Tudloi ang Uban sa Gikinahanglan sa Diyos
1 Daghan pang tawo karong adlawa ang nahikawan “sa pagpatalinghog sa mga pulong ni Jehova.” (Amos 8:11) Samtang ang pipila nagatuo nga naglungtad ang Diyos, sila walay kasayoran sa iyang katuyoan ug mga kinahanglanon. Busa, adunay panginahanglan nga tudloan nato sila sa kamatuoran sa Gingharian. Pinaagig pagkanasangkapan sa tukma ug andam sa pagpamatuod sa matag kahigayonan, atong maabot kadtong kinsa buot nga makakat-on kon unsay gikinahanglan ni Jehova.
2 Sa Abril ug Mayo, makabaton kitag nunot-sa-panahon gayong mga isyu sa Ang Bantayanang Torre ug Pagmata! nga ikaapod-apod. Dugang pa, sa unang higayon, atong itanyag ang brosyur nga Unsay Gikinahanglan sa Diyos Kanato? Ang maanindot nga mga ilustrasyon niini ug makapahunahunang mga pangutana makadani sa tanang matang sa katawhan. Ang mosunod nga mga sugyot gitanyag sa pagtabang kanato sa paggamit sa atong mga publikasyon sa epektibong paagi.
3 Pagpangita sa mga Tawo: Sa mga dapit diin daghang tawo ang wala sa balay sa dihang kita moduaw sa pagpamalaybalay, maayo ang pagpangita ug pagpakigsulti sa mga tawo bisan diin sila hikaplagan. Ang pasukip sa Septiyembre 1996 nga Atong Ministeryo sa Gingharian nagdasig kanato sa pagsangyaw sa maayong balita bisan diin—diha sa dalan, sa publikong sakyanan, ug diha sa mga parke, mga paradahan, ug mga dapit negosyohanan. Nagpaamgo usab kana kanato sa panginahanglan sa paglalang ug mga kahigayonan aron sa di-pormal nga paagi makasangyaw. Ingong pananglitan niini, usa ka payunir nga sister miadto sa zoo ug nagdalag suplay sa Agosto 8, 1996, nga Pagmata! uban ang mga seryeng “Nameligrong mga Espisye—Nganong Mabalaka?” Sulod sa usa ka oras, nakapahiluna siyag 40 ka kopya ngadto sa pipila ka mapabilhon pag-ayong mga mahigugmaon ug mananap! Ang Bantayanang Torre ug Pagmata! maingon man ang Gikinahanglan nga brosyur ilabinang haom sa tanang matang sa pagpamatuod, sanglit nagpasiugda kini ug impormasyon nga makaapektar sa mga kinabuhi sa katawhan ug nagapalihok sa katakos sa panghunahuna.
4 Pagsugob ug mga Panaghisgot: Ang luyong panid sa Oktubre 1996 nga Atong Ministeryo sa Gingharian nagsaysay kon unsaon pag-andam sa atong kaugalingong presentasyon sa Bantayanang Torre ug Pagmata! nga mga magasin. Ang samang mga sugyot mahimong epektibo sa dihang mangandam sa imong presentasyon alang sa Gikinahanglan nga brosyur. Ang atong mga komento mahimong pipila lamang ka tudlingpulong o igong gitas-on aron makalakip ug usa ka Kasulatanhong punto. Hinungdanon nga maampingong pilion ang unang mga pulong, sanglit magtino kini kon ang tawo mopadayon ba sa pagpaminaw. Ang pipila nagmalamposon uban niining pasiunang komento: “Nakabasa ko ug artikulo nga nakapadasig kanako, ug buot kong ipaambit kini kanimo.” O, ang makapainteres nga pangutana ikapatungha aron mabutad ang laing tawo sa usa ka panaghisgot.
