Sundala ang Interes nga Walay Langan
1 “Ayaw ug pa-ugmai ang imong mabuhat karong adlawa.” Daghan ang sinati niining maong sanglitanan nga nagadasig sa pagbuhat gilayon sa kinahanglanong mga butang. Nga mapadapat nato kining prinsipyoha sa atong ministeryo gipakita sa mosunod nga kasinatian.
2 Usa ka sister nakapahilunag libro sa usa ka tawo ug misaad nga mobalik. Nahisaypan nga ang laing sister miduaw sa samang balay usa ka oras sa ulahi. Ang tawo miatubang sa pultahan uban sa libro sa iyang kamot ug miingon kaniya: “Sa dihang miingon ka nga mobalik, wala ko maghunahuna nga ingon niini kadali, apan dayon, andam ko sa akong pagtuon.”
3 Samtang ang ingon kadaling pagbalikduaw mahimong dili kasagaran, kining kasinatiana nagpatugbaw sa panginahanglan nga magmaalisto sa pagsundal sa interes nga walay langan. Sa Abril atong itanyag ang suskrisyon sa Bantayanang Torre, nga makapahimo sa katawhang nunot-sa-panahon diha sa kalibotanong mga hitabo sa katumanan sa tagna sa Bibliya.
4 Ang Katawhan Nagkinahanglan ug Dugang Tabang: Aron mabuligan ang katawhan sa pagsabot niining mahinungdanong impormasyon ug moapresyar nga kini makaapektar sa ilang kinabuhi ug kaugmaon, kinahanglan tang maghikay ug usa ka pagbalikduaw, gipalabing sulod sa pipila ka adlaw sa unang pagduaw.
5 Andama ang Dalan sa Pagbalikduaw: Dili kanunay sayon nga makakuhag kasabotan sa panagkita sa tinong panahon, ug ang tagbalay mahimong dili mahinumdom nga tumanon ang maong kasabotan. Bisan pa niana, kon maampingon nimong ginota ang panahon sa pagbalikduaw, ug unya segurado nga himoon ang duaw—sulod sa pipila ka adlaw kon kana posible—natuman mo ang imong kaakohan sa pag-isip nga ugdang sa maong kasabotan. Kon ang tawo wala sa balay, paneguroang padayong mosulay sa pakigkita kaniya. Mahimong madasig siya nga ugdang motamod sa imong duaw dihang iyang makita ang imong determinasyon sa pagkaplag kaniya sa balay.
6 Sanglit dili man gayod nato bug-os maseguro ang interes nga gipakita sa tawo dihang gihimo nato ang unang pagduol, paghimog nota nga mobalikduaw bisan kon madayag ang diyutay lamang interes. Mahimong naaghat nimo ang interes sa tawo sa Bantayanang Torre, ug sa imong pagbalik mahinangop kang matingala sa maayong pagdawat nga imong nabatonan. Busa paneguroang masundal ang interes nga walay langan!