik human mapahimutang ang brosyur nga “Tinuod Bang May Pagtagad ang Diyos Kanato?” hayan makaplagan nimo kini nga epektibo:
◼ “Sa miagi nakong duaw, atong gihisgotan ang ‘kataposang mga adlaw.’ Basig nahibulong ka kon unsaon nato pagkasayod nga kita nagakinabuhi na sa kataposang mga adlaw. (2 Tim. 3:1) Ang mga tinun-an ni Jesus nagtinguha usab nga masayod niini. [Basahang Mateo 24:3.] Sa iyang tubag, si Jesus naghubit sa mga kahimtang nga atong makita karon.” Ipunting ang bahin sa ilhanan nga gihisgotan sa mga parapo 3 ug 4 sa panid 19. Kon mauyonon ang sanong, ipadayon sa mga parapo 5-8 sa panid 20. Itanyag nga mobalik ug tubagon ang mga pangutanang gipatungha sa atubang nga hapin sa brosyur.
4 Sa pagsundal sa interes sa brosyur nga “Unsa ang Katuyoan sa Kinabuhi—Sa Unsang Paagi Makaplagan Nimo Kini?” makaingon ka:
◼ “Nagatinguha gayod ko sa pagpadayon sa atong panaghisgot bahin sa atong katuyoan sa pagkinabuhi. Sa walay duhaduha kitang duha mouyon nga gituyo sa Diyos nga mabuhi kita sa malipayon ug malinawong mga kahimtang inay kay sa kon unsay atong nasinatian karon. Gihunahuna ba nimong iyang tumanon ang iyang saad?” Tugoting motubag. Basahang Isaias 55:11, ug unya hisgoting mga parapo 25 ngadto sa 27 sa panid 30. Irekomendar ang usa ka personal nga pagtuon sa Bibliya ingong ang labing maayong paagi sa pagkaplag sa tinuod nga katuyoan sa kinabuhi.
5 Sa pagsundal sa gipakitang interes sa miagi diha sa brosyur nga “Tagamtama ang Kinabuhi sa Yuta sa Walay Kataposan!” imong ikapasundayag kana pag-usab ug moingon:
◼ “Atong naestoryahan ang bahin sa matahom nga kalibotan nga gihulagway dinhi niining maong brosyur; buot nakong sultihan ka kon nganong ang pagtuo diha kang Jesu-Kristo hinungdanon kaayo sa katawhan nga buot magpuyo didto.” Paklia ngadto sa hulagway sa 41, ug basahang Isaias 9:6. Ipunting ngadto sa hulagway sa 62, ug basahang Juan 3:16, nga nagapasiugda sa panginahanglan sa pagkamasinugtanon. Isaysay nga ang mga Saksi ni Jehova nagatabang sa mga tawo sa pagbaton ug pagtuo pinaagig pagtuon sa Bibliya ug pagsulay sa pagkinabuhi pinaagi niana.
6 Human sa matag balikduaw, suknaang kaugalingon: Ako ba may tinong butang sa hunahuna nga isulti? Ako bang nahuptan kanunay ang pagtagad diha sa Bibliya? Ako ba nagtukod diha sa pundasyon nga napahimutang na sa unang duaw? Ang ako bang presentasyon gidesinyo aron motultol ngadto sa usa ka pagtuon sa Bibliya? Ang positibong mga tubag nagapasalig nga ikaw nagapaningkamot nga mahimong usa ka maayong magtutudlo sa Pulong sa Diyos.