5 Kon nahiangay sa imong dapit, hayan masulayan mo ang pagsuknag mga pangutana sama sa mosunod diha sa imong mga presentasyon niining bulana:
◼ “Karong adlawa atong makita ang daghan kaayong pagsulatsulat sa mga paril, nagpasad nga basura, ug polusyon. Sa imong hunahuna unsay gikinahanglan sa paghinlo sa yuta ug paghimo niining mas maayong dapit nga kapuy-an?” Tugoting motubag, ug dayon hisgoti nga may impormasyon ka nga nagasaysay kon unsaon ug kon kanus-a ang yuta mahimong usa ka globonhong tanaman. Ipakita ang espesipikong komento, usa ka mubong kasulatan, ug usa ka mabulokong ilustrasyon gikan sa magasin, ug dayon itanyag kana ngadto sa indibiduwal. Una pa nimo taposon ang panaghisgot, sulayi ang paghikay ug usa ka balikduaw.
◼ “Sa hunahuna mo gituyo ba sa Diyos alang kanato nga kita magkinabuhing nalibotan sa mga kasamok sama kanato karon?” Human nga matubag sa tawo, ikaw makaingon: “Lagmit ikaw sinati sa pag-ampo nga gitudlo ni Jesus sa iyang mga sumusunod nga iampo, nga nangayong moabot na ang Gingharian sa Diyos. Imo ba gayong napamalandong kon unsa gayod ang Gingharian sa Diyos?” Paklia sa leksiyon 6 sa Gikinahanglan nga brosyur, ug basaha ang mga pangutana diha sa sinugdanan sa leksiyon. Dayon, samtang imong basahon ang parapo 1, ipunting ang tubag sa unang pangutana. Isaysay nga ang uban pang mga pangutana gitubag usab sa laktod. Itanyag ang brosyur, ug tanyagi nga moduaw pag-usab dala ang dugang impormasyon bahin sa Gingharian.
◼ “Daghang mahunahunaong mga tawo nagsugod sa paglantaw sa mga relihiyon sa kalibotan ingong hinungdan sa mga suliran sa tawo inay kay ang solusyon. Unsay imong hunahuna bahin niana?” Tapos makapaminaw sa panglantaw sa maong tawo, ipakita gikan sa usa sa bag-ong mga magasin ang butang nga hayan makadakop sa iyang interes bahin sa kapakyasan sa bakak nga relihiyon. Suknaa kon siya ba buot nga mobasa niana. Pakig-ilaila, ug ingna nga makigtagbo kaniya pag-usab aron imong ikasaysay kon sa unsang paagi ang tinuod nga relihiyon wala magpakyas sa katawhan.
◼ “Tungod sa daghan kaayong suliran sa kinabuhi sa pamilya karong adlawa, nahibulong ka ba gayod kon unsay sekreto sa kalipay sa pamilya?” Hulata ang tubag, ug dayon saysayi nga diha sa Bibliya ang Diyos nagabutyag sa tinuod nga sekreto sa kalipay sa pamilya. Tingali imong mabasa ang Isaias 48:17. Dayon paklia ang leksiyon 8 sa Gikinahanglan nga brosyur, ug ipakita ang pipila ka bersikulo sa Bibliya nga nagataganag giya alang sa matag membro sa pamilya. Basaha ang listahan sa mga pangutana sa sinugdanan sa leksiyon. Suknaa kon buot ba sa maong tawo nga basahon ang mga tubag. Kon mao, itanyag kaniya ang brosyur. Tanyagi nga mobalik sa sunod panahon aron mahisgotan ang dugang praktikal nga giya alang sa malipayong kinabuhi sa pamilya.
6 Ang pasukip sa Marso 1997 nga Atong Ministeryo sa Gingharian nagdasig kanato sa pagbaton ug kaisog aron makahimog mga balikduaw. Nagrekomendar kana sa paggamit sa bag-ong brosyur sa pagsugod ug mga pagtuon sa Bibliya, kon dili sa unang duaw, nan sa balikduaw. Ang labing dakong panginahanglan sa katawhan mao ang pagkakat-on kon unsay gikinahanglan sa Diyos ug dayon buhaton kana. (Col. 1:9, 10) Makahatag kitag dakong kaayohan sa uban sa Abril ug Mayo kon makasugod kita sa pagtudlo kanila kon unsay atong nasayran bahin sa mga kinahanglanon ni Jehova sa kinabuhi.—1 Cor. 9:23.