Gamitang Maalamon ang Imong Panahon Diha sa Ministeryo
1 Daghan pa ang buluhaton, ug ang panahon mubo na. (Juan 4:35; 1 Cor. 7:29) Pinaagi sa maayong pag-organisar ug abanteng pagplano, magamit nato ang atong panahon diha sa ministeryo nga maalamon.
2 Magmaandam: Sa dili ka pa moadto sa tigom sa dayon nang pagsangyaw, paneguroa nga aduna kay mga literaturang itanyag ug andama ang imong mga presentasyon. Human sa pag-ampo, lakaw dayon ngadto sa teritoryo. Kini maghatag kanimog kahigayonan ug sa imong kauban nga mas dako pag mahimo sa panahon nga inyong igugol sa pagsangyaw.
3 Kon ikaw natudlo nga modumala sa tigom sa dayon nang pagsangyaw, angayng sugdan nimo kini nga untop sa panahon. Himoa kining mubo nga dili molapas sa 10 ngadto sa 15 minutos. Sa dili pa mogikan, paneguroa nga ang matag usa aduna nay kauban ug kon asa ang ilang kobrehan.
4 Samtang Anaa sa Teritoryo: Sa dihang matapos na ang tigom sa dayon nang pagsangyaw, ayaw paglangaylangay, lakaw dayon ngadto sa teritoryo. Kon mosayo kag biya sa teritoryo, mas maayo nga ikaw na ang mangitag imong kasakyan pauli, aron dili usab mapugos pagbiyag sayo ang imong mga kauban. Sa dihang mosangyaw uban sa grupo, magmahunahunaon sa uban nga naghulat kanimo nga mahuman ka sa pagsaysay. Naglakip kana sa mataktikanhong pagbiya sa makiglalison nga tagbalay o sa paghikay sa pagbalikduaw niadtong mga interesado.—Mat. 10:11.
5 Sa dihang magbalikduaw, dili masayang ang imong biyahe kon duawon nimo ang tanan nimong balikduaw sa usa ka dapit sa dili ka pa moadto sa lain. Mahimo usab nimong tawgan sa telepono ang buot nimong duawon aron maseguro nga anaa siya sa balay. (Prov. 21:5) Kon mabanabana nga taastaas ang imong igugol nga panahon sa pagduaw, hikaya nga ang uban makasangyaw sa mga silingan o kaha makabalikduaw usab.
6 Kita nagkinabuhi na sa panahon diin dako ang alanihon. (Mat. 9:37, 38) Hapit nang matapos kining buluhatona. Busa, angay natong gamiton nga maalamon ang atong panahon diha sa ministeryo.