Magmaalisto sa Pagsugod ug mga Pagtuon sa Bibliya
1 Ang pagsugod ug pagdumalag mga pagtuon sa Bibliya maoy bahin sa atong komisyon ingong mga Saksi ni Jehova. (Mat. 28:19, 20) Busa, ikaw ba usa sa kaubanan sa Diyos nga mamumuo sa pagbuhat niini? (1 Cor. 3:9) Pagkadakong pribilehiyo nga makabulig sa uban sa pagkaila sa labing dakong Persona sa uniberso!
2 Tungod sa daghan kaayong mga suliran nga maylabot sa mga hitabo sa kusog-mausabon nga kalibotan, daghang mabuot-kasingkasing nga mga tawo ang nangitag mga tubag kon nganong nahitabo kining mga butanga. Dugay na kanhi ang mga tubag gitagana ni Jehova niining mga pangutanaha. Sa dihang ang matim-osong mga tawo matudloan sa Pulong sa Diyos, sila mapalipay. Busa, gikinahanglan tang magmaalisto sa mga kahigayonan sa pagsugod ug mga pagtuon sa Bibliya.—Prov. 3:27.
MAGMAALISTO SA KAHIGAYONAN
3 Naghunahuna ka bang sugdan ang pagtuon sa Bibliya uban sa usa ka suod nga paryente o usa ka kaila nga wala sa kamatuoran? Tungod kay nakaila kanila ikaw adunay bentaha sa paggamit ug pagkamailahon maylabot sa angayng panahon sa paghisgot niini uban kanila. Sa dihang ang pagkamasayranon sa usa ka tawo mapukaw, ang mabungahong mga panaghisgot mosunod, ug ang usa ka pagtuon sa Bibliya hayan masugdan.
4 Sa daghang hitabo ang maayong pamatasan sa Kristohanong kapikas mibukas sa dalan alang sa dimagtutuo sa pagkadangat sa kamatuoran. (1 Ped. 3:1, 2) Ang dimagtutuong mga kapikas ug ubang dimagtutuong mga membro sa pamilya kasagaran mopabili sa dihang sila ginatagad ug ginatahod sa mga membro sa kongregasyon. Ang pagpakitag personal nga interes kanila mahimong mohatod sa malungtarong mahigalaong mga relasyon. Pinaagig pagsangyaw duyog sa kapikas o membro sa pamilya nga anaa sa kamatuoran, ikaw hayan makatukod ug usa ka pagtuon sa Bibliya.
5 Samtang moambit sa buluhatong pamalaybalay, sulayan tang sugdan ang usa ka pagtuon sa Bibliya sa unang duaw. Ang ubang magmamantala adunay kalamposan sa pagbuhat niini sa dihang misukna ang tagbalay nga diretsong matubag gikan sa usa ka publikasyon. Kon ang tawo mouyon sa pagbasa sa literatura o kon iya kitang padayonon sa balay, atong mapahimuslan ang higayon sa pagpadayon sa panaghisgot ug tingali ikapasundayag ang usa ka pagtuon. Sa umaabot nga mga duaw, basin buot mong mopadayon sa paghisgot sa ulohan nga imong gipaila sa unang duaw.
IMPORMAL NGA MGA OKASYON
6 Magmaalisto sa mga okasyon sa impormal nga pagpamatuod, ug mangandam sa pagdalag daghang suplay sa ‘tracts’ ug mga magasin nga magpadako sa interes sa tigpaminaw diha sa kamatuoran. (Eccl. 11:1) Ang impormal nga pagpamatuod mahimong laing paagi sa atong tinguha sa pagsugod ug mga pagtuon sa Bibliya sa balay.
7 Ang buluhatong paghimog tinun-an dili lamang para sa pipila. Kini maoy alang sa tanan diha sa kongregasyon. Sa paghinumdom nga maoy usa ka Kristohanong sugo sa paghimog mga tinun-an kita madasig nga magmaigmat sa mga kahigayonan sa pagsugod ug mga pagtuon sa Bibliya.