Bag-ong Programa sa Sirkitong Asembliya

“Padayong Gihuptan Gayod sa Hunahuna ang Adlaw ni Jehova” mao ang tema sa duha ka adlawng programa sa sirkitong asembliya nga magsugod sa Pebrero, 1998. (2 Ped. 3:12) Gidisenyo kini aron pukawon dinha kanato ang pagbati sa pagkadinalian. Ang mga molupyo sa yuta sa di madugay makasinati sa mga paghukom ni Jehova. Kinsay makalabang buhi sa “dakong adlaw sa Diyos nga Labing-Gamhanan”? Kadto lamang magpabiling nagamata sa espirituwal ug kinsa nagatukod sa usa ka sumbanan sa kinabuhi sa “balaang mga buhat sa panggawi ug mga buhat sa diyosnong pagkamahinalaron.”​—Pin. 16:14; 2 Ped. 3:11.

Ang bawtismo kinahanglanon aron ang tawo makalabang buhi sa adlaw ni Jehova. (1 Ped. 3:21) Ang mga magmamantala nga buot mabawtismohan didto sa asembliya kinahanglang mosulti sa nagadumalang magtatan-aw, kinsa maoy maghimog kinahanglanong mga kahikayan.

Ang upat-bahing simposyum, “Ang Matang sa mga Tawo nga Angay Mamaingon Kita,” tin-awng magpakita kon unsang mga lihok ang nalangkit sa padayong paghupot gayod sa hunahuna sa presensiya sa adlaw ni Jehova. Ang pahayag publiko nga, “Lihok nga Maalamon Samtang Nagakaduol ang Adlaw ni Jehova,” magpatin-aw kon unsay ipasabot sa ‘pagpangita kang Jehova, sa pagkamatarong, ug kaaghop,’ aron mahimong usa nga linuwas.​—Sof. 2:3.

Ang sirkitong asembliya tiklopan uban ang duha ka makapadasig nga mga pakigpulong pinaagig nagapanawng mga magtatan-aw, nga nag-ulohan: “Ang Imo Bang Kinabuhi Nasentro Libot sa Kamatuoran?” ug “Pagplanog Abante nga Anaa sa Hunahuna ang Adlaw ni Jehova.” Kini nga mga pakigpulong magtukmod kanato sa pagsusi sa atong kinabuhi ug sa paghimog bisan unsang gikinahanglang mga pagpasibo. Ang tagna sa Bibliya ug ang mga hitabo sa kalibotan tin-awng nagapakita nga ang adlaw ni Jehova haduol na. Kini nga programa sa asembliya magtukmod kanato sa ‘padayong paghupot sa atong panimuot ug magmabinantayon.’ (1 Ped. 5:8) Paghimog tinong mga plano sa pagtambong sa duha ka adlaw.