Maikagong Pangitaa ang mga Pagtuon sa Bibliya

¹ Ang panahon talitapos na alang niining daang kalibotan. (2 Tim. 3:1-5) Unsay kahulogan niini? Kini nagapasabot nga ang mga kinabuhi sa katawhan namilegro. Bisan pa niana, anaa sa atong gahom ang pagtabang sa pipila nga maluwas. (Prov. 3:27) Tungod niining katuyoana angay tang maikagong maningkamot sa pagsugod ug pagdumalag mga pagtuon sa Bibliya.

² Dako ang napalampos pinaagi sa atong pinasukad-Bibliya nga mga basahon. Apan ang labing gikinahanglan sa katawhan mao ang personal nga pag-abag pinaagig regular nga pagtuon sa Bibliya sa balay. Sa unsang paagi man nato sila matabangan sa pag-apresyar niana?

³ Makasukna tag mga pangutana nga gikabalak-an sa katawhan. Kanang mga pangutanaha magpunting kon nganong ang mga pamatasan kusog kaayong mius-os, kon nganong ang kinabuhing pamilyahanon mabalhinon kaayo, kon nganong ang kapintasan ug krimen usa ka dakong hulga, kon nganong ang usa ka mahigugmaong Diyos nagatugot sa presenteng mga kahimtang. Magmaigmat sa mga isyu nga magpainteres sa katawhan diha sa inyong teritoryo. Ipunting ang tin-awng mga tubag sa Bibliya niining mga pangutanaha. Ipakita kon sa unsang paagi ang basahon makabulig kanila sa pagkat-on kon unsay ginaingon sa Bibliya bahin niining mga gumonhapa nga nakaapektar natong tanan.

⁴ Sulaying dalhon ang tagbalay ngadto sa panaghisgot. Magmaalisto sa pagsabot kon unsay iyang gikabalak-an. Tagika ang inyong panaghisgot palibot sa iyang mga gikaikagan. Dalhang pagtagad nganha sa impormasyon nga anaa sa atong mga basahon nga nagasaysay sa sulbad sa Bibliya sa mga suliran sa katawhan. Una pa mobiya, pagpatunghag usa o duha ka pangutana nga maglig-on sa iyang pagpaabot sa imong sunod nga duaw. Sa dihang mobalik ka, pahinumdomi siya niining mga pangutanaha, ug unya gamitang basahon sa pagtabang kaniya sa pagpangita sa mga tubag sa Bibliya.

⁵ Ang atong pagsugod ug mga pagtuon ug ang makanunayong pagdumala niana makapausab sa mga kinabuhi sa mga tawo. Gikinahanglan natong magpakitag tiunay nga interes kanilang atong gikahibalag sa pagsangyaw o diha sa impormal nga mga kahimtang. Kini nagakinahanglag pagpangandam sa pagpukaw sa ilang interes. Kini nagakinahanglag pailob sa padayong pagbalikduaw hangtod nga imong madala sila ngadto sa makanunayong sundanan sa espirituwal nga pagpakaon. Kini nagakinahanglag mahigugmaong interes ngadto sa katawhan mismo. Kinahanglang buot natong tabangan sila nga maluwas gikan sa taliabot nga kalaglagan. Ang atong buluhaton sa pagtuon sa Bibliya kinahanglang himoon nga usa ka bahin sa regular ug maikagong pag-ampo.​—1 Tes. 5:17.

⁶ Makapadasig kaayo ang paglantaw nga duolan sa usa ka milyong tawo ang nahimong bawtismadong mga tinun-an sa milabayng tulo ka tuig. (Mat. 28:19, 20) Kita nagadumala karon ug mga upat ug tunga ka milyong mga pagtuon sa Bibliya sa kada bulan. Kumosta man ikaw? Gihimo ba nimo ang maikagong panlimbasog aron makaambit diha sa buluhatong pagtuon sa Bibliya? Hinumdomi, ang atong mga kinabuhi ug niadtong sa uban nagadepende sa atong pagkamatinumanon niining bahina.​—Exeq. 3:17-19.