Magpalipay ang Grupong Pagsangyaw
1 Sa dihang gipadala ang 70 ka tinun-an aron sa pagsangyaw, gitudloan sila ni Jesus kon unsay isulti, giorganisar sila nga magtinagurha, ug gipahibalo sila sa teritoryo nga sangyawan. Nakaamot kini sa kalipay nga ilang naeksperyensiyahan. (Luc. 10:1-17) Susama karong adlawa, ang grupong pagsangyaw makatabang sa pagsangkap, pag-organisar, ug pagdasig sa katawhan sa Diyos alang sa buluhatong pagsangyaw.
2 Ang mga Ansiyano Maoy Manguna: Ang mga ansiyano adunay dakong papel sa pagtabang sa tanan nga regular nga makig-ambit sa buluhatong pagsangyaw. Ang magtatan-aw sa pag-alagad maoy manguna sa paghimog mga kahikayan alang sa pagsangyaw sa tungatunga sa semana. Ang matag magtatan-aw sa pagtuon sa libro maoy responsable sa pag-organisar sa kalihokan sa iyang grupo, ilabina sa hinapos sa semana. Sa mga panahon nga ang tibuok kongregasyon magtigom sa dayon nang pagsangyaw, sama sa inigkahuman sa Pagtuon sa Bantayanang Torre, angayng atimanon sa matag magtatan-aw sa pagtuon sa libro ang mga kinahanglanon sa iyang grupo.
3 “May Kahapsay ug Pinaagig Kahikayan”: Ang usa nga gitudlo nga maoy modumala sa tigom sa dayon nang pagsangyaw angayng magsugod nga untop sa panahon ug limitehan ang maong tigom kutob ra sa 10 o 15 minutos. Labing maayo nga hikayon niya ang mga grupo nga mosangyaw ug mag-asayn ug teritoryo (gawas kon ang mga magtatan-aw sa pagtuon sa libro maoy maghikay niini, ingon sa nahisgotan na) sa dili pa taposon pinaagi sa pag-ampo. Kini magpamenos sa panginahanglan alang sa mga magmamantala nga magtapok diha sa teritoryo, nga makabalda sa dignidad sa atong buluhaton. Uyon usab kini sa tambag ni Pablo: “Himoa ang tanang butang nga may kahapsay ug pinaagig kahikayan.” (1 Cor. 14:40) Ang tanang motambong sa mga tigom sa dayon nang pagsangyaw makaamot sa kalamposan sa maong kahikayan pinaagi sa pag-abot nga untop sa panahon, pagkooperar sa bug-os sa usa nga nanguna, ug pagbiya dayon paingon sa teritoryo sa dihang palakwon na ang grupo.
4 Makabig sa Panaghiusa: Ang mga kahikayan sa grupong pagsangyaw maghatag ug maayo kaayong kahigayonan sa pag-ilaila sa uban diha sa kongregasyon. Bisag dili ra man supak nga makigsabot daan ug ikauban sa pagsangyaw, apan makaayo usab alang kanato nga motambong sa mga tigom sa dayon nang pagsangyaw nga walay gikasabot daan. Tingali itudlo kita nga makig-uban niadtong dili pa kaayo nato kaila, sa ingon magpaarang kanato sa ‘pagpasangkad’ sa atong gugma.—2 Cor. 6:11-13.
5 Ang grupong pagsangyaw magdasig ug magkabig kanato ingong “mga isigkamagbubuhat diha sa kamatuoran.” (3 Juan 8) Hinaot nga bug-os kitang makig-ambit sa grupong pagsangyaw!