Pagmaya Diha sa Paghimog Bug-os nga Pagpamatuod
1 Kitang tanan mahimuot sa pagbuhat sa mga butang nga maayo ang atong pagkahimo. Ang Marcos 7:37 nagaingon nga ang mga panon sa katawhan nagpahayag bahin kang Jesus: “Maayo niyang pagkahimo ang tanang butang.” Dili ikatingala nga gikalipay ni Jesus ang pagbuhat sa kabubut-on ni Jehova! (Itandi ang Salmo 40:8.) Pinaagi sa pagpamalandong sa mosunod nga mga sugyot, kita usab makakaplag ug kalipay samtang atong sundon ang sugo ni Jesus “nga magwali ngadto sa katawhan ug maghatag ug bug-os nga pagsaksi.” (Buh. 10:42) Sa Enero atong itanyag ang bisan unsang 192-panid nga libro nga gipatik una pa ang 1985 nga hayan anaa sa estak sa kongregasyon o ang Kinabuhing Walay Kataposan nga libro. Unsaon man nato paggamit kining mga publikasyona sa paghimog bug-os nga pagpamatuod?
2 Sanglit ang mga tawo kasagarang nabalaka bahin sa mga isyu sa panglawas, ikaw hayan makaingon niini:
◼ “Bisan pa sa talagsaong mga kalamposan nga nahimo sa natad sa medisina, adunay tumang pag-antos tungod sa sakit. Sa imong hunahuna, nganong ingon niini? [Tugoting motubag.] Miingon si Jesu-Kristo nga ang kamatay maoy usa ka bahin sa kataposang mga adlaw. (Luc. 21:11) Apan ang Bibliya nagahubit usab sa panahon sa dihang ang sakit mawala na. [Basaha ang Isaias 33:24.] Matikdi kon sa unsang paagi kining basahona nagadasig ug paglaom nianang paninugdang pagtulon-an sa Bibliya.” Ipasiugda ang tukmang mga komento diha sa libro nga imong ginapakita ug itanyag kana sa naandang amot.
3 Sa dihang nagasangyaw nga di-pormal duol sa mga dapit negosyohanan, ikaw makatimbaya ug dayon suknaa:
◼ “Alang kanimo maorag nagkamahal ba ang mga palaliton karong mga adlawa nga malisod na ang pagbaton sa mga panginahanglan? [Tugoting motubag.] Nagahunahuna ka ba nga may panahon pang moabot sa dihang aduna pa ing tinuod nga kasegurohan sa panginabuhi?” [Tugoting motubag.] Dayon ipakita ang tukmang Kasulatanhong pangutlo gikan sa libro nga imong ginatanyag. Padayon sa pag-ingon: “Kining libroha nagapakita kon sa unsang paagi, nga pinaagi sa iyang Gingharian, ang Diyos magsulbad sa mga suliran nga nakapalisod pag-ayo sa kinabuhi karon.” Itanyag ang libro sa naandang amot. Mahimong isulti mo ang gidak-on sa imong kalipay sa maong panaghisgot, ug suknaa: “Aduna bay paagi nga atong ikapadayon kini nga panaghisgot sa laing panahon?” Niining paagiha hayan imong makuha ang numero sa telepono sa maong tawo o adres sa balay.
4 Ikaw hayan may kahigayonan nga sulayan kining presentasyona bahin sa pakigdait sa kalibotan, ginamit ang “Mabuhing Walay Kataposan” nga libro:
◼ “Sa imong hunahuna, nganong lisod kaayo kab-oton ang pakigdait sa kalibotan? [Tugoting motubag, dayon ipakita ang ilustrasyon sa mga panid 20-1.] Kini usa ka hulagway sa usa ka hitabo sa Bibliya nga gihubit sa Pinadayag. [Basaha ang Pinadayag 12:7-9, 12, deretso gikan sa parapo 17. Dayon basaha ang kapsiyon diha sa hulagway.] Ang kakulang sa pakigdait sa kalibotan maoy usa sa mga epekto sa pagkatambog sa Yawa nganhi sa yuta. Kining libroha nagatubag sa daghang importanteng pangutana, ug ako malipay nga imo kining mabatonan. [Isulti ang amot.]—Aron makakaplag ug dugang epektibong mga paagi sa pagpresentar sa Mabuhing Walay Kataposan nga libro, tan-awa ang likod nga panid sa Septiyembre 1995, Pebrero 1995, Septiyembre 1994, Septiyembre 1993, nga mga isyu sa Atong Ministeryo sa Gingharian.
5 Sa pagbalik niadtong nagapakitag interes, makapaningkamot ka sa pagsugod ug pagtuon sa Bibliya pinaagi sa pagpahiuyon niining paagiha:
◼ “Sa atong ulahing panaghisgot, nakahimo kag makapainteres kaayong obserbasyon. [Hisgoti ang usa ka komento nga gihimo sa indibiduwal.] Gihunahuna ko kana, ug buot nakong ipaambit ang mga resulta sa pipila ka panukiduki nga akong gihimo bahin sa maong ulohan. [Ipaambit ang tukmang kasulatan.] Kami nagatanyag sa pagdumalag libreng kurso sa pagtuon nga nakapaarang sa mga minilyong tawo sa pagsusi sa paninugdang mga pagtulon-an sa Bibliya sa mubong panahon. Ang maong pagsusi magpalig-on sa imong pagsalig sa tinong katumanan sa mga saad sa Diyos.” Ipasiugda ang pipila ka pangutana nga pagatubagon. Kon ang tawo modumili sa tanyag sa pagtuon sa Bibliya, isaysay nga aduna usab kita ing espesyal nga pinadaling kurso nga molungtad lamang ug 15 minutos sa matag semana sa 16 ka semana. Ipakita ang Gikinahanglan nga brosyur, paklia sa leksiyon 1, ug suknaa kon imo bang ikapasundayag ang unang leksiyon.
6 Hinumbomi ang Paggamit sa mga Handbill: Epektibo kining magamit diha sa imong pasiuna sa paghaling sa interes sa espirituwal nga mga butang, o mahimong itanyag kini kon walay gidawat nga literatura. Kon interesado, gamita ang napatik nga mensahe sa likod sa handbill aron sa pagdasig sa tawo sa pagdawat ug pagtuon sa Bibliya sa balay ug sa pagtambong sa atong mga tigom.
7 Magmahanas sa imong buluhaton, ug ikaw magmalipayon niana. Hatagig kanunayng pagtagad ang paghimog bug-os nga pagpamatuod, ug kalipayi ang maayong pagbuhat sa tanang bahin sa ministeryo.—1 Tim. 4:16.