Ipatugbaw ang mga Brosyur Aron Ipaambit ang Imong Paglaom sa Gingharian
1 Sa dihang atong masaksihan ang katumanan sa tagna sa Bibliya, nagamaya ta sa atong paglaom sa Gingharian, ug kita napalihok nga mosulti bahin niana ngadto kang bisan kinsa nga magpatalinghog. (Luc. 6:45; Roma 12:12) Ang atong pagpatugbaw sa mga brosyur diha sa ministeryo sa kanataran sa Agosto maoy usa ka paagi nga ikapaambit ta ang atong paglaom sa Gingharian ngadto sa uban ingon sa gisugo ni Jesus.—Mat. 24:14.
2 Sanglit daghan man kitag kapilian nga mga brosyur, hain niana ang lagmit labing makatagbaw sa panginahanglan niadtong anaa sa atong teritoryo ug makapukaw sa ilang interes? Aron magamit pag-ayo ang mga brosyur, kinahanglang mahibaloan nato ang mga kaundan niini. Ang mosunod nga mubong repaso makabulig kanato niining bahina.
3 Ang Kagamhanang Mopatunghag Paraiso: Sa dihang dinhi si Jesus sa yuta, ang Gingharian sa Diyos mao ang tema sa iyang pagwali. Kining brosyura nagapakita nga ang Gingharian maoy tinuod nga kagamhanan ug kon sa unsang paagi kini mosulbad sa mga suliran nga nakapalisod kaayo sa kinabuhi karon.
4 Tagamtama ang Kinabuhi sa Yuta sa Walay Kataposan!: Kini nagasaysay kon nganong gibuhat sa Diyos ang tawo ug kon sa unsang paagi mapahimuslan nato ang kinabuhi sa walay kataposan. Ang mga ilustrasyon ug mubong mga saysay niining brosyura makadani sa mga batan-on ug niadtong adunay limitadong katakos sa pagbasa.
5 Ang Balaang Ngalan nga Magapadayon sa Walay Kataposan: Kining brosyura nagahisgot sa ngalan sa Diyos gikan sa usa ka Kasulatanhon ug makasaysayanhong pagpanglantaw, nga nagapakita kon nganong mahinungdanon alang sa mga Kristohanon ang pag-ila sa ngalan ug paggamit niini sa ilang pagsimba.
6 “Tan-awa! Ginabag-o Ko ang Tanang Butang”: Kining brosyura nagahulagway sa paraiso ug nagatukod ug apresasyon sa Bibliya ug sa atong Maglalalang. Human sa paghisgot kon nganong gitugotan sa Diyos ang pagkadaotan, kini mipunting sa tulo ka pasukaranang pagtulon-an sa Bibliya: ang lukat, ang pagkabanhaw, ug ang Gingharian. Kining brosyura may mga pangutana usab sa ubos sa mga panid, nga makapasayon nato sa pagdumalag usa ka pagtuon sa Bibliya diha niana.
7 Angay ba Nimong Tuohan ang Trinidad?: Ang katawhan mahimong moingon nga sila nagatuo sa Trinidad, apan sila nagakalahi sa ilang pagpanabot niana. Kining brosyura nagatubag sa mga pangutanang sama sa: Unsa man ang Trinidad? Gitudlo ba kini sa Bibliya? Si Jesu-Kristo ba ang labing gamhanang Diyos ug bahin sa usa ka Trinidad? Unsa man ang balaang espiritu, ug sa unsang paagi kini nagalihok?
8 Sa dihang napili na nato ang mga brosyur nga buot natong gamiton, angay natong repasohon ang mga artikulo sa luyong panid niining gulaa sa Atong Ministeryo sa Gingharian. Diha makaplagan nato ang mga sugyot sa pagtanyag sa atong basahon ug paghimog mga balikduaw uban ang pagpanglantaw nga makaugmad ug interes ug makasugod ug usa ka pagtuon sa Bibliya.
9 Sa daghang mga okasyon, kon kita ba nagapamatuod nga pormal o impormal, ang usa ka tinong brosyur mao lamang ang gikinahanglan aron makahatag ug maayong pagpamatuod. Hinaot ang panalangin ni Jehova sa atong masibotong ministeryo mosangpot sa daghan pang magamaya uban kanato diha sa paglaom sa Gingharian!—Buh. 13:47, 48.